aMbo 147:6; Lu 1:52; Tur 18:7+
bTur 14:10, 16:19

Psalms 75

Mboe 75

Anutu ko iur kadoono pizin tomtom

Mboe ki Asap Ka ŋger: Pasaana pepe

Anutu, niam leleyam ambai pu mi ampakurkur zom.
Amwidit urum paso, nu mbotmbot kolouŋana piam.
Tanata amzzoyaryaara uraata ku bibip ta ndabokbokŋan mi ipa ndel kat.

Mi Anutu iso ta kembei: “Nio ituŋ aŋur nol tabe aŋpamender zin tomtom pa i.
Mi sombe aŋur kadoono pizin, nako aŋkam ma indeeŋe men.
Sombe toono imurur mi ka tomtom bizin ta boozomen tiseŋeeŋe,
na nio ta ko aŋkis toono uunu ma imbol.
Zin wal ta tipakurkur zitun na, nio aŋso pizin ta kembei: ‘Kapakur ituyom irao!’
Mi zin wal sananŋan na, aŋso pizin ta kembei: ‘Niyom izze sorok mi kapase pa ituyom mburoyom pepe!
Pa mburoyom biibi iŋgoi? Tana kapakur yom pepe,
mi kipiri sua repiiliŋana pepe!” ’

Pa pakurŋana imar pa zoŋ uunu som,
imar pa lele ta zoŋ isula na som,
imar pa lele toro sa som.
Imar pa Anutu itutamen tau. Pa ni ta tiiriŋana katuunu.
Wal pakan, ni ikototo zin. Mi wal pakan na, ni ipakurkur zin. Itoto itunu leleene tau. a 
Ŋonoono kat. Mbooro ta imbot la Yooba namaana kek.
Mi mbooro tana na, bok pa kete malmalŋana kini.
Ni ko ipiwin wal sananŋan boozomen ta timbotmbot toono na, mi tiwin ma imap.
Tuturaana sa ko irao imbot na som. b 

Mi nio, nako aŋzzoyaryaara uraata bibip mi ndabokbokŋan ki Yooba ma alok.
Ko aŋbombo mboe mi aŋpakurkur Anutu ki Yakop zaana.

10 Pa ni iso ta kembei: “Wal sananŋan na, nio ko aŋpunmeete mburan.
Mi wal ndeeŋeŋan na, nio ko aŋpombol zin ma mburan izze, mi aŋpakur zin.
Copyright information for `MNA