aRo 11:33; Tur 15:3
bMbo 1:3; 52:8
cYo 15:5

Psalms 92

Mboe 92

Aigule potomŋana ka mboe

Mboe ta timbombo pa aigule tabe ketende su pa i

O Yooba, nu Anutu kor kana kat.
Nio sombe aŋpakuru mi aŋbo mboe be aŋwit zom isala kor, ina indeeŋe men.
Tana aigule ta boozomen, zoŋ ise ma ila mbeŋ na,
aŋzzoyaryaara mbulu ku ta toto sua ku mbukŋana, mi urur lelem pa wal ku mi muŋaiŋai zin.
Nio aŋbombo mboe mi aŋzze kombom tio.
Aŋpunun koroŋ matakiŋa, bekena aŋpakurkuru.
Pa Yooba, nio aŋkamam ŋgar pa uraata ku, tana ikam yo ma leleŋ ambai kat.
Mi aŋrre lala pa nomom muriini, tana menmeen yo mi aŋbombo mboe.
Yooba, uraata ta kamam, ina bibip, mi ndabokbokŋan, mi mburanŋan.
Mi ŋgar ku na, ilip kat. Aŋkam ŋgar pa ma aŋrao som. a 

Tamen wal kankaanaŋan tikilaala som.
Zin wal talliŋan ŋgar kizin ipet pa koroŋ taiŋgi som.
Ŋonoono, iti tere kembei zin wal sananŋan timasak ma tirao pa toono kembei mbutmbuutu ta izaara karau men.
Zin wal ta tinoknok sanaana kamŋana na, tere kembei mboti kizin ambai men.
Tamen kaimer, Anutu ko ipambiriizi zin ma tila len kat.

O Yooba, nu ta biibi ma lip. Mi ko mbotmbot murim ta kor a, mi kamam peeze, mi iseeŋge iseeŋge ma ila.
Ŋonoono kat. Kom koi bizin boozomen ta tikamam mbulu sananŋana na, nu ko yaŋgwiiri zin.
Ko pambiriizi zin ma timap lup.

10 Mi nio na, nu pombol yo mi pakur yo, mi kam leŋ mburoŋ biibi kembei ta makau saŋsaŋŋana.
Mi kampeŋana ku isalakaala yo, tana kam ma leleŋ ambai kat.
11 Indeeŋe ta koŋ koi bizin timaŋga mi tizaŋzaaŋa yo na, Anutu ikoto zin mi aŋre kat pa motoŋ.
Ni iketo wal sananŋan tana ma tiko papirik, mi aŋleŋ la pa orooro biibi ramaki tiŋiizi kizin.

12 Zin wal ndeeŋeŋan, nako timbot ambai mi tipiyotyooto ŋonoono ambaimbaiŋan kembei ta ni rouŋana.
Mi zin timendernder mbolŋana kembei ke ki Lebanon ta bibip mi mbolŋan. b 
13 Pa Yooba ipaaza zin lela urum kini potomŋana.
Tana zin ko timender su lele ki Anutu tiam, mi tizze ma tiwe bibip mi mbolŋan.
14 Mi sombe tiwe kolman,
na tipiyotyooto men ŋonon ambaimbaiŋan kembei ta ke popoŋan. c 
15 Mi tizzoyaryaara sua ta kembei: “Yooba, ni ikam ŋoobo mbulu sa som.
Mbulu kini ta boozomen na, indeŋdeeŋe men. Mi ni tundu ŋonoono. Pa ipombolmbol ti, mi iporoukalkaala iti.”
Copyright information for `MNA