aKam 15:11
bKam 6:6
cKam 14:21
dKam 14:22

Psalms 77

Mboe 77

Suŋŋana ki tomtom ta iyamaana kembei Anutu ipizil ndemeene pizin Israel kek

Mboe ki Asap

Nio aŋtaŋroro Anutu be iuulu yo.
Kalŋoŋ isala, mi aŋsuŋi be iŋgun talŋaana pa suŋŋana tio.
Pa iŋgi aŋbot pataŋana biibi leleene. Tana aŋkam kinkiini be aŋute ŋgar ki Merere.
Mbeŋ ma aigule na, aŋwidit nomoŋ izalla mi aŋzuŋzuŋ pini.
Tamen Anutu ikam mbulu sa be ipotor leleŋ na som.
Nio motoŋ iŋgalŋgal Anutu na, leleŋ itaŋtaŋ.
Mi aŋkamam ŋgar boozo, tabe leleŋ ipata ma mburoŋ imap.
Mbeŋ na, aŋkennekaala motoŋ risa som.
Mi leleŋ ipata kat ma irao aŋso sua som.
Pa ŋgar tio imilmiili pa mbulu ta muŋgu Anutu ikamam pa wal kini na.
Motoŋ lala pa ndaama ndaama ta ni iuluulu zin.
Tana mbeŋ na, aŋbombo mboe,
mi aŋkamam ŋgar la leleŋ mi aŋrru pataŋana taiŋgi ka uunu.

Parei, ko Merere ipizil ndemeene piam, mi ambotmbot ta kembei ma alok?
Irao leleene imiili piam mini som?
Mbulu kini ta itoto sua kini mbukŋana mi iurur leleene pa wal kini na, imap kek?
Sua ta muŋgu imbuk piam na, ko itop ma iwe koroŋ sorok?
Parei, iŋgi Anutu mataana mbeleele kampeŋana kini,
mi kete malmalŋana kini iyembut muŋaiŋana kini?

10 Tana aŋso pa ituŋ ma aŋso: “Iŋgi Anutu itooro ŋgar kini kek, tanata mburaana iporoukalkaala yam mini som.”
Uunu tiŋgi tabe ikam ma leleŋ ipata kat.

11 Pa Yooba, nio motoŋ iŋgalŋgal uraata ku.
Motoŋ imilmiili pa mos bibip ta muŋgu nu tortooro na.
12 Nio aŋkamam ŋgar pa uraata ku ta boozomen,
mi motoŋ lala pa mos mburanŋan ta muŋgu kamam na.
13 O Anutu, nu kamam mbulu potomŋana men. Mbulu ku ipa ndel kat.
Mi Anutu toro sa zaana biibi kembei ta nu na som. a 
14 Nu Anutu ta tortooro mos bibip.
Nu zzwe mburom pizin karkari ma tire kat.
15 Zin wal ku ta Yakop mi Yosep popoŋana kizin na,
itum mburom, ta itatke zin pa pataŋana kizin. b 

16 O Anutu, indeeŋe ta yok bibip tire u na,
motoŋana ikam zin.
Mi tai ta imbot sula kat ta maaŋga na, imoto tomini.
Tabe ikam uraata ma ka mbelut ise. c 
17 Mi lele igabgap, mi iswiri yaŋ isu toono.
Mi lele ikuruŋruŋ, mi ikimitmit,
mi lolo niini iwenweene ma imiyaryaara.
18 Nu kam ma miiri napiu itoogo, mi lele ikuruŋ ma kalŋaana biibi,
mi lele ikimitmit ma ka azuŋka iyaara pa toono.
Mi nu toktok toono ma ilala imarmar.
19 Mi zaala ku ipa tai leleene.
Tai ta mburaana biibi na, nu peete, mi imet ma iwe ru.
Mi pa ma la na, tomtom sa ire kumbum muriini som. d 
20 Mi nu muŋmuuŋgu pa wal ku kembei ta mboroŋan kizin sipsip.
Mi ur Mose ziru Aron ma tikam ruŋgum, mi tiyaaru zin Israel ma tila.
Copyright information for `MNA