aLu 22:69; Ep 1:20

Psalms 61

Mboe 61

Suŋŋana ki tomtom ta imbot molo pa lele kini

Mboe ki Dabit

O Anutu, leŋ tiŋiizi tio.
Ŋgun talŋom pa suŋŋana tio ti.
Pa iŋgi aŋbot molo kat pa kar tio,
mi aŋmoto koŋ ma mburoŋ imap kat.
Tana aŋboobu be uulu yo.
Itum yaaru yo ma aŋsala abal ku mbolŋana. Naso aŋbot ambai.

Pa nio aŋpase pu be we ur pio mi menderkaala yo.
Mi nu we kembei siiri mbolŋana ta isala kat be aŋke lela.
Nu we seraara pa koŋ koi bizin.

Nio leleŋ be aŋbotmbot lela beeze ku totomen.
Aŋso aŋma ku be kuubukaala yo kembei man ikuubukaala lutuunu bizin.
Pa sua boozomen ta aŋbuk pu na, Anutu nu leŋ kek.
Mi matamur ku ndabokŋana ta nu kamam pizin wal tau timototo u mi tileŋleŋ la kalŋom na, nu kam pio kek.

Anutu, seeŋge ndaama ki king be imbot ma molo.
Kami ma imbotmbot mata yaryaara men, mi iseeŋge iseeŋge ma ila.
Kami ma imbotmbot se muriini peeze kana su kerem uunu ma alok.
Pa nu toto sua ku mbukŋana mi urur lelem pa wal ku. Tana motom pini mi poroukaali totomen. a 

Tonabe nio leleŋ ambai, mi aŋbombo mboe be aŋpakur zom totomen.
Mi aŋto sua tio mbukŋana mi aŋkamam patoronŋana pu pa aigule ta boozomen.
Copyright information for `MNA