Luke 5

Yesu ye molickelu mic-tengtengfocine bacebawec

Mat 4:18-22; Mrk 1:16-20

Dameng monicka Yesu ye lifuc, wacine Genesaret, mecina domaemewa ngic-ngigac yenge kwesilu Wapongte yowa ngagelu igocnagulu hewalingkebong, ye hewacnginang domawec. a  Domalu donge hilalu nganime wage yaeckang lifuc mecina domaiboc. Aime misa-sic baba ngic yenge wagengineng lobong domame uficngineng suwelu gaibong. Aime Yesu ye wage monic, yogo Simonte wage, iwa fengiyelu Simon edome yedi wage kpisicnemac igockeme lifucka feme ngic-ngigac edocebalu weduyelewec.

Aiyeleme motome Simon yanguc edowec, “Misa-sic banogale lifucka misa gbolongne fagacka, iwa hikelu uficngineng wikelu misa-sic baning.”

Inguc mime Simonti yowaine bafaliyecnowec, “Sugucnene, nonge awecnac debocka doic-bole balu gabeng mac saeme sic monic mi bagabeleng, aime gagi migicte sifu hikelu ufic wikedacte.” b 

Mime yenge uficngineng iwahac wikelu sic homacne benang baibong. Babong uficngineng wakelu lokenogale aiwec. Inguc aime yenge agofocngineng wage monicka ngiyeibong, yenge moleiyac holeyelebong welelu baficebaibong. Baficebabong sic wage yaeckangka lobong wakelu wage yeke misawa haunicte aiiboc.

Simon Pita ye aibaba yogo nganilu Yesule higewa ketadi badulu ewe holecnolu yanguc miwec, “Sugucne, na bikickolec aigabacte ga hegilecnulu hikec!” Inguc mime Simonkolec gaibong, yenge sic homacne benang baibongte ailu mimedec aiibong, yogolec ailu inguc miwec. 10 Nga Sebedile madeckecine, Yakobos nga Yohane, yeke Simonkolec misawa sic balu gacgu nganilu mimedec aiiboc.

Aime Yesudi Simon edolu yanguc miwec, “Ga mi hangocguna! Ga misawa sic babadi, yakumac ngic-baba aidamecte.”
11 Aime yenge wagengineng balu mecina lolu wiyac sasawa hegilelu Yesu balaibeibong. c 

Yesudi ngic monic waic-sanangkolec bamadickewec

Mat 8:1-4; Mrk 1:40-45

12 Aime Yesu ye taon monicka gacgume ngic monic waic-sanangti socine wakeme sowalebenangkeicne, ye iwa galu Yesu nganilu ketadi holecnolu haicine himongka heluluckelu wackemic aicnolu miwec, “Sugucne, ga ngageng nalic aime nalic bamadicnung gbagbackedacka, me?”
5:12Monic waic-sanangkolec, ye socine wonongkolec milu gaibong. Ngic homacnedi huc ingucne gacgu badaingkale, waic-sanangkolec yenge taon lobeina gaibong. Yogo Mosesle yefe-yowawa kwelengkeicne fagac.


13 Inguc mime Yesudi moleine sungkelu bauwalu miwec,
5:13Ngic monic ye ngic waic-sanangkolec oiyalu ye wonongkolec aidaicte.
“Madickecte ngagegabac.” Inguc mime iwachac ngic yela waic-sanang fawec i miyac aiwec.

14 Hegileme Yesudi mimackelu miwec, “Ga socgona aibaba fikegac yogolec ngic monic mi edodamec, depec-baba ngic yela hikelu socgone edalidamec! Aime Mosesdi depecte miwec, yogolec silicina lodamec! Yenge depecgone yogo nganilu ngage-motodaingte.” f 

15 Aime Yesule siducti sugucne benang sawelu hikeme ngic-ngigac habutowa homacnedi yenge yele yowa ngageningte, ailu yedi ngic-ngigac huckolec bamadicebanale kwesiibong. 16 Inguc aibong Yesu ye dameng homacne hegilecebalu himong kisiwa hike Wapong milockelu gawec.

Yesudi ngic monic hige-moleine homaicne bamadickewec.

Mat 9:1-8; Mrk 2:1-12

17 Gacgu dameng monicka Yesu ye Wapongte yowa edocebalu weduyeleme Farisaio
5:17Farisaio yenge Israel aling gocne yengele micne gocne domaibong. Yenge Mosesle yefe-yowa nga yefe-yowa gocne taockelu aibabangineng sasawa dondonne benang balaibeibong.
nga Wapongte yefe-yowale wewedu ngic gocne Galili nga Yudeya mac-kpisicne sasawa ailu Yerusalem taon, iwacni kwesilu ngiyeibong. Nga Sugucnele kucti Yesula fawecte huckolec bamadicebawec.
18 Inguc fawecte ngic gocnedi huckolec ngic monic hige-moleine homaicne dembengka lolu tengkelu mac kwelina Yesule haicka loningte ngagelu tengkelu hikeibong. 19 Tengke hikebong, ngic-ngigac homacnedi hedickelu domabong yenge ye Yesule haicka loningte yefe basackelu ngic yogo mac witina tengke felu mac witine nebocine basulumelu iwa yefe ngic hewacnginang Yesule emewa dembengkolec lobong hauwec.
5:19Dameng iwa mac witina ye wenengine, nga liti mac witina domame fec-wac ailu gaibong.


20 Haume Yesu ye ngage-ngagesingngineng nganilu yanguc miwec, “Ngic ga, bikicgone biyac miyac aigac.” i 

21 Inguc mime Wapongte yefe-yowale wewedu ngic
5:21Wapongte yefe-yowale wewedu ngic yenge bole habackang yanguc baibong: (1) Mosesle yefe-yowa nga yefe-yowa gocne taockelu kwelengkeibong yogo kwelengkeibong, nga (2) mic-tengtengte wewedu gocne yogo weduyeleibong, nga (3) Israel kot sugucne yenge ngic-ngigac aibabangineng mimilockolec ngage-wosaeibong.
nga Farisaio yenge yengilangkac yanguc ngageibong, “Ngic yogo ma ngicti Wapong fecnogac? Wapong moniyangti sugubac, bikic nalic hegiledaicte.”

22 Yesu ye kwelenginang ngagesiibong, yogo nganilu yanguc edocebawec, “Ngenge omale kwelenginang inguc ngagegabiyeng? 23 Weni yogodi efecne aigac, ‘Bikicgone miyac aigac,’ minoga me yanguc, ‘Ga fangkelu hikec!’ 24 Aime Ngicte Madec ye himongka bikic hegile-hegilele bole-yowa nga kuc facnogac, yogo ngageningte mibe ngagening.” Yesudi inguc milu hige-moleine homaicne yele yanguc miwec, “Ga edocgugabac, fangkelu dembenggone balu macgona hikec!” k 

25 Mime iwahac puling ngicti, ngic sasawa yengele dongewa fangkelu dembengine facaigac, yogo balu Wapong wacine feicne mitengkelu macina hikewec. 26 Hikeme sasawadi kwatacke-benangkelu mimedec ailu Wapong wacine feicne mitengkeibong. Ailu hangocebame miibong, “Nonge aibaba ingucne mi ngani-nganiine yakumac dongenonggengti nganigabeleng.”

Yesudi Liwai wackewec.

Mat 9:9-13; Mrk 2:13-17

27 Inguc mibong Yesu ye iwacni walu hike takes-baba ngic monic wacine Liwai, ye takes-baba macka ngiyeme nganilu yanguc edowec, “Ga wele na balaibecnuc!” 28 Mime Liwai ye fangkelu wiyac sasawa hegilelu Yesu balaibewec.

29 Aime Liwai ye Yesule ailu macina nosing sugucne lobeme takes-baba nga ngic-ngigac homacnedi yengeholec ngiyelu nosing noibong. 30 Inguc aibong Farisaio nga yengele Wapongte yefe-yowale wewedu ngic yenge ngagebong nalic mi aime Yesu mic-tengtengfocine yengele yowa kwelu yanguc miibong, “Ngenge omale takes-baba nga bikickolec yengeholec nosing misa nogaing?” l 

31 Mibong Yesudi yanguc miwec, “Socngineng huc mikac gacaigaing, yenge dotala mi hikecaigaing. Hucnginengkolec, yengibac dotala hikecaigaing. 32 Na ngic dondonne bacebanogale mi waiba, Na bikickolec yenge wacebabe kwelengineng hefaliyenale waiba.”

Yesudi nosing-sawe ailu ganogale nangeng yowa miwec

Mat 9:14-17; Mrk 2:18-22

33 Aime ngic-ngigac gocnedi Yesu yanguc uwacnoibong, “Yohanele mic-tengtengfocine nga Farisaio yengele mic-tengtengfocngineng yenge dameng homacne nosing-sawe galu mimiloc bole bacaigaing.
5:33Israel aling gocne yenge dameng yago nosing-sawe aiibong, ye kwele-umackolec dameng me yeicnele kwele wanogale, me Wapongte yowa me babafic banoga.
Nga gale mic-tengtengfocgone yengebac nosing misa nocaigaing.”

34 Inguc mibong Yesudi bafaliyelu miwec, “Ngic monicti ngigac-baba damengngine bangkaleme agofocine yengeholec galu nosing-sawe ainogale nalic mi midaicte. n  35 Aime gacgu dameng monicka yengelacni ngic yogo bahikedaingte, dameng iwabac, nosing-sawe aidaingte.”

36 Yesu ye taockelu nangeng yowa yanguc edocebawec, “Monicti ngakpi gbolicnacni sindacine helocke balu esecna nalic mi lolu gbododaicte. Inguc aidaictewa ngakpi gbolicne sowaledaicte aime gbolicne nga esecne wetulecepame nalic mi aidaicte. 37 Me madi waing gbolicne bokong sic socinedi baicne esecna kweme haudaicte? Inguc aidaictewa waing gbolicnedi bokong esecne yogo kwouckeme sowalelu misaine wadaicte.
5:37Bokong sic socinedi baiicne esecne ye umec sucine ingucne nosing hatac lobebeng sulumedaicte.
38 Waing gbolicnebac, bokong gbolicna kweme haudaicte. 39 Aime ngic monicti waing esecne biyachac nowec, yedi waing gbolicne nonale angac nalic mi ngagedaicte, yanguc sugu midaicte, waing esecne, yogo madicne benang.”

Copyright information for `MPP