aMt 24:31
bMbo 141:2; Lu 1:10; Ibr 9:4; Tur 5:8, 9:13
cKam 19:16+; Ŋgo 4:31; Tur 16:18
dKam 9:23+
eKam 7:20+
fKam 15:23; Yesa 14:12; Yer 9:15
gKam 10:21+; Mt 24:29+

Revelation of John 8

Sipsip ki Anutu ikinke bigil ta iwe lamata mi ru pa i

Beso Sipsip ki Anutu ikinke bigil ta iwe lamata mi ru pa i ma isu na, saamba ikam kiŋ ma irao mazwaana ri. To motoŋ ila na, aŋre aŋela lamata mi ru ta timendernder su Anutu kereene uunu. Mi tikam len twiiri ma irao zin. a 

Anutu ileŋ suŋŋana ki wal kini mi iur kadoono pizin tomtom

Mi aŋre aŋela toro ta iteege mbooro milmilŋana, mi imar ma imender su artaal uunu. Mi tikam koroŋ kuzinŋan boozo ma ila kini be ilup raama Anutu wal kini potomŋan suŋŋana kizin, mibe iruk ma iwe patoronŋana. To ni isala artaal milmilŋana ta imbot kolouŋana pa Biibi muriini na, mi ikam patoronŋana. Tana kakoi kuziiniŋana tana, ramaki Anutu wal kini potomŋan suŋŋana kizin isala ma Anutu iyoozo. b 

To aŋela ikam you artaal kana, mi iur sula mbooro milmilŋana, mi itiyaara ma isula toono. Beso itiyaara ma isula na, lolo iwenweene, saamba ikuruŋruŋ, lele ikimitmit, mi yeŋyeeŋge itok. c 

Twiiri paŋ titaŋ pa pataŋana tabe ipet mi ipei ŋgar kizin tomtom

Kaimer na, aŋela lamata mi ru ta tiurur zin raama twiiri na timaŋga be tiwi.

Aŋela mataana kana ila beso iwi twiiri kini na, tigibgiibi yaŋpat mi you ramaki siŋ ma dodot su toono. To toono pakaana ta, ramaki ke boozomen ta timbotmbot pa toono pakaana tana na, you ikan ma imap. Mi pakaana ru na, timbot ambai. Mi mbutmbuutu na, you tana ineene ma imap kat. d 

To aŋela ta iwe ru pa i ila ma iwi twiiri kini. Beso iwi na, koroŋ kembei ta abal siŋaanabi kat, tipiri ma ila itop sula tai. Abal tana, you ilol ma imap. To tai pakaana ta itoori ma iwe siŋ. Mi pakaana ru na, timbot ambai. e 

Mi buzur ma koroŋ munŋaana men ta tiwwa la tai pakaana tina na, timetmeete lup. Mi wooŋgo ta timbot la pakaana tina tomini, timbiriizi lup.

10 To aŋela ta iwe tel pa i ila ma iwi twiiri kini. Beso iwi na, pitik siŋaanabi kat ta you ikanan la ma ibilbil kembei ta kai i, imbot saamba, mi itop ma isula yok rereereŋan mi yok bukbukŋan. Pitik tina zaana ta kembei ‘Naamba.’ Ina ipasaana yok boozomen ta timbot pa toono pakaana ta. Tana wal boozomen ta so tiwin, nako timetmeete. Mi yok ta timbot pa toono pakaana ru na, tisaana som. f 

12 To aŋela ta iwe paŋ pa i, ila ma iwi twiiri kini. Beso iwi na, Anutu ipasaana zoŋ pakaana ta, ma puulu pakaana ta, mi pitik pakan ma tisaana. Mi zoŋ pakaana ru, mi puulu pakaana ru, mi pitik boozomen na timbot ambai. Tana zoŋ, puulu, mi pitik na, pakaana ta, iurur zugut. Mi pakaana ru na, tiurur mat. Tana aigule mi mbeŋ na, zoŋ ma puulu mi pitik tikamam kat uraata mini som. g 

13 To motoŋ ila na, aŋre manboŋ ta imar ma itababaaba sala ta maŋaanaŋana i, mi kalŋaana biibi ma iso: “Weii, tembel zin kek! A wal toono kan, tembel zin kek, tembel zin kek! Pa aŋela tel tomen ta timbotmbot i. Tiwi twiiri kizin zen.”

Copyright information for `MNA