aKam 14:22; 1Kor 10:1
bKam 15:18
cKam 15:25; Yems 1:2+; 1Pe 1:7
dKam 1:14
eYesa 43:2
fYo 9:31; Yems 4:3; 1Yo 4:21+

Psalms 66

Mboe 66

Mboe pakurŋana pa uraata bibip ta Anutu ikamam pa wal kini

Niom karkari ta karao toono ta boozomen na, kalŋoyom izalla mi menmeen yom pa Anutu.
Kombo mboe mi kapakuri. Pa ni zaana biibi.
Kiwit uruunu ma isala kor!
Koso pa Anutu ta kembei: “Anutu, uraata bibip ta kamam, ina tomtom tire mi timoto. Nu mburom biibi kat.
Tana kom koi bizin timoto kan mi tilek kumbun pu.
Mi zin men som. Zin karkari ta tirao toono ta boozomen na, timap ma tilek kumbun pu.
Mi lelen ambai pu mi timbombo mboe be tipakur zom.

Kamar mi kere uraata bibip ta Anutu ikam la tomtom mazwan.
Uraata tana iswe kat Anutu mburaana. Tabe tomtom tire mi timoto kan.
Muŋgu ni ikam tai ma iwe toono raraazaŋana,
mi tumbundu bizin tindu ma tipa pa.
Tana iti menmeen ti pini. a 
Ni ko ikam peeze ma alok. Pa mburaana biibi kat.
Mi ni mataana izzu pizin tomtom mi itirtiiri zin.
Tana niom wal zorzooroŋoyom kamaŋga be kozoori mini pepe. b 

Niom karkari ta boozomen, kapakur Anutu tiam pa kampeŋana kini.
Kalŋoyom isala mi kiwit uruunu.
Pa ni ta ikiskis ti ma tombot matanda yaryaara.
Mi ni mataana piti, tana kumbundu ikam ŋgiris som.
10 Ŋonoono, Anutu nu toombo yam pa pataŋana pakan bekena peŋgeeze urlaŋana tiam,
kembei ta tinenne pat silba bekena you ikan ka muk ma ila ne, mi silba tana iwe ŋgeezeŋana kat. c 
11 Nu yok pa kilis ma ikam yam,
mi ur pataŋana biibi isalakaala yam be ambaada. d 
12 Mi zem koyam koi bizin ma tipadaaga yam.
Tana niam kembei ampa la you leleene, mi kembei ta wo biibi isur yam.
Tamen iŋgi ur leyam zaala kek. Tabe ambot ambai kat, mi amrao pa koroŋ ta boozomen. e 

13 Indeeŋe ta nio aŋbotmbot la pataŋana leleene na,
aŋbuk sua pu be aŋkam patoronŋana pu.
Tana iŋgi aŋto sua tio mbukŋana tana,
mi aŋmar urum ku be aŋneene patoronŋana pu.
15 Nio ko aŋkam sipsip tumŋan, mi aŋneene zin su kerem uunu ma kuzin isama ta kor a.
Mi ko aŋkam makau mi mekmek mi aŋneene zin tomini be tiwe patoronŋana pu.

16 Niom wal ta komototo Anutu mi keleŋleŋ la kalŋaana na, niom ta boozomen kamar mi keleŋ sua tio ti.
Nio ko aŋso yom pa uraata biibi ta ni ikam pio na.
17 Nio aŋtaŋroro i be iuulu yo,
mi kwoŋ ipakuri.
18 Indeeŋe tana, sombe ŋgar sananŋana sa imbot la leleŋ,
so ni ileŋ suŋŋana tio som. f 
19 Tamen ni iŋgun talŋaana pio,
mi ileŋ suŋŋana tio.
20 Tana nio aŋpakur Anutu.
Pa ni itit suŋŋana tio som,
mi iruutu muŋaiŋana kini pio som.
Copyright information for `MNA