aMt 7:1+; Yo 8:7+
b1Kor 4:5
cKam 34:6+; Ep 2:4+; 2Pe 3:9,15
dRo 1:18; Tur 6:17
eMbo 62:12; Mt 16:27; 2Kor 5:10; Tur 22:12
fMt 25:46
gMt 7:18; Ro 1:18; 2Tes 1:6+, 2:12
hLu 12:47+; Ro 1:16; 1Pe 4:17
iŊgo 10:34+; Ro 2:26; Yems 2:24
jEp 6:9; Kol 3:25; 1Pe 1:17
kMt 7:21; Yems 1:22+, Yems 2:22,24; 1Yo 3:7
lŊgo 10:35
mYer 31:31+; Ibr 8:10
n1Kor 4:5; 2Kor 5:10
oMbo 147:19+; Mt 3:9; Ro 9:4+
pMt 15:14; Yo 9:40+; 2Tim 3:5
qMbo 50:16+; Mt 23:3+
rMt 5:27+
sEzek 36:20+; 2Pe 2:2
tGa 5:3
uRo 2:7,10; Ga 5:6
vMt 12:41+
wRo 9:6+; 1Kor 4:5; 2Kor 3:6; Ga 6:15; Pil 3:3; Kol 2:11+

Romans 2

Zaala tau Anutu itiiri iti pa mbulu kiti

Mi nu tomtom ta so tirtiiri zin tomtom pakan pa mbulu kizin, mi zzo be zin sananŋan na, kozo re u. Pa mbulu ta tikamam, ina nu tomini kamam. Tana sua ta zzo pizin, ina nu zzo pa itum tau. Nu lem sua sa som. Pa nu sananŋom raraate kembei ta zin na. a 

Mi iti tuute: Zin wal ta so tikamam mbulu sananŋana, na Anutu kola iur kadoono pizin. Mi ina indeeŋe men. b 

Tana parei? Nu ta sombe tirtiiri wal pakan pa mbulu kizin mi zzo be zin sananŋan, mi tamen itum kamam mbulu sananŋana raraate kembei ta zin na, nu so ko mbot? Som. Nu tina, Anutu kola iur kadoono pu tomini. Re. Iŋgi Anutu ikampe u mi imuŋai u biibi kat. Pa ni izza u, mi loŋa ipokot sanaana ku som. Parei? Kampeŋana mi muŋaiŋana kini tana, nu re kembei koroŋ sorok? Nu ute som? Ni ikamam pu ta kembei bekena re mi tooro lelem. c 

Tamen ŋgar ku imbol, mi lelem be tooru som. Mi ina nu ndoundou lem kadoono sananŋana. Be mbeŋ kaimer, ma Anutu isombe iswe kete malmalŋana kini ma ipet kat mat, mi iur kadoono ndeeŋeŋana pizin tomtom, to kam kadoono ku tana. d 

Pa Anutu kola iur kadoono pizin tomtom ta boozomen ikot mbulu kizin kizin. e 

Tana zin wal ta so tipiyotyooto mbulu ambaiŋana, mi tikamam kinkiini be timbot raama Anutu lela azuŋka kini leleene ma alok, mibe Anutu iwit urun, na zin ko tikam mbotŋana ki Anutu tabe iseeŋge iseeŋge ma ila. f 

Mi zin wal ta so matan iŋgal zitun men, mi titoto sua ŋonoono som, mi tinoknok mbulu sananŋana, na Anutu ko keteene malmal pizin mi iur kadoono pizin. g 

Tana wal boozomen ta so tikamam mbulu sananŋana, na pataŋana mi yoyouŋana biibi ko ikam zin ma tiru zalan. Ko mataana mi ipet pizin Yuda. Mana ipet pizin wal ta Yuda somŋan i. h 

10 Mi wal boozomen ta so tikamam mbulu ambaiŋana, nako ziŋan Anutu tiparlup zin ma timbot ambai lela azuŋka kini leleene, mi Anutu iwit urun. Ko mataana mi ipet pizin Yuda. Mana ipet pizin wal ta Yuda somŋan i tomini. i 

11 Pa Anutu, ni ikamam mbulu ndelndelŋa pizin tomtom som. Ni ikamam mbulu raraate men pizin tomtom ta boozomen. j 

12 Ŋonoono, zin wal ta Yuda somŋan i, tiute tutu ki Mose som. Tana Anutu irao itiiri zin pa tutu tana som. Mi koroŋ pakan na, tiute. Tamen tito som. Sanaana kizin tana, ta ko ikam zin ma tila len. Mi zin Yuda na, tiute tutu ki Mose. Tana Anutu ko itiiri zin pa tutu tana. 13 Mi kere yom. Pa tutu leŋŋana men ko irao ikam ti ma tewe ndeeŋeŋanda pa Anutu mataana na som. Bela urlaŋana kiti ipiyooto mbulu ta tutu iso pa na, tona Anutu ire iti kembei tomtom ndeeŋeŋanda. k 

14 Zin wal ta Yuda somŋan i, titum raama tutu ki Mose som. Tamen sombe tikamam mbulu kizin ma indeeŋe pa tutu ki Anutu, ina iso iti ta kembei: Mbulu ambaiŋana mi mbulu sananŋana na, zin tikilaala. l 

15 Tana mbulu ambaiŋana ta tikamam, ina iswe kembei: Anutu ibeede tutu kini ila lelen kek. Mi koroŋ toro iswe tomini. Sombe tikam mbulu sananŋana sa, na tiyamaana zitun kembei tikam ŋoobo. Mi sombe tikam mbulu ambaiŋana, na tiyamaana zitun kembei tikam ŋoobo mbulu sa som. m 

16 Tana indeeŋe mbeŋ kaimer, Anutu ko iur Yesu Krisi be itiiri zin tomtom pa ŋgar kizin turkeŋana. Uruunu ambaiŋana ta aŋzzoyaryaara na, iso ta kembei. n 

Anutu kete malmalŋana kini imbotmbot se kizin Yuda tomini

17 Mi nu ta so paata itum be Yuda na, parei pu? Pa nu tina pase pa tutu be ikamu ma mbot ambai. Mi nim se ma zzo: “Niam Yuda ta amute kat Anutu.” o 

18 Mbulu ta Anutu leleene pa, ina nu ute. Mi koroŋ ta ambaiŋana ma ilip, ta tutu ipaute u pa ma yok pa kek. 19 Tana nu kamam ŋgar pa itum ma sombe ŋgar ambaiŋana mi sua ŋonoono ta imbot la tutu ki Mose na, nu ute lup kek. Mi nu sombe so zin matan munŋan pa zaala ki Anutu, mi ur mat pizin wal tau timbot zugut leleene na. Mi nu sombe pazal zin wal ta len ŋgar somŋan i, mi paute zin wal ta ŋgar kizin ipet zen i. p 

21 Lak, nu ta sombe paute zin wal pakan na, parei ta paute itum som? Re. Nu kamam sua pizin tomtom be tikem pepe. Mi parei pa itum? Kem som? q 

22 Mi nu zzo pizin tomtom be tipasaana ula pepe. Itum pasaana ula som? Mi nu zzo be lelem pizin merere pakaamŋan risa som. Mi parei pa itum? Sei lem urum kizin ka koroŋ sa som? r 

23 Tana nu ta nim se pa tutu mi pase pa na, itum molo tutu som kek? Re: Kokena molo tutu, to pasaana Anutu uruunu. 24 Sua ki Merere iso kom sua muŋgu kek ta kembei:

Mbulu tiom ta ikamam ma zin wal ta Yuda somŋan i kwon pasom Anutu. s 

Reeteŋana ŋonoono, ina koroŋ ki lelende

25 Nu sombe toto tutu, na mbulu ki reeteŋana ko iuulu u. Mi sombe mololo tutu, na reeteŋana ku ko iwe koroŋ sorok. Pa Anutu ko ire u raraate kembei zin wal ta tireete zin som na. t 

26 Mi sombe tomtom sa, ni tireeti som, mi tamen urlaŋana kini ipiyotyooto mbulu ta tutu iso pa na, ina ni ko iwe Anutu tomtom kini raraate kembei ta zin wal ta tireete zin na. u 

27 Ŋonoono, tutu ta tibeede se ro na, niom Yuda kuute. Mi tireete yom kek. Tamen sombe komololo tutu, na kere yom. Pa zin wal ta tireete zin som, mi tamen matan iŋgalŋgal tutu ka mbulu mi titoto, nako tiwe uunu piom be Anutu iŋgal motoyom mi iur kadoono piom. Pa mbulu kizin ilip piom kek. v 

28 Tomtom ta so zaana Yuda mi tireeti kek, mi tamen itoto tutu ka mbulu som, ina ni Yuda ŋonoono som. Ni Yuda ka woono men. Pa mbulu ŋonoono ki Yuda, ina koroŋ ki lelende. Mi reeteŋana ŋonoono ta kembena. Ina koroŋ ki kulindi som. Ina koroŋ ki lelende. Reeteŋana ta kembei na, tutu ta tibeede se ro na, irao ikam piti som. Ina imar pa uraata ki Bubuŋana Potomŋana. Mi tomtom ta so ikam reeteŋana ta kembena, na ni iurur mataana pizin tomtom be tiwit uruunu som. Tamen Anutu, ni ko iwit tomtom tana uruunu. w 

Copyright information for `MNA