aMt 15:19
bUn 18:25; Mbo 37:37; 2Tes 1:5+

Psalms 58

Mboe 58

Tomtom ta isuŋ Anutu be iur kadoono pizin peeze kan sananŋan

Mboe ki Dabit Ka ŋger: ‘Pasaana pepe’

Niom peeze koyom, niom kitirtiiri kat sua kizin tomtom?
Mi sombe kuur kadoono pizin, na kakamam ma indeŋdeeŋe?
Som kat! Leleyom iurur pa ŋgar sananŋana men.
Mi kakamam mbulu bozboozo ta ipasansaana zin tomtom. Tabe kakam ma toono bok pa mbulu sananaŋana. a 

Wal sananŋan, indeeŋe ta nan bizin tipeebe zin mi imar na, tipaŋobŋoobo pa zaala ambaiŋana.
Mazwaana ta timbotmbot lela nan bizin kopon mi imar na, tisaŋsaŋ pa Anutu zaala kini, mi kwon bok pa sua pakaamŋana men.
Zin kembei mooto sananŋana kat. Pa sua ta iwedet pa kwon na, ipasansaana zin tomtom.
Mi tizeeze talŋan ma sik.
Sombe totoombo be tayaraama zin, na tarao som.

Yooba Anutu tio, zin kembei ta laion sananŋan.
Popooro kan keskeeze, mi keende zoŋon ma isu lene.
Pambiriizi zin ma tila len, kembei lapot ta ireere rimen mi imaaga ma imap.
Naso tiwe kembei ro sananŋan ta tomtom tipadaaga mi imelle ma imetmeete.
Mi tiwe kembei sek ta tikarra mi timetmeete su zaala keteene na.
Mi tiwe kembei pikin ta ire mat som, mi iwe siŋ ma isu lene.

Anutu ko loŋa men mi iyembut swon, kembei ta teyembut ke namannaman ma tipiri sala you.
Kete malmalŋana kini ko iwilaala zin ma tila len kembei musmuuzu.

10 Mi wal ndeeŋeŋan, sombe tire Anutu iur kadoono pa zin wal sananŋan mi ipokot mbulu kizin, nako menmeen zin.
Mi siŋ kizin wal sananŋan ta ireere su toono na, wal ndeeŋeŋan ko tipadagdaaga kembei koroŋ sorok.
11 To tomtom ko tiso ta kembei:
“Ŋonoono kat. Anutu, ni imbotmbot mi iurur kadoono pa zin tomtom ta timbotmbot su toono na.
Tana zin wal ndeeŋeŋan na, ni isarra zin pa kampeŋana ambaimbaiŋan.” b 
Copyright information for `MNA