aMbo 43:2, 95:7, 100:3
bKam 15:16; 1Kor 6:20
cKam 14:21; Mbo 89:9+
dKam 17:6; Mbo 107:33+
eUn 1:14
fUn 8:22; Ŋgo 17:26

Psalms 74

Mboe 74

Zin Israel titaŋroro Anutu pa urum kizin ta kan koi bizin tireege ma isu lene

Mboe ki Asap

O Anutu, parei ta nu pizil kat ndemem piam? Ko ambotmbot ta kembei ma alok?
Niam sipsip ku, mi nu ta mboroŋan tiam. Parei ta ketem malmal kat piam ta kembei? a 

Niam wal ta ambot lela lupŋana ku leleene na, wal ku ŋonoono.
Pa muŋgu kat nu tatke tumbuyam bizin pa pataŋana kizin, mi kam zin ma tiwe lem.
Tana motom iŋgal yam tomini. Mi motom ŋgal abal Sion.
Pa ina, nu kam ma iwe itum murim be mbotmbot pa. b 

Itum mar mi re lele ku ta isaana ma imbotmbot i.
Koyam koi bizin tireege urum ku potomŋana ma isu lene, mi tipasaana lup.
Lele ta muŋgu nu itiŋan taparluplup ti su pa i, ina kom koi bizin tikam ma iwe len.
Mi kalŋan izalla, mi tipamender koroŋ kizin lela ma iwe kilalan kembei tilip piam kek.
Mi tikam mbulu kembei zin wal ta tikam nakabasi kizin
ma tila su be tikas ke.
Pa ke ndabokbokŋan boozomen ta tisap koroŋ kunun ila be tipeŋgeeze urum ku na,
tikam nakabasi mi tipetekatkat ma tisaana lup.
Mi tiur you pa urum ku, mi ikan ma imap.
Tana itum murim ta zom imbotmbot pa na, tipasaana ma isaana kat.
Mi tisombe tikoto yam mi tipasaana kat yam.
Tana lele boozomen ki toono ti ta amluplup yam su pa i be amzuŋzuŋ pu na, tiur you pa, mi ikan zin ma timap.
Mi iŋgi amre kilalan sa kembei nu mbotmbot raama yam men i na som.
Mi kwom sa imbot be iso yam pa ŋgar ku na som.
Mi tomtom tiam sa iute som. Ko pataŋana ti imap ŋiizi?

10 Anutu, iŋgi kom koi bizin tikamam seŋge pu, mi tirepilpiilu, mi tipasomsom zom.
Parei, ko zem zin ma tinoknok ta kembei ma alok?
11 Parei ta nu lul nomom, mi gedgeede yam men?
Maŋga mi pun zin ma timap!

12 Anutu, ta muŋgu mi imar na, nu ta king tiam mi ulaaŋa tiam.
Mi nu kamam uraata bibip isu toono ti bekena uulu yam.
13 Itum mburom ta ipun tai ma tai mburaana imap. Mi Lebiatan itunu ta koroŋ sananŋana ŋonoono mi imbotmbot tai na, nu petepaala uteene ta boozomen,
mi kam pizin buzur saŋsaŋŋan ta timbot lele bilimŋana na ma tikan. c 
15 Lele pakan na, nu kam ma yok bukbuk ma ise pa toono, mi ireere ma iwe yok.
Mi lele pakan na, nu kam yok bibip ma timakmaaga. d 
16 Nu ta mborro aigule mi mbeŋ tomini.
Mi nu ta ur zoŋ mi puulu ma timbotmbot la murin. e 
17 Nu ur toono ka seŋgaaŋa,
mi ur gorgor ki re mi iwaara. f 

18 Yooba, motom iŋgal sua repiiliŋana ta kom koi bizin tikamam pu na.
Iŋgi wal kankaanaŋan tizorzooru mi tipasansaana zom.
19 Mi niam ta wal ku na, mburoyam biibi som. Tana itum poroukaala yam.
Kokena koyam koi bizin timaŋga piam mi tipasaana yam.
Iŋgi ambot ŋoobo kat. Kokena motom mbeleele kat yam.
20 Motom iŋgal sua mbukŋana ta kam piam wal ku na, mi uulu yam.
Re. Iŋgi wal sananŋan tikewe la zugut, mi tikamam malmal mi zigzik ma irao toono ti.
21 Mi koyam koi bizin tikototo yam. Tana uulu yam: Kokena amur sorok motoyam pu, to koyam miaŋ.
Uulu zin sorrokŋan mi zin wal ta timbot ŋoobo na. Naso timaŋga mi tipakur zom.
22 Anutu, maŋga mi swe mburom. Poroukaala yam. Pa niam wal ku tau.
Motom iŋgalŋgal mbulu ki kom koi bizin, mi ur kadoono pizin. Pa kalŋan izalla mi tiwirri sua boozo pu.
Iŋgi wal kankaanaŋan tizorzooru mi tikamam sua repiiliŋana pu pa berek ma ila mbeŋ.
Tana maane pizin pepe.
Copyright information for `MNA