aRo 13:1+; 1Pe 2:13+
bEp 4:2,31; Pil 4:5; Kol 3:12; 2Tim 2:24+
c1Kor 6:11; Ep 2:1+, 5:8; 1Pe 4:3
dTit 2:11
eYo 3:3+; Ŋgo 2:17+,33, 15:11; Ro 3:20+, 5:5; Ga 2:16; 2Tim 1:9
fRo 8:17,23+
g1Tim 1:14+
h1Tim 1:4; 2Tim 2:23; Tit 1:14
iMt 18:15+; Ro 16:17+; 2Tes 3:6; 1Tim 6:3+; 2Tim 3:5; 2Yo 10
jKol 4:7+
kŊgo 18:24+
lPil 1:11; Kol 1:10; Tit 2:14

Titus 3

Mbulu kizin wal urlaŋana kan

Pei ŋgar kizin tomtom be timbotmbot la zin bibip ki gabman ta tikamam peeze piti i kopon mbarman mi tileŋleŋ la kalŋan, mibe matan siŋsiŋ pa uraata ambaimbaiŋan matakiŋa ta boozomen. a 

Mi so pizin be tipiri sua sananŋana pa tomtom sa pepe, mi tizooro pepe. Mibe tikam mbulu luumuŋana men, mi len ŋger pa tomtom ta boozomen. b 

Pa muŋgu iti tomini takankaana pa Anutu, mi tozorzoori, mi takamam mbulu bozboozo, mi tomtom tipandelndel ti pa sua kizin pakaamŋana, mi nindi izze pa mbulu soroksorok boozomen ki toono mi tewe mbesooŋo pa. Takamam ŋgar sananŋana pizin tomtom, mi matanda mburmbur pizin, mi itiŋan tomtom ta boozomen taparwe kanda koi ma tombotmbot. c 

Tamen indeeŋe kampeŋana mi muŋaiŋana ki Anutu ta ulaaŋa kiti na ipet mat na, ni iwe tundu mi ikamke iti. d 

Mi iti takam mbulu ndeeŋeŋana sa ta ni ikamke iti pa i na som. Som kat. Ina ni itunu muŋaiŋana kini tau. Zaala ta ni ikamke iti pa i, ina ta kembei: Bubuŋana Potomŋana ikam uraata piti ma tewe popoŋanda, mi ipus ti ma tewe ŋgeezeŋanda. Pa Ulaaŋa kiti Yesu Krisi iwe zaala piti, tanata Anutu ikam Bubuŋana Potomŋana ma isu ma isalakaala iti. e 

Tana kampeŋana mi muŋaiŋana ki Anutu, ta ikam ti ma tewe ndeeŋeŋanda pa ni mataana. Mi koozi zanda be takam mbotŋana mata yaryaaraŋana mi tu'urur matanda pa. f 

Sua tana, sua ŋonoono. Irao tuurla mi tapase pa. Tana nio leleŋ be nu kwom imbolmbol pa. Naso zin wal tau tiurla ki Anutu na, matan iŋgalŋgal be tikam uraata mi mbulu ambaimbaiŋan totomen. Pa mbulu ta kembei, ina ambai mi iuluulu zin tomtom. g 

Mi zin wal ta tiyyo kwon pa sua kankaanaŋana, mi tiwidit Yuda tumbun bizin un mi tiparzorzooro pa tutu ki Mose na, mbotmbot molo pizin. Pa sua soroksorok ta kembei, ko iuulu iti risa som, mi ipiyooto ŋonoono ambaiŋana sa som. h 

10 Sombe tomtom sa izorzooro mi irekreege lupŋana ki Krisi, na loŋa mi peteke i. Peteke i pa ta ma som, mi so iwe ru pa ma som, to pizil ndemem pini, mi mbot molo pini. Pa nu ute: Tomtom ta inoknok sanaana ta kembei, ni izem zaala ki Anutu kek. Tana mbulu kini tina iswe i kembei kaimer ni kola ikam kadoono sananŋana mi ila lene. i 

Sua pemetŋana

12 Re sombe aŋgo Atemas, som Tikikus ma ima, to toombo be loŋa mi mar tio ta Nikopolis i. Pa iŋgi lele ilomo kek. Mi re lene ta tiŋgi na, aŋso aŋla aŋbot ta tiŋga. j 

13 Sombe Zenas ta iute kat tutu ki Rom na, ziru Apolos tima tipet ku, na re zin pa mboti mi pai kizin, kokena timbot ŋoobo. k 

14 Pa iti wal kiti tomini, irao tikam ŋgar pa mbulu ki kampeŋana, mi tiuulu zin wal ta timbot ŋoobo i. Kokena urlaŋana kizin ipiyooto ŋonoono ambaiŋana sa som. l 

15 Wal boozomen tau niamŋan ambotmbot taiŋgi na, tikam aigule kizin pu. Mi pakanda bizin ta niomŋan kombotmbot tina, mi tiur lelen piam mi tikiskis urlaŋana kizin na, we kwoyam mi kam aigule tiam pizin.

Kampeŋana ki Anutu ko ise tiom. Ŋonoono.

Copyright information for `MNA