aYo 8:46, 15:25
bMt 25:31+
cTur 2:23
dMbo 90:9; Ro 1:18

Psalms 7

Mboe 7

Suŋŋana ki tomtom ta ka koi bizin tiŋgal sorok sua pini

Mboe ki Dabit Tomtom ta, ni zaana Kus mi uunu ipet la ki Benyamen. Iŋgal sorok sua pa Dabit, to Dabit itooro mboe tiŋgi.

O Yooba, Anutu tio, nio aŋpase pu be we ur pio mi menderkaala yo.
Uulu yo mi kamke yo pizin wal tau tiketoto yo i.
Pa nio leŋ tomtom sa som. Sombe nu uulu yo som, inako timaŋga pio,
mi titatutut yo kembei ta laion ma aŋsaana kat.

Yooba, Anutu tio, nio leŋ uunu sa isaana som. a 
Wal ta niamŋan ambuk sua be amlup yam ma amwe tamen na, aŋkam sanaana sa pizin som.
Mi koŋ koi bizin tomini. Aŋkam kuumbu pa koroŋ kizin sa som.
Mibe aŋkam mbulu sa ta kembei, na ambai be koŋ koi bizin tiketo yo mi tikis yo,
mi tipalkeete yo su toono.
Mi sombe tipasaana zoŋ ma aŋwe koroŋ sorok, ina indeeŋe men.

Yooba, maŋga mi swe ketem malmalŋana ku pa koŋ koi bizin.
Pa zin na, keten malmal kat pio.
Anutu tio, loŋa mar mi uulu yo.
Ur kadoono ndeeŋeŋana pa koŋ koi bizin.
Lup zin tomtom su kerem uunu,
mi mbulem su murim peeze kana ta imbot kor a,
mi ur kadoono pizin. b 
Yooba, nu itum ta tiiriŋana katuunu.
Tana tiiri yo mi so kat ta kembei: Nio leŋ uunu sa isaana som. Nio tomtom ndeeŋeŋoŋ.
Anutu, nu ndeeŋeŋom.
Mi nu ta tirtiiri karkari ta boozomen lelen ma ŋgar kizin, mi ute zin lup.
Yembut mbulu sananŋana kizin wal zorzooroŋan ma imap kat.
Mi zin wal ta tikamam mbulu ndeeŋeŋana na, pombol zin. c 

10 Anutu, ni iwe siŋgiao pio mi iporoukalkaala yo.
Mi ni iuluulu zin wal ta lelen ŋgeezeŋan.
11 Anutu, ni tiiriŋana katuunu ta ikamam mbulu ndeeŋeŋana men.
Aigule ta boozomen izzwe kete malmalŋana kini, mi iurur kadoono pizin wal sananŋan. d 
12 Tana zin sombe titooro lelen som,
na ni iurpe mburu kini malmal kana kek be ikam zaaba pizin.
Ni itwooro buza kini mata mbaaru,
mi ineene peene lutuunu ma kembei Amariŋ siŋiini,
mi iur ila palam be iser.

14 Wal sananŋan, zin kembei moori ta kopoono, mana kaimer ipeebe.
Pa ŋgar sananŋana ta imbotmbot la lelen na, itum ma iwe biibi,
to ipiyotyooto mbulu pakaamŋan boozomen ta ipasansaana zin tomtom. e 
15 Kere. Zin tikel naala mi tiŋgun kulumbo sula leleene be tikam zin tomtom.
Tamen zitun ko titop sula sumbuunu tana.
16 Tana pataŋana ta tiso tikam pa zin wal pakan, inako imiili pizin.
Mi zaaba ta tiso tikam pizin tomtom, inako imiili mini pa zitun.

17 Nio leleŋ ambai pa Yooba mi aŋpakuri pa mbulu kini ndeeŋeŋana.
Ko aŋbo mboe mi aŋwit Yooba ta Anutu kor kana kat zaana.
Copyright information for `MNA