aEp 5:19
bMbo 47:2, 48:1
cPil 2:10
dKam 23:21; Mbo 23:1
eKam 17:7; Ibr 3:7+, 4:7
f1Kor 10:9
gNam 14:34
hIbr 3:7+,18

Psalms 95

Mboe 95

Tapakur Merere. Mi tozoori pepe.

Kamar ma tapakur Yooba.
Kalŋanda isala mi tombo mboe pa ulaaŋa kiti mbolŋana raama menmeen ti.
Pa ni ta ipombolmbol ti mi imenderkalkaala iti.
Tamar kat ta kereene uunu mi lelende ambai pini.
Kalŋanda isala mi tombo mboe pakurŋana pini raama menmeen ti. a 

Pa Yooba, ni ta Anutu biibi ŋonoono, mi king biibi ŋonoono.
Ilip pa merere ta boozomen. b 
Ni imborro koroŋ ta boozomen ta irao toono ma ila.
Toono ta imbot meleeba kat ma ila isala abal ute ŋgutŋguutuŋan na, katuunu ta ni.
Tai mi toono na, koroŋ kini men tau. Pa ni itunu ta iur zin.
Mi itunu mburaana ta ikam ma toono raraazaŋana ipet.

Kamar tusuŋ mi tutuundu pa Yooba.
Telek kumbundu pini mi tapakuri.
Pa ni ta iur iti. c 
Ni Anutu kiti ta mataana piti mi imborro iti.
Mi iti na, sipsip kini tau. d 
Koozi keleŋ kat Yooba kalŋaana. Iso ta kembei:
“Keleŋtut sua pepe. Kokena ŋgar tiom imbol mi kakam zooroŋana kembei ta muŋgu tumbuyom bizin tikam su lele bilimŋana ki Meriba mi Masa na. e 
Indeeŋe tana, titoombo mburoŋ.
Pa nio aŋbelmbel uraata bibip pizin, mi zin tire kat mburoŋ pa matan.
Tamen tinoknok zooroŋana, mi tikam kinkiini be tire mini. f 
10 Tabe tikam ma leleŋ pizin risa som pa ndaama tomtooru.
Mi aŋso pizin ta kembei: ‘Wal tina, tiute zaala tio som,
mi gorgori lelen imbotmbot molo pio.’ g 
11 Tana keteŋ malmal pizin, mi aŋbuk sua mbolŋana, mi aŋpombol ma imbol kat.
Sua ta kembei:
‘Ŋonoono kat. Toono ta aŋur pizin be tila ma keten su mi timbot ambai pa na, zin ko tirao be tilela na som. Som kat!’ h 
Copyright information for `MNA