aMt 25:31+
bLu 2:14
cMt 2:11; Ro 14:11; Pil 2:9+
dUn 12:3; 2Pe 3:18

Psalms 72

Mboe 72

Zin Israel tisuŋ Anutu be ipombol king kizin

Mboe ki Salumo

Anutu, pombol king tiam be imender pizin tomtom mi iurpe kat pataŋana kizin.
Mi paute i pa mbulu ku ndeeŋeŋana.
Sombe ikam peeze pizin wal ku, na uuli be ikam ma indeeŋe men.
Mi pomboli be imender pizin wal ku ta timbot ŋoobo i, mi iurpe pataŋana kizin.
Pa mbulu kini ndeeŋeŋana, ta ko iwe zaala pa lele ti be imbot ambai,
mi ipiyooto mbulu luumuŋana.
King tiam ko imender pizin wal sorrokŋan, mi iporou pizin.
Mi zin wal ta timbot ŋoobo na, ni ko iuulu zin.
Tamen zin wal ta tikototo zin sorrokŋan mi tikamam pataŋana pizin na, ni ko ikoto zin, mi iparamutmut zin ma mburan imap kat. a 

Pombol king tiam be imbotmbot ambai men,
mi iseeŋge iseeŋge ma ila, kembei ta zoŋ ma puulu i.
Mi uuli be ikam kat peeze.
Naso iuulu zin tomtom kembei yaŋ ta izzu pa mokleene mi ipembesmbeeze toono na.
Mazwaana ta so ni ikamam peeze na, piyotyooto mbulu ndeeŋeŋana ma izze ma iwe biibi.
Mi kam mbulu luumuŋana ma izze raama. Naso tomtom timbot ambai men, mi iseeŋge iseeŋge ma ila, kembei ta puulu i. b 

King tiam ko ikam peeze pa lele ta biibi kat. Ka seŋgaaŋa su tai pakaana ta, mi ila ila ma imap su tai pakaana toro.
Ko imaŋga su yok Euprates, mi ila ila ma irao toono ta boozomen.
Ni ko ilip pa ka koi bizin. Tana zin ko timar mi tilek kumbun pini,
mi timbilmbil su kereene uunu be leleene isaana pizin mi imuŋai zin.
10 Zin king ki Tarsis ziŋan zin king ta timbot irao mutumutu ta boozomen, nako timar mi tikam le koroŋ ambaimbaiŋan pakan bekena tipakuri.
Mi zin king ta timborro lele pakaana ki Sieba mi Seba na, zin tomini ko timar mi tikam koroŋ ambaimbaiŋan pini. Pa zin ko timbot la ni kopo mbarmaana tau.
11 Tana king ta munŋaana men ko tilek kumbun pini.
Mi karkari ta boozomen ko timbesmbeeze pini. c 

12 Pa zin wal ta len koroŋ som, mi zin wal sorrokŋan ta timbot ŋoobo mi len ulaaŋa sa som na, sombe titaŋroro i,
na ni ko iuulu zin mi itatke zin pa pataŋana kizin.
13 Zin wal tau len mburan biibi som, mi zin wal ta timbot ŋoobo mi tiru zalan na,
ni ko leleene isaana pizin mi ikamke zin pa pataŋana kizin.
14 Tana sombe wal pakan tiurur pataŋana pizin mi tiseseeze matan, na ni ko imender pizin mi itatke zin la wal tana naman.
Pa ni ko iur leleene pizin kembei toŋmatiziŋ kini ŋonoono. Tana irao igeede zin mi siŋin ireere sorok na som.

15 Anutu ko ipombol king tiam be imbotmbot ma molo.
Mi zin wal ki lele pakaana ki Sieba ko tikam le pat gol ta milmilŋana ma iŋgeeze kat.
Mi aigule ta boozomen, zoŋ ise ma ila zoŋ isula na, wal kini ko tizuŋzuŋ Anutu be ipomboli,
mibe ikampe i ma imbotmbot ambai men.
16 Mai ambaiŋana ko ipet pa toono tiam.
Ko ipet pa mokleene ta imbot sala abal uteene na tomini.
Mi toono mbuyeene ko kembei ta abal Lebanon, mi ikam ma kini ambaimbaiŋan boozo ipet.
Mi tomtom ta kembena. Kar ta boozomen ko timasak ma kan tomtom bizin tiwe boozomen
kembei ta mbutmbuutu izaara ma ilol toono.
17 King zaana biibi ko imbotmbot ma alok, kembei ta zoŋ i!
Tomtom ko tiwidit uruunu, mi iseeŋge iseeŋge ma ila.
Pa ni ta ko iwe zaala pa wal ta munŋaana men be kampeŋana ki Anutu ise kizin.
Tana zin karkari ta boozomen ko tire kampeŋana ki Anutu ta imbotmbot se kini na, mi tipakurkuri. d 

18 Tapakur Yooba! Ni Anutu kizin Israel!
Pa ni itutamen ta ikamam uraata bibip ta ipa ndel kat.
19 Tapakurkuri totomen! Pa ni zaana biibi mi mburaanaŋana.
Ni ko iswe mbulu kini ndabokŋana mi zaana biibi ma irao toono ta boozomen.
Ŋonoono ma ŋonoono kat!

20 Suŋŋana ki Dabit ta Yesi lutuunu i, ta imar imap su ti.
Copyright information for `MNA