a[Bom 10:8]
b[Sai 25:14]

1 Chronicles 14

Devit Jerusalemde king bidali

(2 Sml 5:11-16)

Te king Hiram te taun Tair bidigo te agai gavman ofisa bidi meba te Devitba tagala palali. Tama me agai te ni bǫ tigi dabe me te kapenda bidi dabe dali, te masigigo be nigibo sę yabo bidi dabe me tagala palali, te augwaligo king Devitgo genuai wiegi yai be sę emainogo yai dao. Devit agaba te sę dabe pedalubo sulama, tama agai te tama koneani, Genuai Bidigo digi aga te Israel king mu pedalumainu ilali homu yalio. Tama me agai koneai, Genuai Bidigo aga we bidi dabe tau sainu ebao homu yali, tama tiyu Genuai Bidigo te Israel tǫ kantri te wiegi yai mu pedalumainu ilalio. a 

Devit te Jerusalemde bidu agai te we meba salio, tama agai te wai dabe meba ame nanio. Te agai ogwa dabe nogi e tama da, Samua, me Sobap, me Natan, me Solomon da, tama Iphar, me Elisua, me Elpelet, me Noga, me Nefek, me Jafia da, tama me Elisama, me Beliada, me Elifelet dao.

Devitgo te Filistia dabe dali boi hwįnama, augwali aiyaba elaluali

(2 Sml 5:17-25)

Te Filistia dabe augwaligo te e tiwai po tama odali, te Israel dabego Devit te augwa king pedelali po obaso, te Filistia dabe hogodama, te boi hwįgi pelama, aga sainu yali. Tialima Devitgo te Filistia dabego te sę yainu ebo po odama, te agai aga ami bidi selama, te augwaliba boi hwįgi painu yalio. Te Filistia dabe augwali te odogo bulu Refaimba dulama, tama augwaligo te bulude bidibo we bidi augwaliba dwai sę ilalio. 10 Tialima Devitgo Genuai Bidiba te tiwai hanalu wali, “Nago homugo eno te Filistia dabe augwaliba boi hwįgi homu eba agawe, ma meniwe? Te ena pobaso da, teda nago ena tau siyu, te augwali aiyaba elalumainu yaibawe, ma meniwe?” wali. Tama Genuai Bidigo te tiwai po agaba wei ponani, “Awe, nage pao. Te eno augwali nago nogoba munama, te nago augwali aiyaba elalueibao,” te po wai dao.

11 Tialima Devit dali, aga ami bidi dabe dali, augwaligo te Filistia dabe dali hwįgi pelama, te augwali aiyaba elaluai. Te agai te tiwai po wali, “God te bomai wę tiwai asama, te eno nogode agai eno boi bidi hani dabe togolalio,” wali. Tama augwaligo te bulu nogi te tiwai wali, Genuai Bidigo Te Hani Si Togolobo Dao, walio. 12 Te Filistia dabe augwali wi peyu, te augwa tibo god taga palio. Tama Devitgo te tama po aga ami bidi dabeba obaso, te augwaligo te tibo god dabe isiba ulai dao.

13 Tialima nosali te Filistia dabe te odogo bulu Refaimba ma aselama, te augwaligo dwai sę te we bidi augwaliba ma yagasalio. 14 Tama Devitgo Godiba te tiwai po hanalu wai, “Eno magi sę yagawe?” Tama Godigo te tiwai po wei ponani, “Dagego augwaliba boi hwįgi pao, tialima dage augwali gesabidi dolo mu me pigio. Menio. Te dage augwali tudi badu pelama, te augwaliba hwįainu te ni balsam sili dolalubo pesagede te hwįabo sisi elaluao. 15 Tama dagego te bidi dabe augwali te ni abude bilibo sela wabo tiwai odaibao. Tialima dagego koneaibao, ena digi eno te Filistia dabe dali hwįainu polasa paibao. Tama dagego te sela wabo odobo sogo, te dage udayu, te augwaliba boi hwįgi pao,” te po wali. b  16 Tialima Devitgo te Godigo po wali pelama, te Israel augwaligo te Filistia dabe pobelama, te augwali dolali, te taun Gibeonde gagalasa pali, te taun Geserba usu nigi palio. 17 Te tigidali bulu tǫ kantri we bidigo Devitgo te tama sę yali po odama, te augwaligo Devitba genuai nogi manio, tama Genuai Bidigo digi te augwali Devitde wi emainu ilai dao.

Copyright information for `MPS