b3:3Rom 2:29
c3:42Kor 11:18
h3:9Rom 3:21-22
i3:10Rom 6:3-5; 8:17
j3:121Tim 6:12,19
l3:141Kor 9:24
m3:151Kor 2:6
n3:171Kor 4:16
o3:19Rom 16:18
q3:211Kor 15:28,43-53

Philippians 3

Kristoholec gaga

Ilec yanguc taockelu migabac, ngic hae-gbafocne, ngenge Sugucnela wetackelu belic-belicka gadabiyeng. Na yowa molickelu kwelengkengeleiba, yogo hatacmac kwelengkengelenogale mi takicnugac, miyac. Ngenge yowa yogodi asa bacngebadaicte.

Ngic aibabangineng hoda ingucne wonongkolec gagaing,
3:2Israel aling yenge aling gocne bawacebalu hoda wacebaibong. Siduc yawa Poldi Israel aling gocne hoda wac yelewec.
yenge aibaba sowacne aicaigaing, ngenge ngic yogo yengele ngani-motolu gadabiyeng. Ngic i yenge kwesacngebalu yanguc mingelecaigaing, “Ngenge soc tofangineng helockedabiyeng.” Ilec ngani-motolu gadabiyeng.
Wapongte Asudi pasi nongilang bame afeegabeleng, nongilengti hocne soc tofangineng helockeicne ingucnehac kwelenonggang ngagesilu aicaigabeleng. Nongileng Kristo Yesule ngagebeng feicne aigac, ailu ngage-ngagesingnonggeng i socnonggengte maale monic mi ngagegabeleng. b 

Aime ngage-ngagene yogo aibabana lobe fanale ngagedacka. Aime ngic gocne yenge aibabanginang ngage-ngagengineng lobong facaigac, ingucnehac lobe fadecka midec, na silicine ingucnehac ewalicebalu aidacte. c  Aime fikebe hadeng 8 aiyemewa soc tofane helockeibong. Na Israel alingkacni nga Benyaminte fikesaweckacni. Na Hibru ngicbenang ailu Hibru alingkacni. Ailu Farisaio yengeholec Mosesle yefe-yowa balaibeiba.
3.5Soc tofa helockeicne yogo Wapongte yefe-yowa dondonne balaibecaigaing. Wapongti Yakobo Israel wac lacnowec. Ilec ailu fikesawecfocine Israel aling wacnaguibong. Yakobo madecfocine monic yogo Benyamin. Hibru yogo Israel aling esecneyac yengele wac monic. Farisaio yenge Mosesle yefe-yowa nga yefe-yowa gocne taockelu aibabangineng sasawa dondonnebenang balaibeibong. Ngic-ngigac ye nganibong yengele dongewa aibabaine madicne aicaigac.
,
e 
Ailu na yefe-yowa monic mi hegilelu ngic dondonne gaiba. Ailu na Mosesle yefe-yowa basanangkenogale dogbac ailu Yesule habu weyebic aiyelelu gaiba. f 

Ailu molickelu wiyac bagalu ngagebe yogodi baficnudaicte ingucne aiwec, i hocne yakumac Kristole ailu ngagebe wiyac sasawa yogo babaficine mikac aigac. g  Na Sugucnene Kristo Yesule babafic i ngagebe feicnetowa aigac. Ilec ailu esecne galu wiyac sasawa aiiba, yogolec ngagebe babaficine mikac aicaigac. Gagana Kristo banogale ailu, wiyac sasawa ngagebe yafoine aiyackewec, yogo biyac hegileyackeiba. Mosesle yefe-yowa balaibelu neicne tapiliwa ngic dondonne nalic mi aidacte. Wapongti ngage-ngagesingte yefe yanguc lowec, ngic monic ye Kristo ngagesingkedaicte, ye ngic dondonne aidaicte. Ingucnele ailu Kristola wetackebe Wapongti ngic dondonne wacnume madickegabac. h  10 Ailu Kristo yeicne nga Wapongte tapili yeuctihac Kristo homackacni bagboliyewec, i homacnehac ngagenogale ainelegac. Ailu yeholec galu doic ngagelu ye homawec, ingucnehac galu homanogale ngagegabac. i  11 Inguc aigacgu homackacni gboliyelu fangkenogale ngagesigabac.

Gbelong ainogale gasackedamec

12 Na gagasac bole yogo biyachac bamoctoiba, me biyac ewalilu gbelong aiiba, na inguc mi migabac, miyac. Kristo Yesudi bacnuwec, ilec ailu yogo banogale gagasac bole balu gagabachac. j  13 Ngic hae-gbafocne, na gbelong ailu wiyac biyachac baiba, inguc mi ngagesigabac. Ailu bole moniyang yanguc balu gagabac, wiyac biyachac aiiba, yogo hatacmac mi ngagesilu gagabac. Ailu wiyac lobewa fikedaicte, i banogale bole sanangne balu gagabac. 14 Ailu na biyacbenang maawa
3.14Maa yogo Kristo ingucne ainogale migac.
hikelu gbelong ailu wiyac banogale gasackegabac. Yogolec hocne Wapongti wacnuwecte Kristo Yesuholec wetackelu honocmengka gadacte. l 

15 Aime ngage-ngagesingka biyachac sugulelu sanangkeibeng, nongileng sasawadi inguc gasackenogale ngagesidabeleng. Aime ngage-ngagengineng fulucnagudaingtewa, Wapongti ngage-ngagengineng yogo inguchac bame yegengkengeledaicte. m  16 Ailu yowa biyachac ngagelu gaibeng, yogohac balaibelu hikedabeleng.

Ngage-ngage madicne

17 Ngic hae-gbafocne, nani molickengelebe ngenge yogo nganilu silicine ingucnehac balaibecnudabiyeng. Ailu ngic nongele silic balaibecaigaing, ngenge dongengineng yengela nganicebalu balaibedaing. n  18 Molickelu dameng bocyac yowa edocngebalu gaiba, yogo yakumac hiyalu donge-misane wame hatacmac edocngebagabac, Ngic bocyac yengi Kristole malicpongte ngaba ailu gagaing. 19 Wapongngineng kwesacine, yogodi nosingte gobe ingucne aicaigac. Aime aibabangineng gameineholec, yogodi yengele kwelewa madickecaigac, ailu yengele ngage-ngage yogo himongte gagawa fagac. Ngic ingucne yenge homaebongka gagangineng sowaledaicte. o 

20 Aime nongileng wacnonggeng honocmengka fagacte honocmengte aling gagabeleng. Ailu asa-baba ngicnonggeng Sugucne Yesu Kristo honocmengkacni kwesidaicte, yele wangec gagabeleng. p  21 Ye wiyac sasawa yeicne bagewa lonale tapili facnogac. Ailu yele tapili yogodi himong-socnonggeng waweweine yogo bafaliyeme yeicne soc ingucne tapili nga hibi-angoctowaineholec aidaicte. q 

Copyright information for `MPP