Psalms 59

Mboe 59

King isuŋ Anutu be itatke i pa ka koi bizin naman

Mboe ki Dabit Indeeŋe ta king Saul iŋgo menderŋan kini pakan ma tila mi timenderkaala ruumu ki Dabit be tikisi na, Dabit itooro mboe tiŋgi. Ka ŋger: ‘Pasaana pepe’

[1Sam 19:11]

O Anutu tio, tatke yo pa koŋ koi bizin naman.
Wit yo mi ur yo sala kor. Kokena zin wal ta tisombe tikam malmal pio na timbuulu yo.
Tatke yo pa zin wal sananŋan naman.
Kamke yo pa zin wal ta titekteege siŋ pizin tomtom na.

Yooba, re! Iŋgi wal mburanŋan ta timbuuru koŋ,
mi tizaŋzaaŋa yo be tipun yo ma aŋmeete i.
Tamen nio aŋkam zooroŋana som, mi aŋkam sanaana sa som.
Nio aŋkam ŋoobo mbulu sa som. Tamen iŋgi tikamam kumbun be timaŋga pio sorok.
Merere, maŋga mi mar lae tio. Re yo mi uulu yo pa pataŋana tio ti.
Yooba, nu Anutu mburom keskeezeŋom. Nu ta Anutu kizin Israel.
Zin wal ta tipizil ndemen pio mi tisu tiwe koŋ koi na, muŋai zin risa pepe.
Karkari boozomen ta timbesmbeeze pu som na, ur kadoono pizin.

Rou ta boozomen, koŋ koi bizin timilmiili ma timar,
mi tiwwa pa kar leleene
ma tiŋurŋur kembei me ta ikamam be ikan tomtom na.
Re. Sua sananŋana men ta iwedet pa kwon.
Mian na, kembei ta buza mataanaŋana i.
Mi timototo u som. Pa tizzo ta kembei: “Asiŋ ko ileŋ yam?”

Tamen Yooba, nu zeŋzeeŋge pizin.
Karkari boozomen ta timbesmbeeze pu som na, nu kamam sua repiiliŋana pizin.

Anutu, nu ta pombolmbol yo mi kamam leŋ mburoŋ. Tana aŋurur motoŋ pu mi aŋpase pu.
Pa nu ko wit yo mi ur yo sala kor, mi we seraara mbolŋana pa koŋ koi bizin. Tana zin ko tirao be timbuulu yo na som.
10 Anutu tio, nu toto sua ku mbukŋana mi urur lelem pa wal ku.
Muuŋgu pio, mi koto koŋ koi bizin ta tireudut yo na, mi aŋre kat pa motoŋ. Naso menmeen yo biibi.
11 Tamen pun zin ma timetmeete karau pepe.
Kokena wal tio matan mbeleele mbulu ku ta urur kadoono pizin wal sananŋan.
Merere, nu ta we siŋgiao piam mi menderkalkaala yam.
Tana koto zin pa itum mburom ma zan imap kat, mi yaŋgwiiri zin ma tila timbot leŋaleŋa ma irao tisula len Andewa.

12 Wal tana mbulu kizin irao pa motom som. Pa tikamam sanaana boozomen pa kwon.
Sua ta iwedet pa kwon na sananŋana men.
Mi tipase pa zitun mburan mi tipakurkur zitun.
Tamen mbulu kizin pakurŋana tana ko iwe kilis pizin.
13 Zin tipakamkaam zin tomtom mi tigibgiibi sua sananŋana be tipasaana zin.
Tana pasaana zin raama ketem malmalŋana ku.
Pambiriizi zin ma timap kat.
Naso toono ta boozomen tiute ta kembei:
Niam Israel ta popoŋana ki Yakop na, Anutu ta ikamam peeze piam.

14 Rou ta boozomen, koŋ koi bizin timilmiili ma timar,
mi tiwwa pa kar leleene
ma tiŋurŋur kembei me ta ikamam be ikan tomtom na.
15 Zin kembei me ta tiwwa mi tirru kan kini.
Mi sombe tikan ma irao som, to timbolmboolo ma ila berek.

16 Tamen nio, nako aŋbo mboe mi aŋpakuru pa mburom biibi.
Aigule ta boozomen, zoŋ isombe ise, nako kalŋoŋ isala mi aŋbo mboe pa mbulu ku ta toto sua ku mbukŋana mi urur lelem pa wal ku.
Pa sombe pataŋana ikam yo, na nu ko wit yo mi ur yo sala kor,
mi we kembei siiri mbolŋana pio be aŋke lela mi aŋbot ambai.

17 Anutu, nu ta kamam leŋ mburoŋ. Tana aŋbo mboe mi aŋpakur zom.
Anutu tio, nu toto sua ku mbukŋana mi urur lelem pa wal ku
Mi nu ta wit yo mi ur yo sala kor, mi we seraara mbolŋana pa koŋ koi bizin.
Copyright information for `MNA