Matthew 28

Yesu ye dongesiwacni fangkewec

Mrk 16:1-10; Luk 24:1-10; Yoh 20:1-18

Sabat dameng motome Sonda ubiyacte mac sae-saele Maria Magadalen ailu Maria agoine, yeke dongesi nganinogale hikeiboc.

Hikeebocka Sugucnele angelo monicti honocmengkacni wame memeya sugucne tapiliineholec bame yedi dongesile posa-nu yogo kpalundungkeme hikeme feina felu ngiyewec. Ailu ye haicine silicine latac-latac nga ngakpiine kwalacne kaguwa ingucne. Aime dongesi damong yenge ye nganilu hangocebame dengdeng kwelu homanogale ailu faibong.

Aime ngigac yeke hikeboc angelodi yanguc edocepawec, “Ngeke mi hangocngepana, ngeke Yesu malicpongka weicne, ye nganinogale kwesigabiyec, yogo ngagegabac. Aime yebac yawa mi fagac. Ye yowa edocngebawec, inguc hocne balaibelu fangkegac. Ngeke ya welelu mapicine nganinic. a  Ngeke i nganilu biyac hikelu mic-tengtengfocine yanguc edocebanic, ‘Yesu ye homackacni biyac fangkegac. Ye molickengelelu Galili prowinswa hikegac, ngenge iwa hikelu bafuwadaingte.’ Yowa i yakumac hocne edocngepabe ngagegabiyec.”

Inguc aime yeke hangocepame dongesi hegilelu belic-belicka mic-tengtengfocine siduc edocebanogale biyac gasackelu hikeiboc. Gasacke hikelu yefewa Yesu bafuwaboc yedi yanguc miwec, “Wenac-madic.” Inguc mime yeke emeina lelu ngosockelu higeina balu mitengkelu afeeiboc. 10 Aime Yesudi yanguc edocepawec, “Ngeke mi hangocngepana. Ngeke hikelu ngic hae-gbafocne
28.10Ngic yogo yenge Yesule mic-tengteng. Yesudi ngic hae-gba wacebawecte golowacfocine aigaing.
Galili prowinswa hikeningte edocebaboc, yenge iwa hikelu nganicnudaingte.” c 

Hudu-baba ngic yengele siduc

11 Aime ngigac yeke hikeebocka hudu-baba ngic gocne yenge dongesi damongkeibong yengelacni gocnedi taonka felu wiyac fikewec, ilec siduc depec-baba ngic micne edocebayackeibong. 12 Edocebabong yenge Yuda ngic micnefocngineng yengeholec mingagec ailu yowa hefeibong. Ailu yowa mipangkelu hudu-baba ngic dongesi damongkeibong, yengi yowa miningte moneng ilecsoc yelelu 13 yanguc miibong, “Ngenge yowa yanguc milu edocebadaing, ‘Nonge debocka gung faebengka yeicne mic-tengtengfocine yengi kwesilu kponggbongine hise balu hikegaing,’ ngenge inguc midaing. 14 Aime gawana ye yowa i ngagelu wiyac monic mi aingeledaicte, ilec ngenge mi hangocngebadaic. Nongi yeholec yowa nalic mingagec aidabelengte.” 15 Inguc milu edocebabong hudu-baba ngic yenge moneng i balu yowa edocebaibong, i mibong sugulewec. Aime kwesac-yowangineng yogodi Yuda ngic yengela sawelu fawecti yakumac fagachac.

Mic-tengteng bole badaing

Mrk 16:14-18; Luk 24:36-49; Yoh 20:19-23

16 Aime Yesu ye biyachac gbolicne gawecka mic-tengteng 11 yenge Galili prowinswa kupic monic iwa hikeningte ebocebawec, iwa feibong. d  17 Felu yeicne nganilu mitengkelu afeeibong, aime ngic moniyang moniyangti sugu kwelenginengti mi ngagepangkeibong. 18 Aime Yesudi haicnginang welelu yanguc edocebawec, “Ngagegaing, himong nga honocmengte tapili sasawa na biyachac neleyackewec. e  19 Ilec ngenge hikelu ngic-ngigac himongne himongne sasawa bacebabong nale mic-tengtengfocne aidaing. Ailu ngenge Mamac nga Madec ailu Tili Asule wacka misa lowayeledabiyeng. f  20 Aime nani yowa sasawa edocngebalu gaiba, ngenge yowa yogo sasawa balaibeyackeningte edo-weduc aiyeledabiyeng. Ailu ngagegaing, na hadengsoc hadengsoc ngengeholec gabe himongte dameng motodaicte.”

Copyright information for `MPP