bYesa 66:7; Ga 4:19
cDan 7:7
dDan 8:10
eMbo 2:9; Yesa 66:7; Tur 2:27, 19:15
f1Kin 17:1+; Dan 7:25; Tur 11:2+, 13:5
gDan 10:13,21; Yud 9; Tur 20:2
hUn 3:1+; Lu 10:18, 22:31; Yo 12:31; 2Kor 11:3; Tur 20:2+
iSek 3:1; Tur 19:1
jLu 14:26; Ro 8:33+, 16:20
kMbo 96:11+; Yesa 44:23, Yesa 49:13; Tur 8:13, 18:20
lKam 19:4; 1Kin 17:1+; Dan 7:25; Tur 11:2+, 13:5
mUn 3:15; 1Yo 5:10; Tur 11:7, Tur 13:7, 14:12, 20:4

Revelation of John 12

Moori mi mooto

To aŋre uraata biibi ipet ta saamba a. Moori ta,
(12:1) Moori taiŋgi, ni imender pa Anutu wal kini. Mi lutuunu na, Yesu tau. Mi mooto, ina Tomtom Sanaana. Tana Tomtom Sanaana itoombo be ipasaana Yesu ma som, to imaŋga pa wal kini. Mi uraata kini tana, ta iŋgi ikamam men i. Tamen Anutu ko mataana pa wal kini.
ni iur zoŋ mataana ma iwe le mburu. Mi imender se puulu. Mi pitik laamuru mi ru imbot sala uteene ma iwe le mogar.
Moori tana kopoono. Mi pikin ikamam be isu. Tabe ni iyamaana yoyouŋana biibi mi iyak ma kalŋaana. b 

Molo som na, uraata toro ipet ta saamba a. Mooto tau zazaŋana kat, mi isiŋsiŋ kembei ta you keseene i. Uteene ibogboogo ma iwe lamata mi ru. Mi ka kandaara laamuru. Mi mogar lamata mi ru ikot uteene lamata mi ru tana. c 

Mi wiini ikokor pitik pakan ta timbot saamba a, mi ipalkeete zin su toono. Mi pitik boozomen na, timbot ambai. To ila ma imender su ta moori kereene uunu mi izaŋzaaŋa. Beso moori tina ikam pikin ma isu, tona iwoni pataaŋa. d 

Pikin tomooto ta moori tina ipeebi, ina ni ta ko ikam peeze pizin karkari ta boozomen. Mi peeze kini ko mbolkeŋkeŋŋana kat. Tanata mooto iso ikani. Som, mi titatke i ma isala ki Anutu ta imbot se muriini peeze kana na. e 

Mi moori tana, ni iko ma ila lele bilimŋana ta Anutu itunu iur pini pataaŋa kek be imbot pa. Mi Anutu ko mataana pini mi ire i pa ka kini ma irao aigule munŋaana ta tomto laamuru tomto tel (1260). f 

To malmal imaŋga ta kar saamba a. Mikael ziŋan aŋela kini tikam malmal pa mooto, to mooto mi zin aŋela kini tipimiili malmal pizin. g 

Tamen mooto mburaana irao som. Tabe ziŋan wal kini tirao timbot mini kar saamba som. To tipiri mooto zazaŋana tana ma isu pa toono. Anoŋ tau aliŋgumuraŋana na. Tipaati be Tomtom Sanaana, mi Sadan. Ni tina, ta ipandelndel zin tomtom ta boozomen, mi ipakamkaam zin ma titoto zaala sananŋana. Tana tipiri i ma isu toono raama zin aŋela kini. h 

10 Tona aŋleŋ kalŋaana biibi ta imbot saamba mi iso ta kembei:

“Iŋgi buri Anutu kiti ikamke zin wal kini ma timbot ambai.
Pa mburaana mi peeze kini, ta iswe ma ipet mat kek.
Iŋgi be Mesia kini ikam uraata kini ta ni zaana pa.
Pa Tomtom Sanaana ta koroŋ mi iŋgalŋgal sua pizin toŋmatiziŋ kiti isu Merere kereene uunu ikot mbeŋ ma aigule na,
tipiri i ma isula le toono kek. i 
11 Mi zin toŋmatiziŋ kiti tilip pini kek.
Pa tipase pa Sipsip ki Anutu siŋiini,
mi tizzwe katkat sua ŋonoono.
Mi timoto pa meeteŋana som, mi tizem kat zitun pa Yesu. j 
12 Tana niom wal ta kombotmbot kar saamba na, menmeen yom mi leleyom ambai kat.
Mi niom ta kombotmbot toono mi tai na, tembel yom.
Pa Tomtom Sanaana, ta isuma i.
Mi ni keteene malmal biibi kat.
Pa iute swoono igarau kek.” k 
13 Tana mooto ire kembei ni tipiri i su le toono kek. Tabe ila iketoto moori ta ipeebe pikin tomooto na. 14 To tikam moori tana le manboŋ begeene ru ta bibip kat, bekena irie ma ila muriini ta lele bilimŋana a. Naso imbot molo pa mooto. Mi Anutu ko mataana pini mi ire i pa ka kini ma irao ndaama tel mi pakaana. l 

15 To mooto imaŋga na, ikaaga kwoono, mi yok itoogo ma ipet be isur moori tana ma ila ne. 16 Tamen toono iuulu moori, mi kwoono ikaaga ma isen yok ta ipet pa mooto kwoono na. 17 Tabe mooto keteene malmal kat pa moori. To imaŋga pa popoŋana pakan ki moori tana. Mi ina zin tau tileŋleŋ la tutu ki Anutu mi titoto, mi tikiskis sua ŋonoono ki Yesu. 18 Mi mooto tana ila ma imender su peende. m 

Copyright information for `MNA