aYo 14:27; Ro 5:1; 2Tes 3:16
bMbo 89:14; Ro 3:26
cMbo 67:6; Yems 1:17

Psalms 85

Mboe 85

Anutu wal kini tisuŋi be iuulu zin ma timbot ambai mini

Mboe kizin Kora

O Yooba, muŋgu nu muŋai toono ku.
Pa indeeŋe ta pataŋana ikam yam wal ta popoŋana ki Yakop na, nu uulu yam ma ambot ambai mini.
Mi indeeŋe wal ku tipaŋoobo pa zaala ku na, nu reege sanaana kizin.
Mbulu kizin ta boozomen ta irao pa nu motom som na, nu mus ma ila ne.
Tana nu yaramraama ketem malmalŋana ku,
mi kototo lelem bayouŋana.

Mi iŋgi amsuŋu mini. Anutu, ulaaŋa tiam, motom miili piam.
Ketem malmal piam mini pepe.
Parei, ko ketem malmalŋana ku izze tiam ma alok?
Ko kiskis men ta kembei, mi iseeŋge iseeŋge ma ila?
Motom miili piam. Pa niam wal ku tau. Uulu yam be ambot ambai mini.
Naso leleyam ambai pu mi amwidit urum.
O Yooba, mbulu ku ta toto sua ku mbukŋana mi urur lelem pa wal ku na, swe ma amre mini.
Kamke yam ma ambot ambai.

Nio ko aŋgun talŋoŋ pa sua tabe Anutu iso i.
Pa Yooba ko ikam sua luumuŋana piti ta kembei:
Zin wal ta so tiurur lelen pini mi titoto mbulu kini na, ni ko iuulu zin ma timbot ambai mini.
Mi kozo tire zin: Kokena timiili mini pa mbulu kankaanaŋana. a 
Ŋonoono kat. Zin wal ta timototo Anutu mi tileŋleŋ la kalŋaana na, ni imbotmbot raama zin mi iuluulu zin.
Pa ina zaala tabe ni iswe mburaana mi mbulu kini ndabokŋana ma ipet mat isu toono taiŋgi.

10 Mbulu ki Anutu ta iurur leleene pa wal kini, ina igabgaaba mbulu kini ta itoto sua kini.
Mi mbulu kini ndeeŋeŋana mi mbulu kini luumuŋana ta kembena. Tilup ma tiwe tamen. b 
11 Mbulu ki tozzo sua ŋonoono men mi tototo sua kiti, ta iwedet pa toono.
Mi mbulu ndeeŋeŋana ta izzu pa kar saamba. Mi ziru tiparlup zin ma tiwe tamen.

12 Ŋonoono kat. Yooba ko ikampe yam pa koroŋ ambaimbaiŋan.
Ni ko ikam ma mai ambaiŋana ipet pa toono tiam. c 
13 Mi mbulu ndeeŋeŋana, ta ko imuuŋgu pini
mi iurpe zaala pini be imar.
Copyright information for `MNA