aMbo 147:19+; Ŋgo 7:38; Ro 9:4
bRo 9:6, 11:29; 2Tim 2:13; Ibr 4:2
cMbo 51:4, 116:11
dRo 3:8, 6:1+,15
eUn 18:25
fRo 6:1,15+
gRo 1:18+; Ga 3:22
hMbo 14:1+, 53:1+
iMbo 5:9, 140:3
jMbo 10:7
kYesa 59:7+; Lu 1:79
lMbo 36:1
mRo 3:9,23, 4:15
nMbo 143:2; Ro 7:7; Ga 2:16, 3:11; Tit 3:5
oUn 15:6; Ŋgo 10:43, 15:11; Ro 4:6; Pil 3:9
pRo 1:17, 10:12; Ga 3:28; Kol 3:11
qRo 11:32; Ga 3:22
rRo 5:1; Ep 1:7, 2:8; Kol 1:14; Tit 3:5
sŊgo 13:38+; 2Kor 5:19; Kol 1:20; Ibr 9:12+
tMbo 51:4; Ga 2:16
u1Kor 1:29+; Ro 4:5; Ep 2:9
vRo 3:20, 8:3; Ga 2:16; Ep 2:8+
wŊgo 10:34+; Ro 9:24+, 10:12; Ga 3:28
xŊgo 15:9+; Ro 4:11+; Ga 3:8
yMt 5:17; Ro 8:3+, 13:10; Ga 5:22+

Romans 3

Anutu itoto sua kini

Sua tio tana ko ipei wiŋana ta kembei: “Kena parei pizin Yuda? Len kosa sa tabe ikam zin ma tilip pizin wal pakan i som? Mi reeteŋana tomini. Iuulu zin be parei?” Wai! Mbulu ambaimbaiŋan matakiŋa ta ipet pizin Yuda. Mataana mi tileŋ Anutu itunu kalŋaana, mi ni iur sua kini tana ila naman be matan pa. a 

Ŋonoono, sua ta ziŋan Anutu timbuk na, Israel pakan tito som. Mi parei? Ko mbulu kizin tana ikam ma Anutu tomini mataana mbeleele sua kini mbukŋana, mi ito som? Na som. b 

Pa niam amso ta kembei: Tomtom ta boozomen tipakaam lak. Mi Anutu, ni izzo sua ŋonoono men mi itoto sua kini. Kembei ta sua kini ta tibeede pataaŋa kek na iso:

Anutu, sua ku iswe kembei nu kamam mbulu ndeeŋeŋana men.
Kozobe titiiru pa mbulu ku, so tindeeŋe lem uunu sa isaana som. c 

Mi nio aŋute. Wal pakan ta tikamam ŋgar ki toono na, ko tisu mi tiso sua kankaanaŋana ta kembei: “Anutu mbulu kini indeeŋe som. Pa sanaana tiam, ina iuluuli. Pa ikam ma mbulu kini ndeeŋeŋana imbot kat mat. Kozobe niam amkam sanaana som, so ni zaana biibi pa mbulu kini ndeeŋeŋana be parei? Tana parei ta ni keteene malmal mi iurur kadoono pa sanaana tiam? Koroŋ so ni leleene ambai piam!” d 

Ina ko som ma som kat. Anutu, ni ikamam mbulu ndeeŋeŋana men. Mi be som, so ni irao itiiri kat zin tomtom ta timbot su toono na, mi iur kadoono pizin pa mbulu kizin be parei? e 

Mi tomtom toro ko imaŋga mi iso sorok ta kembei: “Mbulu tio pakaamŋana ta iwe zaala pa Anutu be zaana iwe biibi. Pa ina ikam ma mbulu kini ta izzo sua ŋonoono men na, imbot kat mat. Mi so kembena, na uunu parei ta ni iso nio tomtom sananŋoŋ mi isombe iur kadoono pio? Koroŋ so tonoknok mbulu sananŋana men. Naso tu'uuli mi ikam zaana biibi pa muŋaiŋana kini.” Nio aŋute: Wal pakan tiŋgalŋgal sorok sua pio ma tizzo nio aŋkamam sua kankaanaŋana ta kembena. Wal tana, Anutu itunu ko iur kadoono pizin. Mi sombe ikam ta kembei, ina indeeŋe men. f 

Tomtom ta boozomen tizem Anutu zaala kini kek

Tana ko toso parei? Zin Yuda tilip pizin wal ta Yuda somŋan i? Som kat! Pa nio aŋso ma imbot mat kek. Iti tomtom ta boozomen ta sanaana ikis ti lup. Zin Yuda mi zin wal ta Yuda somŋan i tomini. g 

10 Ka sua ta tibeede pataaŋa kek:

Tomtom sa, ni ndeeŋeŋana som. h 
11 Mi tomtom sa ikam kat ŋgar som.
Sa ikam kinkiini be iute Anutu mi ito mbulu kini som.
12 Pa timap ma tizem zaala kini kek. Tipiyooto mbulu ambaiŋana sa som.
Tana tomtom sa ikamam mbulu ndabokŋana na som. Som ma som kat.
13 Sua mbuyeeneŋana ta iwedet pa kwon. Mi lelen na, tiso tipasaana zin tomtom.
Zin mian bogboogoŋan mi tipakamkaam.
Mi zin kembei ta mooto sananŋana. Paso, kwon bok pa sua sananŋana ta ipasansaana zin tomtom. i 
14 Tana kwon kalaana som kat. Pa gorgori ta tiwirri sua sananŋana kat. j 
15 Zin tilonloondo be titeege siŋ pizin tomtom.
16 Mi tiwwa raama mbulu boozomen ta ipasansaana zin tomtom mi ikamam pataŋana pizin.
17 Tana zaala ambaiŋana ki taparlup ti ma tewe tamen na, zin tiute risa som. k 
18 Mi Anutu na, timototo i som, mi tileŋleŋ la kalŋaana som. Som kat. l 

Tutu ipumun iti tomtom ta boozomen kwondo

19 Sua tana indeeŋe zin wal ta Yuda somŋan i mi zin Yuda tomini. Pa iti tuute: Anutu sua kini ta boozomen, ina ni iur pizin Yuda be tito. Tamen tito som. Tana iti tomtom ta boozomen ta tamap tombot su toono ti na, tutu imbot be ipumun kwondo lup, mibe ipei ŋgar kiti ma tikilaala itundu ta kembei: Anutu kete malmalŋana kini imbotmbot se kiti. Pa takam ŋoobo kek. m 

20 Tana mbulu ki toto tutu, ina ko iwe zaala pa tomtom sa be iwe ndeeŋeŋana pa Anutu mataana na som. Som ma som kat. Tutu imbot be ipei ŋgar kiti ma tikilaala sanaana kiti. n 

Zaala ta Anutu ikam ti ma tewe ndeeŋeŋanda

21 Mi koozi na, Anutu iswe zaala toro piti be tewe ndeeŋeŋanda pa ni mataana. Zaala tana, ki tutu toŋana som. Tamen tutu mi sua ta muŋgu Anutu kwoono bizin tibeede na, tipatooŋo iti pa zaala tana. o 

22 Zaala tana ki urlaŋana. Pa wal boozomen ta so tiurla ki Yesu Krisi, inako Anutu ire zin kembei wal ndeeŋeŋan. Zin Yuda, mi zin wal ta Yuda somŋan i tomini. Pa iti ta boozomen na raraate men. p 

23 Tamap ma takam sanaana lup. Mi ina ikam ma tombot molo pa Anutu mi mbulu kini ndabokŋana. Pa mbulu kiti irao som. q 

24 Tamen Anutu, ni muŋaiŋana katuunu. Tanata imuŋai iti, mi iur lende zaala toro be tewe ndeeŋeŋanda. Zaala tana imbot la uraata ki Yesu Krisi. Pa sanaana kiti ka kadoono, ta ni ibaada kek. Tana ni itatke iti pa pataŋana ki sanaana kiti. r 

25 Ni, Anutu iuri ma siŋiini ireere ila iwal biibi matan, bekena ibaada sanaana kiti ka kadoono mi ipunmeete Anutu kete malmalŋana kini. Tana zin tomtom ta so tipase pa uraata kini tana, na ni ireege sanaana kizin. Mi ina iswe kembei Anutu mbulu kini indeeŋe men. Mi be Anutu ikam mbulu tana som, so mbulu kini indeeŋe som. Paso wal boozomen ta muŋgu tikamam sanaana na, ni iyaramraama kete malmalŋana kini, mi iurur kadoono pizin som. s 

26 Mi koozi tomini, Anutu mbulu kini ta imuŋaiŋai zin wal urlaŋan pa sanaana kizin, ina indeeŋe men. Paso, Krisi ibaada sanaana kizin ka kadoono kek. Tana sombe Anutu ipaata zin wal ta tiurla ki Yesu na be wal ndeeŋeŋan, ina indeeŋe men. t 

27 Mi so kembena, na asiŋ irao ipakur itunu pa mbulu kini ambaiŋana? Som. Pakurŋana ta kembei na, sa mini som. Pa iti toto kat tutu, to tapakur itundu. Mi iŋgi som. Iŋgi tombot la zaala ki urlaŋana men. u 

28 Pa tuurla ta kembei: Urlaŋana men ta iwe zaala piti be tewe ndeeŋeŋanda pa Anutu mataana. Mi mbulu ki toto tutu, na som. v 

29 Mi parei? Anutu, ni Anutu kizin Yuda men? Som. Ni Anutu kizin wal ta Yuda somŋan i tomini. w 

30 Pa Anutu tamen ta imbotmbot. Mi ni iur zaala tamen pizin tomtom ta boozomen. Zin Yuda ta titoto mbulu ki reeteŋana, mi zin wal ta tito mbulu tana som na tomini. Mi zaala tana, ina ta kembei: Zin sombe tiurla, inako ni ire zin kembei wal ndeeŋeŋan. x 

31 Mi parei? Sombe tapakur urlaŋana ma iwe koroŋ biibi, ko takam ma tutu iwe koroŋ sorok? Som kat. Pa urlaŋana ta ipeeze kat tutu ka uunu, mi ipiyotyooto ka mbulu. y 

Copyright information for `MNA