aMt 26:36+
bLu 12:16+; 1Tim 6:6+,17
cMt 16:27; Ro 2:6; 1Kor 3:8; 2Kor 5:10; Tur 22:12

Psalms 62

Mboe 62

Suŋŋana ki tomtom ta kopoono rru som mi ipase pa Anutu be iporoukaali

Mboe ki Dabit Timbo pa Yedutun ta iwe mataana pizin mboe kan

Nio kopoŋ rru som. Iŋgi aŋur niŋ ma aŋbotmbot, mi aŋzza Anutu.
Pa ni itunu ko ikamke yo pa pataŋana tio taiŋgi.
Ŋonoono kat, ni itutamen ta ulaaŋa tio, mi iwe siiri mbolŋana pio be aŋbot lela.
Mi ni ta iwit yo mi iur yo sala kor. Tana kosa sa ko irao be ipasaana yo kat na som.

Niom wal ta kosombe kapasaana yo na, ŋiizi na kezem mbulu tiom sananŋana?
Niom ta boozomen kakamam be kupun yo paso?
Pa nio mburoŋ imap kek. Nio iŋgi kembei siiri ta isaana kek mabe borok su lene i.
Nio zoŋ biibi, tanata kakamam be kokoto yo.
Niom tina leleyom pa mbulu pakaamŋana ilip.
Pa kwoyom na, izuŋzuŋ pa Anutu be ikampe yo.
Tamen leleyom na, kosombe ni ipasaana yo.

Tamen nio kopoŋ rru som. Iŋgi aŋur niŋ ma aŋbotmbot, mi aŋzza Anutu be iuulu yo.
Nio aŋurur motoŋ pa ni itutamen.
Ŋonoono kat, ni itutamen ta ulaaŋa tio, mi iwe siiri mbolŋana pio be aŋbot lela.
Mi ni ta iwit yo mi iur yo sala kor. Tana kosa sa ko irao be ipasaana yo na som. Som kat!
Nio aŋpase pa Anutu be imboro yo ma aŋbot ambai, mibe ipakur yo.
Pa ni ta iwe siiri mbolŋana pio, mi iwe ur pio be aŋke lela.

Niom wal ki Anutu, kapase pini totomen.
Mi koso i pa pataŋana tiom boozomen ta imbotmbot la leleyom.
Pa ni ta iwe ur piti mi imenderkalkaala iti. a 

Zin tomtom na, koroŋ sorok.
Wal zanŋan mi zin sorrokŋan tomini.
Tana irao tapase pizin na som.
Pa timbot rimen mi timap, kembei miiri ta iwedet pa kwondo na.
10 Tana mbulu ki takam malmal mi toyo koroŋ kizin tomtom ma iwe lende na, kapase pa pepe.
Mi kapase pa mbulu ki kuumbu be ikam yom ma kombot ndabok na pepe.
Mi sombe pat tiom ipepeebe mi koyyo leyom koroŋ boozo, na kuur leleyom pa koroŋ tana pepe. b 

11 Sua ta Anutu itunu izzo mi nio aŋleŋleŋ na, imbot ta kembei:
Ni itutamen kat ta le mburaana biibi.
12 Merere, nu toto sua ku mbukŋana mi urur lelem pa wal ku.
Mi nu ko ur kadoono pizin tomtom ta boozomen
ikot mbulu kizin kizin. c 
Copyright information for `MNA