aKam 15:17; Mt 21:33+; Ŋgo 7:45

Psalms 80

Mboe 80

Zin Israel tisuŋ Merere be iuulu zin ma timbot ambai mini

Mboe ki Asap

O mboroŋan tiam Israel, ŋgun talŋom pa suŋŋana tiam.
Pa niam popoŋana ki Yakop, ta sipsip ku, mi nu ta muŋmuuŋgu piam.
Nu mbotmbot se murim peeze kana ta imbot la zin aŋela mbolŋan ndemen na.
Maŋga mi swe itum ramaki mburom mi azuŋka ku pa zin wal ki Eparaim mi Benyamen mi Manase.
Mar mi uulu yam.

O Anutu, nu mburom keskeezeŋom, Uulu yam ma ambot ambai mini.
Swe itum ramaki kampeŋana ku piam, mi kam mat ku ma iyaara piam. Kamke yam.

O Yooba, Anutu tiam. Nu mburom keskeezeŋom.
Mi iŋgi ketem malmal piam wal ku, tana leŋleŋ suŋŋana tiam mini som. Ŋiizi na ketem malmalŋana ku imap?
Nu kamam pataŋana ramaki tiŋiizi ma iwe koyam kini.
Mi motoyam luluunu isula mbooro biibi ma iwe koyam yok.
Pa iŋgi nu pizil ndemem piam. Tana zin karkari ta timbot kolouŋana na, tiserseere be tikam toono tiam.
Mi koyam koi bizin ta boozomen tikamam seŋge piam.

O Anutu, nu mburom keskeezeŋom. Uulu yam ma ambot ambai mini.
Swe itum ramaki kampeŋana ku piam, mi kam mat ku ma iyaara piam. Kamke yam.

Muŋgu ke baen ta imbot toono kizin Aikuptu. Mi nu puru, mi kam ma imar lele tiŋgi,
to ziiri lele tiŋgi ka tomtom bizin ma tiko papirik, mi paaza ke baen tana su toono kizin. a 
Mi nu laama ke uunu, bekena indom ma ise ambai.
Tana uranuran ikeraama sula kat, mi namannaman irao pa toono biibi ti.
10 Ke baen ku tana isala ma isala kat, ma ilip pizin abal mi iur nerekou pizin.
Mi ke bibip pakan timbot la kopo mbarmaana tomini.
11 Namannaman pakan tiyaara ma tila pa tai biibi ta imbot lele ta zoŋ izulla pa na.
Mi namannaman pakan tiyaara ma tila pa yok biibi Euprates ta imbot zoŋ uunu na.

12 Mi iŋgi parei ta nu reege siiri ta muŋgu iliu baen lene ku?
Re. Zin tomtom ta tiwwa len sorok na, tikemem baen ku ŋonon.
13 Mi ŋge saŋsaŋŋan tisuzus uranuran,
mi buzur saŋsaŋŋan tikanan ŋonon mi tipasansaana.

14 O Anutu, nu mburom keskeezeŋom mi mbotmbot ta saamba a.
Motom miili piam.
Mar mi urpe ke baen ku ma imbot ambai mini.
15 Pa ke baen tiŋgi na, itum nomom woono ta ipaaza.
Mi nu mboro i ma iwe biibi, bekena ipiyooto kom ŋonoono ambaimbaiŋan.
16 Re. Iŋgi kom koi bizin titaara ke baen ku, mi tiur you pa.
Tana ketem malmal pizin, mi pambiriizi zin ma tila len!

17 Mi mbesooŋo ku ta imbot la nomom woono na, kiskisi.
King tiam ta itum roogi mi uri pa uraata na, motom pini mi pomboli ma iwe biibi.
18 Tona niam ko ampizil ndemeyam pu mini som. Som ma som kat.
Tana uulu yam be ambot ambai mini, mi niam ko ambesmbeeze pu mi ampakurkur zom.

19 O Anutu, nu mburom keskeezeŋom. Uulu yam ma ambot ambai mini.
Swe itum ramaki kampeŋana ku piam, mi kam mat ku ma iyaara piam. Kamke yam.
Copyright information for `MNA