Psalms 79

Mboe 79

Tiŋiizi kizin Israel ila ki Merere pa Yerusalem reegeŋana

Mboe ki Asap

O Anutu, iŋgi zin karkari timar toono ku taiŋgi, mi tipasaana wal ku.
Mi tipasaana urum ku potomŋana ma isaana kat pa motom,
mi tiyasureege kar Yerusalem ma borok su lene.
Mi tipun zin mbesooŋo ku ma timetmeete, mi tizem zin uri tana ma timbotmbot sorok,
bekena tiwe man kan buzur.
Tana wal ku ta tiurur lelen pu mi titoto mbulu ku, ta tiwe koroŋ saŋsaŋŋan kan buzur be tikan.
Koyam koi bizin tikas yam ma siŋ tiam ireere kembei ta yok ma irao pa Yerusalem.
Mi tomtom sa imbot be itwi zin uri tana na som.
Tana zin karkari ta timbot kolouŋana piam na, tire yam mi tirepilpiili yam.
Mi tikamam ŋeu piam, mi tizeŋzeeŋge piam, mi kwon pasomsom yam.

O Yooba, parei? Ko ketem malmalŋana ku imbotmbot se tiam ta kembei ma alok?
Ko motom mburmbur men, mi lelem ibayou kembei ta you, mi iseeŋge iseeŋge ma ila?

Liŋ ketem malmalŋana ku ma isalakaala zin karkari ta tiute u som na.
Zin wal ta timbesmbeeze pu som na, ur kadoono pizin.
Pa niam ta wal ku na, zin tipambiriizi yam ma amap.
Mi tipasaana toono tiam taiŋgi ma koroŋ sa imbot ambai mini som.

Sanaana ta niamŋan tumbuyam bizin amkamam na, motom iŋgalŋgal pepe. Mi ka kadoono ise tiam pepe.
Lelem isaana piam, mi loŋa mar mi uulu yam.
Pa iŋgi amsaana kat.
Anutu, nu ta tuyam ŋonoono. Uulu yam lak!
Naso zom iwe biibi.
Yooba, tatke yam pa pataŋana taiŋgi mi reege sanaana tiam.
Pa nu zom biibi pa mbulu ta kembei.
10 Tana uulu yam: Kokena zin karkari tikam sua repiiliŋana piam ma tisombe:
“Aa, Anutu tiom mburaana iŋgoi?”
Anutu, zin karkari ta tikazas sorok zin mbesooŋo ku ma siŋ kizin ireere na, leleyam be pokot mbulu kizin tana ma amre kat pa motoyam.
Naso zin tiute ta kembei: Nu urur kadoono pa mbulu sananŋan.

11 Ŋgun talŋom pa tiŋiizi kizin wal ku ta tikoki zin ma timbot la kan koi bizin naman na.
Nu mburom biibi.
Tana swe mburom tana, mi kamke zin wal ku ta kan koi bizin tisombe tipun zin ma timetmeete na.
12 O Merere, sua repiiliŋana ta zin karkari tiwirri pu na,
pokot ma imiili pizin pa lamata mi ru.
13 Naso niam wal ku leleyam ambai,
mi ampakurkur zom mi amwidit mbol pa uraata ku, mi iseeŋge iseeŋge ma ila.
Pa niam sipsip ku, mi nu ta mboroŋan tiam ŋonoono.
Copyright information for `MNA