aKam 34:6; Yona 4:2
bKam 8:10, 15:11
cTur 15:4
dKam 33:13; Mbo 25:5; Yer 32:39
eKam 34:6

Psalms 86

Mboe 86

Merere, kamke yo mi paute yo pa zaala ku

Mboe ki Dabit

O Yooba, ŋgun talŋom pio. Leŋ suŋŋana tio ti mi uulu yo.
Pa iŋgi aŋbotmbot raama pataŋana mi aŋrru zaala.
Nu ta Anutu tio. Mi nio mbesooŋo ku mi aŋpase pu.
Tana poroukaala yo mi kamke yo: Kokena aŋmeete.
Pa nio aŋurur leleŋ pu mi aŋtoto mbulu ku.
Merere tio, muŋai yo lak!
Pa aigule ta boozomen, zoŋ ise ma ila zoŋ isula na, aŋtaŋroro u.
Merere, nio mbesooŋo ku. Uulu yo. Naso kam ma leleŋ ambai mi menmeen yo.
Pa iŋgi suŋŋana tio imama ku raama leleŋ.
Merere, nu ambaiŋom kat. Nu rekreege sanaana kizin tomtom,
mi toto sua ku mbukŋana, mi urur kat lelem pa zin wal ta titaŋroro u na. a 

O Yooba, ŋgun talŋom pa suŋŋana tio.
Leŋ tiŋiizi tio ti mi muŋai yo. Pa nio mbesooŋo ku tau.
Nio sombe pataŋana indeeŋe yo, nako aŋtaŋroro u.
Pa nu leŋleŋ suŋŋana tio mi uluulu yo.

Merere tio, nu itum tamen ta Anutu ŋonoono. Anutu toro sa kembei ta nu na som.
Pa uraata ku ilip kat. Tana kadom sa som. b 
Merere tio, nu ur tomtom ta munŋaana men ma timbot pa lele kizin kizin.
Karkari ta boozomen ko timar be tilek kumbun pu mi tipakur zom. c 
10 Pa nu ta biibi ŋonoono. Mi nu kamam uraata mburanŋan ta ipa ndel kat.
Tana nu itum tamen ta Anutu ŋonoono.

11 O Yooba, paute yo pa zaala ku.
Naso aŋpa pai tio ma indeeŋe men pa sua ku ŋonoono.
Mi kam ma aŋur kat leleŋ pu. Naso aŋmototo u mi aŋleŋleŋ la kalŋom. d 

12 Merere, nu Anutu tio.
Nio ko leleŋ ambai pu mi aŋur kat leleŋ pu,
mi aŋpakurkur zom ma alok.
13 Pa nu toto sua ku mbukŋana mi urur kat lelem pio.
Muŋgu aŋbot la naala kezeene. Tamen nu tatke yo pa pataŋana tana, tabe aŋmeete som.

14 O Anutu, re. Iŋgi zin wal sananŋan timaŋga be tikam malmal pio mi tikoto yo.
Wal zigzikŋan tilup zin, mi tisombe tipun yo ma aŋmeete.
Wal tana timuŋai tomtom sa som, mi tikam ŋgar pu risa som.

15 Tamen Merere, nu lelem izanzaana pizin mbesooŋo ku, mi muŋaiŋai zin mi kampewe zin.
Mi ketem malmal karau som, mi toto sua ku mbukŋana mi urur kat lelem pa wal ku. e 

16 Tana motom miili pio mi muŋai yo.
Pombol yo mi kamke yo. Pa nio mbesooŋo ku tau.
Aŋbesmbeeze pu kembei ta muŋgu naŋgoŋ ikamam na.
17 Tana Yooba, kam mbulu sa tabe iswe kembei kampeŋana ku imbotmbot men se tio.
Uulu yo mi potor leleŋ.
Naso koŋ koi bizin tire mi kan miaŋ.
Copyright information for `MNA