aMbo 36:5

Psalms 57

Mboe 57

Tomtom ta isuŋ pa Anutu be iswe azuŋka kini mi mburaana biibi

Mboe ki Dabit Indeeŋe Dabit iko pa Saul mi imbot lela raŋ sumbuunu na, itooro mboe tiŋgi. Ka ŋger: ‘Pasaana pepe’

[1Sam 24:1-3]

O Anutu, lelem isaana pio mi muŋai yo.
Pa nio mbesooŋo ku, mi aŋpase pu be we ur pio mi menderkaala yo.
Kuubukaala yo kembei man ikuubukaala lutuunu bizin
ma irao pataŋana sananŋana taiŋgi imap ma ila ne.
Kokena ipasaana yo.

Nio aŋtaŋroro Anutu kor kana kat be iuulu yo.
Pa ŋgar kini ta iurur ŋonoono. Tana mbulu ta so leleene iur pa be ipet pio, na ni ko ikam ma ipet.

Ni ko imbot saamba, mi ikam ulaaŋa sa pio mi ikamke yo.
Ko imender pio, mi iyaamba koŋ koi bizin ta tiketoto yo i.
Pa ni itoto sua kini mbukŋana mi iurur leleene pa wal kini.

Koŋ koi bizin tiliu yo kek.
Wal ta niamŋan ambotmbot i, zin kembei laion ta basmai zin pa tomtom mazan.
Zoŋon na, mataana men, kembei peene lutuunu mi izi.
Mi mian na, kembei buza ta mataanaŋana i.

Anutu, maŋga mi swe azuŋka ku mi mburom ta zom biibi pa i sala saamba.
Mi swe ma irao toono ta boozomen tomini!

Koŋ koi bizin tiraara pu pio be aŋti la.
Tana aŋyamaana kembei pataŋana biibi taiŋgi ikamam be ikoto yo.
Mi tikel naala isu zaala tio bekena aŋtop sula.
Mi som. Zitun titop sula.

Anutu, ŋgar tio imbol kat be aŋpase pu mi aŋto u.
Leleŋ iwe ru som.
Tana ko aŋbo mboe mi aŋpakuru.
Ko aŋmaŋga pa mbeŋ,
mi aŋzze kombom tio ma ila irao zoŋ pok ma ise.
Merere, nio ko aŋpakuru ila karkari mazwan.
Ko aŋbo mboe mi aŋwit urum isala kor ila toono ta boozomen ka tomtom bizin mazwan.
10 Pa muŋaiŋana mi kampeŋana ku, ina biibi kat. Isala ta saamba a.
Mi mbulu ku ta toto sua ku mbukŋana na ta kembena. Isala ta kor a. a 

11 Anutu, maŋga mi swe azuŋka ku mi mburom ta zom biibi pa i sala saamba.
Mi swe ma irao pa toono ta boozomen tomini.
Copyright information for `MNA