aRo 9:3
bŊgo 22:3; Ga 1:14
cRo 9:31+; Pil 3:9
dMt 5:17; Ro 7:4+; 2Kor 3:6; Ga 3:24+; Ibr 8:13
eWkp 18:5; Lu 10:27+; Ga 3:12
fLo 30:11-14
gMt 10:32; Yo 3:15; Ŋgo 16:31
hMbo 25:3; Yesa 28:16; Ro 9:33
iŊgo 10:34+; Ro 3:22,29; Ga 3:28
jYoel 2:32; Ŋgo 2:21
kŊgo 8:30+
lYesa 52:7; Ep 6:15
mYesa 53:1; Yo 12:38; Ibr 4:2
nMbo 19:4; Mt 24:14, Mt 28:19; Kol 1:6,23
oLo 32:21; Ro 11:11,14
pYesa 65:1; Ro 9:30
qYesa 65:2

Romans 10

Zin Israel ŋgar kizin ipet pa Anutu zaala kini zen

O niom toŋmatiziŋ tio, koroŋ ta, ta nio leleŋ pa ilip. Ina nio aŋso Anutu ikamke zin wal tio Israel to ndabok. Tanata gorgori aŋzuŋzuŋ pizin. a 

Nio ti aŋute kat zin, tana aŋrao aŋso kan sua. Ŋonoono, zin tikamam kaisiigi be timbeeze pa Anutu. Tamen tikam kat ŋgar som, mi tikamam sorok. b 

Pa zaala tau Anutu ikam ti ma tewe ndeeŋeŋanda pa i, ina ŋgar kizin ipet pa zen. Tanata tizorzooro pa, mi tiso tipase pa zitun mbulu kizin mi uraata kizin be ikam zin ma tiwe ndeeŋeŋan. c 

Tamen zaala ki tutu na, imar imiili su ta Krisi i. Pa wal boozomen ta sombe tiurla kini, na ni itunu ko ikam zin ma tiwe ndeeŋeŋan pa Anutu mataana. d 

Zaala ki tutu mi zaala ki urlaŋana

Zaala ki tutu na, muŋgu Mose ibeede ka sua ta kembei. Iso: “Tomtom ta sombe ito kat tutu, inako imbot ambai.” Ina zaala tabe tewe ndeeŋeŋanda pa tutu. e 

Mi zaala tabe tewe ndeeŋeŋanda pa urlaŋana na, imarra. Pa zaala tana iso piti ta kembei: “Kokena kakam ŋgar boozo ma kosombe: ‘Aiss, asiŋ ko irao be isala pa saamba?’” Som. Pa Krisi isu toono kek. “Mi kokena koso: ‘Asiŋ irao be isula ta meeteŋan murin a, mi ipei Krisi?’” Som. Pa Anutu ipei Krisi ma imaŋga mini pa naala kek. Sua ti ka ŋgar ta kembei:

Anutu sua kini imbotmbot molo piti be turu na som. Pa imbotmbot la kwondo mi lelende kek. f 

Lak, so sua i? Ina sua ta amzzoyaryaara pa urlaŋana na.
Mi sua tana iso ta kembei: Nu sombe swe urlaŋana ku ila iwal biibi matan ma so: “Yesu, ni Biibi tio,” mi sombe lelem iurla kembei Anutu ipei i ma imaŋga mini pa naala kek, inako Anutu ikamke u ma mbot ambai. g 

10 Pa sombe lelende iurla, inako Anutu ikam ti ma tewe ndeeŋeŋanda. Mi sombe teswe urlaŋana kiti ila iwal biibi matan, inako Anutu ikamke iti ma tombot ambai. 11 Pa sua ki Merere isombe:

Zin tomtom ta so tipase pini mi tiurla kini, na tasa ko ka miaŋ som. Zin ta boozomen ko nin se. Pa zin kola tire urlaŋana kizin ka ŋonoono. h 

12 Sua tana ikam iti ta boozomen. Zin Yuda, mi zin wal ta Yuda somŋan i tomini. Pa Anutu, ni Biibi kizin tomtom ta boozomen. Mi ni ikampewe kat wal boozomen ta titaŋroro i be iuulu zin na. i 

13 Pa

Wal boozomen ta so titaŋroro Merere be iuulu zin, na ni ko ikamke zin ma timbot ambai. j 

Zooroŋana kizin Israel na, ka uunu somŋana. Pa tileŋ uruunu ambaiŋana kek

14 Tamen sombe tomtom tiurla kini som, inako titaŋroro i be iuulu zin be parei? Mi sombe tileŋ sua som, inako tiurla kini be parei? Mi sombe tomtom tisoyaara sua pizin som, inako tileŋ be parei? k 

15 Mi sombe wal pakan tiŋgo zin tomtom ma tila be tisoyaara sua som, inako tisoyaara be parei? Mi zin Israel na, tomtom tila ma tisoyaara uruunu ambaiŋana pizin kek. Pa sua ki Merere isombe:

Tomtom lelen ambai kat pizin wal ta tikam uruunu ambaiŋana ma timar. l 

16 Tamen zin Israel boozo tikan la uruunu ambaiŋana som. Kan sua ta Yesaya iso pataaŋa kek. Sua ta kembei:

Merere, asiŋ iurla sua tiam? Som. m 

17 Tana sua ta teleŋleŋ, ta ipei urlaŋana. Mi sua tana, teleŋleŋ la kizin wal ta tizzoyaryaara Krisi uruunu na.

18 Kenako toso parei pizin Israel? Zin tileŋ uruunu ambaiŋana zen? Soom. Zin tileŋ kek. Pa sua ki Merere isombe:

Kalŋan ila ma irao lele ta boozomen ma karkari tileŋ lup.
Pa sua kizin ila ma irao toono kek. n 
19 Mi parei? Kenako zin Israel tirao be tikam kat ŋgar pa Anutu zaala kini som ma iŋgi? Soom. Zin tirao. Pa zin matan munŋan ta tikamam ŋgar pa. Mose iso kan sua ta muŋgu kek ta kembei:

Zin wal ta zan somŋan, mi len ŋgar somŋan i na, nio ko aŋkam zin ma tiwe leŋ.
Mi mbulu ambaiŋana tabe aŋkam pizin i, ko ikam yom ma keteyom malmal mi motoyom berber. o 
20 Mi kere. Yesaya iso kat ta kembei:

Zin wal ta tikamam kinkiini be tiute yo som na, zin tana ta tindeeŋe yo.
Mi zin wal ta tirru yo som, ta aŋswe ituŋ pizin. p 

21 Tamen zin Israel na, ni iso kan sua ta kembei:

Niom wal ta keleŋsil sua mi kozorzooro na, gorgori ta nio aŋzarra nomoŋ piom mi aŋzza yom be kamar. Mi som. q 

Copyright information for `MNA