aKam 15:6; Lu 1:51
bLu 2:30
cMbo 96:10; Ŋgo 17:311

Psalms 98

Mboe 98

Merere, ni king biibi ŋonoono ta iporou ma ilip kek

Kombo mboe popoŋana pa Yooba!
Pa ni ikamam uraata ta ipa ndel kat.
Ni iporou pa namaana mburaanaŋana ta potomŋana i ma ilip pa ka koi bizin kek. a 
Yooba iswe mburaana biibi mi ikamke iti.
Iswe mbulu kini ndeeŋeŋana pizin karkari ma tire kat kek. b 
Ni mataana iŋgalŋgal sua ta ni imbuk pizin Israel na, mi iurur leleene pizin mi imuŋaiŋai zin.
Uraata biibi ta Anutu kiti ikam piti bekena ikamke iti na, zin tomtom ta tirao pa toono ta boozomen tire kek.

Niom toono ta boozomen, leleyom ambai pa Yooba mi koyotyooto pini.
Menmeen yom pini mi kapakuri pa mboe.
Kese kombom mi kombo mboe pakurŋana pa Yooba!
Kupun gita mi kiwit uruunu!
Menmeen yom, mi kiwi twiiri, mi kalŋoyom isala mi kapakur Yooba.
Pa ni ta king biibi ŋonoono.

Tai ramaki koroŋ boozomen ta timbotmbot lela na, ko kalŋan isala mi tipakur Yooba.
Mi toono ramaki zin tomtom ta timbotmbot pa na, ta kembena. Kalŋan ko isala mi tipakuri.
Mi yok ta boozomen ko tipespeeze naman pini.
Mi abalabal ta boozomen ko tilup kwon, mi kalŋan isala ma tipakuri isu kereene uunu.
Pa iŋgi be Yooba imar i.
Ni kola imar mi iur kadoono pizin tomtom irao toono ta boozomen.
Mi kadoono tabe ikam pizin i, ko indeeŋe men. c 
Copyright information for `MNA