aKam 19:16; Mbo 18:10+; Mt 26:64
bKam 22:22+; Mbo 10:14, 146:7+
cKam 19:16+
dEp 4:8
eMbo 81:6; 2Kor 1:4+
fMbo 56:13; 1Kor 15:51+; 1Tes 4:13+; Tur 1:18
gMbo 29:3, 68:4
hKam 19:5+; Mbo 29:10+; 2Kor 1:3

Psalms 68

Mboe 68

Merere ni ulaaŋa mburaanaŋana kizin wal kini

Mboe ki Dabit

Anutu ko imaŋga pa ka koi bizin mi iyangwiiri zin ma tiko pirik.
Zin ta tiurur koi pini, nako tiko pini ma tila len.
Pa ni ko ipambiriizi zin ma timap, kembei ta miiri iwilaala you ka koi ma ila ne.
Wal sananŋan, sombe timbot Anutu kereene uunu, na ni ko ipasaana zin ma mburan imap kat ma tila len,
kembei you ta ikan ŋgwaara ma iwe gubuunu men.
Mi wal ndeeŋeŋan na, zin ko lelen ambai.
Ko timbotmbot su Anutu kereene uunu raama menmeen zin.
Tana ko lelen ambai mi kalŋan izalla ma tipakuri.

Kombo mboe pa Anutu. Kapakuri pa mboe mi kiwit zaana.
Kuurpe zaala pa ni ta imbotmbot se miiri tieene mi iwwa.
Ni zaana Yooba.
Kulup yom su kereene uunu mi menmeen yom pini. a 
Anutu, ni imbotmbot muriini potomŋana,
mi imborro zin moondo kembei ta taman.
Mi zin noroŋa na, ni imendernder pizin mi iporoukalkaala zin. b 
Mi tomtom ta so ni itutamenŋana, mi le gaabaŋana sa som, na Anutu ko ikam le tomtom pakan be ziŋan timbot.
Mi zin wal ta tizeebe zin sorok lela ruumu sanaana na, ni ko ikam zin ma tiyooto, mi iyaaru zin ma tila. Tana zin ko timbombo mboe raama menmeen zin, mi tito i ma tila.
Tamen zin wal zorzooroŋan na, zin ko timbot lele kerekereŋana men.
Anutu, indeeŋe ta nu yaaru zin wal ku Israel,
mi niomŋan kapa pa lele bilimŋana na,
yeŋyeeŋge itok toono, mi yaŋ biibi isu pa saamba.
Pa nu su mi mbot sala abal Sinai tau.
Nu ta Anutu kizin Israel. c 
Anutu, toono ta kam pa wal ku na, sombe kerekereŋana,
na nu kamam yaŋ biibi ma izzu bekena pembeeze ma ambai mini.
10 Zin sorrokŋan ta timbotmbot toono ta wal ku titu su pa na, na nu ko rre zin pa kan kini ma koroŋ.
Pa nu ta kampeŋana katuunu.

11 Merere iso ta kembei: Ni ilip pa malmal kek.
Tana wal boozo men tila ma tisoyaara uruunu.
12 Tiso: “Ou keleŋ! Zin king ziŋan zin malmal kan kizin tiko papirik ma tila len lup kek!
Tana toyo mburu kizin mi takam pizin moori kaibiim ta timbot kar na be tiparrai pizin.
13 Zin tikam koroŋ pakan ta tiurpe ma kembei mbalmbal ruŋgun na. Koroŋ tana ndabokbokŋan kat. Tipakapkap begen pa silba, mi rumun rumun pa gol.
Mi parei ta niom pakan kombombooreyom sorok raama zin sipsip men?”
14 Indeeŋe ta Anutu mbura keskeezeŋana iyangwiiri zin king ma tiko pirik na,
ikam ma ŋauŋau mi yaŋpat isu pa abal gabgapŋana Zalmon.

15 Niom abal bibip ki Basan, niom zoyomŋoyom mi bibip,
mi uteyom izalla ta kor a!
16 Kena parei ta motoyom mburmbur pa abal ta Anutu iroogo pa itunu mi ikam ma iwe lene na?
Abal tana, ta Yooba itunu muriini ko imbotmbot pa ma alok.

17 Merere izem abal Sinai,
mi iwwa raama karis kini malmal kan ta munŋaana ka tieene,
mi tila tipet muriini potomŋana Sion.
18 Mi iyaaru ka koi bizin boozo ta ilip pizin na,
ma tito i ma ziŋan tisala abal kini ta kor a.
Mi tomtom tikam koroŋ boozomen pini sorok.
Mi wal zorzooroŋan tilek kumbun pini, mi tikam le koroŋ tomini.
Tana zin tomini, ko ziŋan Yooba Anutu timbotmbot pa muriini tana. d 

19 Tapakur Merere!
Pa aigule ta boozomen, ni iuluulu iti mi ibadbaada pataŋana kiti.
Mi ni Anutu ta ikamkewe iti. e 
20 Anutu kiti, ni Anutu ta ikamkewe zin tomtom ma timbot ambai.
Merere kiti Yooba, ni itatkewe iti pa meeteŋana. f 
21 Anutu ko ipetepaala ka koi bizin uten.
Tana zin wal ta titoto zaala sananŋana na, ni ko ipun zin ma timap.

22 Merere iso ta kembei:
“Koyom koi bizin ta timbot lele Basan na, nio ko aŋkam zin ma timiili ma timar.
Mi zin ta timbot mozo lukutuunu na tomini, nio ko aŋkam zin ma tise.
23 Mi siŋin ko iwe kembei ta karoozo be kawwa la leleene.
Mi me tiom ko tiwin siŋin tana.”

24 O Anutu, nu ta king tio. Mi nu lip pa malmal kek.
Tana mar raama lelem ambai, mi lela urum ku potomŋana, be zin iwal biibi tire u.
Nu muuŋgu, mi wal ku tito u ma tilema.

25 Zin mboe kan timuuŋgu,
to zin tamuriŋ ta tiyelyel kakaaba na timbot lukutuunu,
mi zin kombom kan tipa kaimer.

26 Niom wal ki Anutu ta kulup yom su kereene uunu na, kapakuri pa kampeŋana kini.
Niom wal ta uunu tiom ipet pa Yakop na, kamap ma kiwit Yooba zaana!

27 Benyamen ta kaimerŋana na, wal kini timuuŋgu.
To zin peeze kan ki Yuda tila raama wal kizin.
Mi zin peeze kan ki Sebulun mi Naptali tito zin.

28 Anutu, nu ur sua pataaŋa kek ta kembei:
Niam ko amender mbolŋana.
Tana mbot lela urum ku potomŋana ta Yerusalem na,
mi swe mburom ma amre mini, kembei ta muŋgu kamam piam na.
Tonabe zin king lelen ambai pu, mi timar ma tikam lem koroŋ pakan.

30 Zin Aikuptu kan timbotmbot yok Nil kezeene kembei puge.
Mi zin karkari ta mburan bibip na, zin kembei makau uunuŋan ta ziŋan lutun bizin tiketkeete ma tiwwa.
Yaamba zin wal tana. Naso tilek kumbun pu, mi tikam lem pat silba pakan.
Zin wal ta lelen ilip pa mbulu ki malmal na, yaŋgwiiri zin ma timbot leŋaleŋa.
31 To biibi kizin Aikuptu ko iŋgo zin menderŋan kini ma timar Yerusalem.
Mi zin Etiopia kan ko timar mi tikam lem koroŋ ambaimbaiŋan pakan tomini.

32 Niom tomtom ta karao pa toono ta boozomen, kombo mboe pa Anutu.
Kombo mboe pini mi kapakuri.
33 Pa ni imbotmbot se miiri tieene, mi iwwa pa maŋaanaŋana ta muŋgu kat mi imar.
Keleŋ. Ni izzo sua raama mburaana biibi.
Kalŋaana na, kembei ta lele ikuruŋ i. g 
34 Tana kosoyaara Anutu mburaaana.
Pa ni king biibi ŋonoono, ta ikamam peeze pizin Israel,
mi izzwe mburaana sala maŋaanaŋana.
35 Anutu kizin Israel, ni imbotmbot lela urum kini potomŋana mi izzwe mburaana. Tabe tomtom tire mi timoto.
Mi ikamam mburaana pa wal kini mi ipombolmbol zin.
Tana tapakur Anutu pa kampeŋana kini! h 
Copyright information for `MNA