aMbo 31:13; Mt 12:14
bMbo 78:4

Psalms 71

Mboe 71

Suŋŋana ki kolman ta urlaŋana kini imbol kat

Yooba, nio aŋpase pu be we ur pio mi menderkaala yo.
Kokena koŋ koi bizin tikoto yo, to koŋ miaŋ.
Nu ndeeŋeŋom. Tana uulu yo mi tatke yo pa pataŋana tio ti.
Ŋgun talŋom pio mi uulu yo.
We seraara pa koŋ koi bizin, mi poroukaala yo pizin.
We kembei siiri mbolŋana pio be aŋbotmbot lela totomen.
Pa nu lelem iur pataaŋa kek be kamke yo ma aŋbot ambai.
Tana nio ko aŋmama ku be menderkaala yo.
Anutu tio, tatke yo pa zin wal sananŋan naman.
Pa zin tipaŋobŋoobo pa zaala ku, mi timuŋai tomtom sa som. Kokena tikis yo, to tipasaana yo ma aŋsaana kat.

Yooba, Merere tio, nio aŋurur motoŋ pu be uulu yo.
Pa indeeŋe ta nio naŋgaŋŋoŋ mi imar na, aŋpase pa nu itum tamen.
Nu ta pazal zaala pio, mi anaŋ ikam yo ma aŋsu.
Mi indeeŋe ta anaŋ ikam yo ma aŋsu, mi imar imar indeeŋe koozi na, aŋpase pu. Pa nu ta pombolmbol yo mi motom pio.
Tana nio ko aŋbombo mboe mi aŋpakurkur zom totomen!
Zin iwal tikamam ŋgar boozo pio. Pa uraata bibip ta kamam pio, ina izzwe mburom pizin.
Nu ta we ur mbolŋana pio, mi menderkalkaala yo.
Tana leleŋ ambai kat pu, mi kwoŋ ipakurkuru. Pa nu zom biibi mi ndabokŋom kat.
Zoŋ ise ma ila zoŋ isula na, aŋwidit urum isala kor.

Tamen iŋgi aŋwe kolman kek, mi mburoŋ izzu.
Ziiri yo pa kerem uunu pepe, mi pizil ndemem pio pepe.
10 Pa koŋ koi bizin tiluplup zin mi timburmbuuru koŋ be tipun yo ma aŋmeete.
Mi tizaŋzaaŋa yo ma tizzo pio ta kembei: a 
11 “Aa, ni, Anutu ipizil ndemeene pini kek.
Tamaŋga mi takami.
Pa ni le tomtom sa be iuuli som.”

12 Tana Anutu, mbot molo pio pepe!
Anutu tio, loŋa mar mi uulu yo.
13 Zin wal ta tiŋgalŋgal sorok sua pio na, pamiaŋ zin mi pun zin ma timap.
Zin wal ta tisombe tipasaana yo na,
koto zin mi pamiaŋ zin kat.

14 Mi nio, nako aŋurur motoŋ pu mi aŋzza u be uulu yo.
Mi ko aŋwidit urum totomen.
15 Kwoŋ ko izzoyaryaara mbulu ku ndeeŋeŋana pizin tomtom.
Zoŋ ise ma ila zoŋ isula, nako aŋzzo pa uraata bibip ta nu kamam pizin tomtom be uulu zin na.
Uraata ku tana, sombe aŋtoombo be aŋnin, na aŋrao som.
16 Yooba, nu kamam uraata bibip mi mburanŋan. Tana aŋwe kwom mi aŋsoyaara uraata ku tana pizin tomtom bekena matan iŋgal.
Nio leleŋ be aŋzzo sua pa mbulu ku ndeeŋeŋana men.

17 Indeeŋe ta nio naŋgaŋŋoŋ, mi imar indeeŋe koozi na, nu zzo yo pa mbulu ku.
Tana aŋzzoyaryaara sua pa uraata ku bibip ta ipa ndel kat.
18 O Anutu, iŋgi aŋwe kolman ma momo isala uteŋ kek.
Mi pizil ndemem pio pepe!
Mbotmbot raama yo ma irao aŋsoyaara mburom mi uraata ku bibip pizin popoŋana tiam tabe tipet pa kaimer i. b 
19 Anutu, mbulu ku ndeeŋeŋana, ina ilip kat. Isala ma isala ta saamba a.
Mi uraata ku ta kembena. Bibip mi mburanŋan.
Tana nu kadom sa som. Som kat.

20 Ŋonoono, nu kam yam Israel ma amre pataŋana boozomen, mi seeze motoyam.
Tamen nu ko kam yam ma ambot ambai mini.
Iŋgi ambot naala kezeene i.
Tamen nu ko tatke yam pa meeteŋana.
21 Mi nio ta kembena. Nu ko pakur yo ma zoŋ iwe biibi mini.
Mi potor leleŋ, mi kam ma leleŋ ambai.

22 Tonabe aŋse kombom mi aŋpakur zom.
Pa nu toto sua ku mbukŋana.
Anutu tio, nu Anutu potomŋana kizin Israel. Mbulu ku ipa ndel kat.
Tana nio ko aŋse kombom tio mi aŋbo mboe be aŋwit zom.
23 Ko kalŋoŋ isala mi aŋbo mboe pakurŋana pu raama menmeen yo biibi.
Leleŋ ko imap ipakuru. Pa nu ta kamke yo.
24 Tana aigule ta boozomen, zoŋ ise ma ila zoŋ isula na, nio ko aŋzzoyaryaara mbulu ku ndeeŋeŋana ta kamam pizin tomtom na.
Pa zin wal ta tisombe tipasaana yo na,
nu koto zin ma mburan imap, mi pimiili zin ma tila raama kan miaŋ.
Copyright information for `MNA