aMbo 40:12; Ro 3:25, 5:8
bŊgo 14:17
cMbo 67:6

Psalms 65

Mboe 65

Zin Israel tipakur Anutu pa yaŋ mi mai ambaiŋana ta ni ikam pizin

Mboe ki Dabit

Anutu, niam ko amur niyam ma ambotmbot, mi ampakurkuru su abal Sion.
Mi sua ta ambuk ima ku, nako amto.
Pa nu leŋleŋ suŋŋana tiam mi uluulu yam.
Tana tomtom ta boozomen tirao tima timbot su kerem uunu.
Sombe sanaana mi zooroŋana tiam ikam yam ma leleyam ipata kat,
na nu ta rekreege piam. a 

Zin wal ta itum peikat zin mi kam zin ma tima timbot kolouŋana pu lela urum ku leleene na, lelen ambai kat pa kampeŋana ku ta ise kizin na.
Niam leleyam be ambotmbot lela urum ku potomŋana.
Pa ina iwe zaala piam be amkam pombolŋana mi kampeŋana ambaimbaiŋan matakiŋa boozomen.

Ulaaŋa tiam, niam amboobu be uulu yam.
Swe mburom ramaki mbulu ku ndeeŋeŋana, mi kam uraata bibip piam.
Pa tomtom ta boozomen irao toono biibi mi mutumutu ta munŋaana men, ta tiurur matan pu mi tipase pu.
Nu mburom keskeezeŋom.
Itum mburom ta muŋgu iur zin abal ma timbot murinmurin.
Mi sombe tai isaana kat, na nu rao be punmeete.
Mi duubu zoŋo ŋirŋir na, nu pun ma taun isu.
Mi tomtom ta kembena. Sombe timaŋga be tikam malmal mi orooro kizin isala, na nu punmeete ma lele ikam kiŋ.
Zin tomtom ta timbot lele molo na tomini, tire mos bibip ta nu kamam ma iwedet. Tabe timurur ma motoŋana ikam zin.
Mi wal ku boozomen ta tire uraata ku na, menmeen zin pa, mi kalŋan izalla ma timbo mboe.
Zin ta timbot pa lele ta zoŋ izze pa i, mi ila ila ma lele ta zoŋ izulla pa i.

Nu ta motom pa toono, mi kamam ma yaŋ isu. Mi pembesmbeeze toono ma mbuyeene iwedet.
Yok ki Anutu na, irereere ma biibi pa toono. Irao imaaga na som.
Pa nu lelem be kam ma mai ambaiŋana ipet.
Tanata urpewe toono be ipiyooto kini boozo.
10 Nu ta kamam ma yaŋ izzu, bekena pembeeze kuma pizin tomtom.
Mi kampeŋana ku, ta ikamam ma kini indomdom ma izze. b 
11 Nu ambaiŋom kat. Pa ndaama ti, nu kam ma mai ambaiŋana ipet piam.
Lele ta so nu wwa pa na, kampeŋana ambaimbaiŋan boozomen iwedet. c 
12 Nu kam ma mbutmbuutu ambaiŋana ilol lele bilimŋana bekena zin mbili tikan.
Mi kam ma mokleene ambaimbaiŋan ipeŋgeeze abal ta boozomen. Tabe tomtom tire mi menmeen zin.
13 Makau mi sipsip boozomen tiwwa pa lele mbutmbuutuŋan.
Mi lele ŋgolooboŋan na, kini boozomen indomdom ma izze.
Tana tomtom timbombo mi menmeen zin irao lele ta boozomen.
Copyright information for `MNA