a[Prs 19:31; 20:6; 1 Sml 13:8-14; 15:1-24; 28:7-8]

1 Chronicles 10

Sol aga ogwa dabe dali isali

(1 Sml 31:1-13)

Te Filistia augwaligo te Israel dabe dali te bulu du Gilboade boi hwįnama, tama te Israel bidi hauwa te hwįani madi isai. Te gasa Israel dabe te hwįani tagalama wi pai dao. Sol me te aga ogwa dabe dali wi palio, tiali goli te Filistia dabego augwali pobelama, te Solgo ogwa sela ela muai, te Jonatan, me Abinadap, me Malkisua dao. Te bidi dabe augwaligo te Sol pobeyu, te hwįbo bomo mu yali. Tama te Filistia mebago te ene dabe Solba enani madi tama te ene mebago aga tigi dolama, te aga dolainu yalio. Tama tialima, agai te hwįbo nai tolasa bilibo gesi bidi i olama, te agaba te tiwai po walio, “Te nago bainat hwą selama, ena ela muao. Tiyu, te bulu badu haiden bidi te Filistia dabe asu, te enaba hagoma eyu, te ena ela muidalio,” wali. Tiali goli te gesi bidi wi mu ebaso, tama agai bainat hwągo aga elebeo. Tama tibaso, Sol aga bainat hwą aga digi tolalu badi tama te bainat hwą poaiba ugwadu degasa dulama, te hwą poaigo enama isalio. Te gesi ogwa bidigo suali, te Sol isaibaso, teda aga me aga digi aga bainat hwą poaiba degasa dulama isai dao. Tialima te Sol dali te aga ogwa dabe sela dali isali, te aga hani mu silalio. Tama te odogo bulude bidali Israel tigidali, augwaligo suali, te augwa ami bidi dabe te Filistia dabede wi palio. Tama me augwaligo te tama po odali, Sol dali aga ogwa dabe dali isalio po odalio. Tialima augwa taun dabe digi tagalama, te augwali wi pepelawalio. Tama nosali te Filistia dabe augwa te Israel dabego te taun dabe sagaselama bidalio.

Hwįani silama da, teda te nosali badu te Filistia dabe augwa te hwįbode isali Israel bidi dabego hwįyu gudali ugwa dabe pepeda sągi pelama, tama te isali Israel bidi dabego doado bage salio. Tama augwaligo suali, te Sol me aga ogwa dabe daligo tigi dabe te Gilboa bulu dude munalubo suali. Tialima augwaligo te Solgo tobolu togwalio. Tama augwaligo te tobolu dali, te agai hwįani nai dabe dali sela palio. Tama augwa te kantri Filistia dabeba te sę yali po me te augwa tibo godiba me te we bidi dabeba po sela pabo bidi dabe tagala palalio. 10 Tama augwa te tibo godigo lotu bede te Solgo boi hwįyu gudali nai doado bage muanio. Tama augwaligo te Solgo tobolu selama, te augwa tibo god Dagon muani be dagade kęnanio. 11 Tama te taun Jabes te Gileat tǫde bidali Israel dabego te Filistia dabego te Solde te tiali sę po odalio. 12 Tialima te Jabes boma pai bidi dabe pelama, te Sol me aga ogomanigo tigi dabe dali sigi pelama, te Jabesba sela asalio. Tama augwaligo te Solgo dili dabe te aga ogwa dabego dili dabe me sigi pelama, tama augwaligo te Jabes taunde elalubo moni ni ok dologode pubulalio. Te augwaligo augwalide homu dene dwai ebaso, te augwa nai osogo gisilama te Sadede deli bidai dao.

13 Sol isali, magi baso meni, agai Genuai Bidigo po bugagia wali pabeo. Menio. Agai te Genuai Bidi bomai po sela sąwani. Tama agai te isali bidi dabego noma bidiba hanalu te agaba mena sunumi ola mabo te agai wali painu yali, a  14 tama agai Genuai Bidiba hanaluama te agabolo ola momainogo ebeo. Tibaso, Genuai Bidigo aga ela munama, tama Devit, te Jesigo ogwa, te king pedelai dao.

Copyright information for `MPS