aMbo 2:1

Psalms 83

Mboe 83

Zin Israel tisuŋ Merere be ikoto kan koi bizin

Mboe ki Asap

O Anutu, kwom imun paso?
Ur nim mi maane pepe!

Re. Kom koi bizin kalŋan izalla mi tikam kumbun pa malmal.
Zin wal ta tiurur koi pu na, nin se ma tiso tilip pu kek. a 
Mi wal ku ta nu lelem pizin ilip na,
kom koi bizin timburmbuuru pizin mi timbuk kan kiizi.
Mi tisombe: “Ou, kamaŋga ma tala takas zin Israel ma timap kat.
Naso toono kizin imbot sorok mi zan imap.”

Ŋonoono kat. Kom koi bizin tilup lelen mi ŋgar kizin ma iwe tamen,
mi tiparmbuk sua pizin be tikam malmal pu. Zin wal ta kembei:
Zin wal ki lele pakaana ki Edom ziŋan Ismael popoŋana kini,
mi zin wal ki lele pakaana ki Moap ziŋan zin Agri,
mi zin wal ki lele pakaana ki Gebal ziŋan zin Amon mi Amalek,
mi zin Pilistia kan mi kar Tiro kan.
Mi zin Asiria kan timbuk sua be tilae kizin Amon mi Moap ta Lot popoŋana kini na,
mi tiuulu zin pa malmal tomini.

Tana amsuŋu be kam mbulu pizin wal tana raraate kembei ta muŋgu kam pa zin wal ki Midian na,
mi kembei ta muŋgu kam pa Sisera ziru Yabin su yok Kison na.
10 Nu kas zin su kar Endor,
mi uri kizin timbot sorok su toono kembei ta te ma tibuuzu.
11 Tana zin bibip ki koyam koi bizin na, kam mbulu pizin raraate kembei ta muŋgu kam pa Oreb ziru Zeeb na.
Mi zin peeze kan kizin ta kembena. Koto zin kembei ta kam pa Zeba ziru Zalmuna na.
12 Wal ru tana, muŋgu tiso ta kembei: “Aa, tala takam malmal pa Anutu wal kini. Naso takam toono kizin ma iwe lende.
Pa ina lele mbutmbuutuŋana ta ambai be zin sipsip timbot pa.”

13 Anutu tio, palamuuzu zin ma tiwe kembei ta ululu.
Kam zin ma tiwe kembei koroŋ gubungubun ta miiri iwilaala ma ila ne lup.
14 Pasaana zin kembei ta you ikanan rie,
mi kembei ta you bilbilŋana ikanan su ta imbot sala abal na.
15 Pei miiri biibi ramaki yaŋ be iketo zin.
Mi kam miiri napiu tomini ma pamoto zin pa.
16 O Yooba, koto kat zin. Naso kan miaŋ biibi,
mi tikilaalu kembei nu zom biibi.
17 Koto zin mi pamiaŋ kat zin. Naso timoto kan, mi timbotmbot ta kembei ma alok.
Kam zin ma tiru zalan. Mi pambiriizi zin ma timap kat.
18 Naso tikilaala ta kembei: Yooba, nu itum tamen ta biibi ŋonoono.
Nu Anutu kor kana kat ta mborro koroŋ ta boozomen.
Copyright information for `MNA