Psalms 64

Mboe 64

Tomtom ta isuŋ Anutu be iporoukaali pa ka koi bizin

Mboe ki Dabit

O Anutu, nio aŋtaŋroro u be uulu yo.
Pa iŋgi koŋ koi bizin tikam ma aŋmoto biibi kat.
Tana leŋ kalŋoŋ, mi motom pio mi poroukaala yo pizin.
Re. Iŋgi zin wal sananŋan tilup zin mi timbuuru koŋ.
Tana turke yo pizin: Kokena tipasaana yo.

Sua ta tigibgiibi na, ambai som kat. Mian na, kembei buza ta titwooro ma mataanaŋana kat.
Sua kizin na, kembei peene lutuunu ta tisuulu koroŋ sananŋana ise be tipeene yo pa.
Zin tikewe lae zaala zilŋaana, mi tizaŋzaaŋa zin wal ta tikam ŋoobo mbulu sa som.
Mi so tire zin na, karau men mi tipeene zin. Mi timoto kosa sa som.
Zin tiparpesese zin pa mbulu sananŋana,
mi tiparzzo pizin pa lele tabe tiur kilis kizin isu pa i.
Mi tizzo ta kembei: “Mbulu ta takamam i, asiŋ ko ire? Som.”
Tana lelen iurur be tikam mbulu kizin sananŋana ma tiso:
“Aa, mbulu tabe takam i, nako takam ma takam kat. Tomtom sa ko iute iti som.”
Aiss, iti tomtom na, ŋgar bozboozo imbot la lelende!

Tamen Anutu, ni ko iser kat peene kini lutuunu ila kizin.
Ko karau men ikas zin ma baram su.
Sua sananŋana ta zin tigibgiibi na, Anutu ko ipimiili pizin mi ipasaana zitun pa.
Mbulu tabe ni ikam pizin i, wal boozomen ko tire, to uten katkat pizin mi tiso: “Na buri. Kayamaana kek?”
Mi tomtom ta boozomen ko tikam ŋgar pa mbulu ta Anutu ikam na,
to timoto kan, mi tisoyaara uruunu.

10 Tona zin wal ndeeŋeŋan ko menmeen zin pa Yooba,
mi tipase pini be iwe ur pizin mi imenderkaala zin.
Zin wal ta lelen ŋgeezeŋan, nako lelen ambai mi tiwit uruunu.
Copyright information for `MNA