1 Chronicles 15

Augwaligo te Dąų Wali Bomai Po Muani Halobage sela pabo sisi elaluai

Te Devitgo aga be dabe digi te Jerusalemde sę yani, te Devitgo Taun dao. Tama me aga te Godigo Dąų Wali Bomai Po Muani Halobage muabo pesage me deli sisi elama, tama augwa te pesagede sel ugwa be sę yai dao. Tialima Devitgo te tama po walio, “Genuai Bidigo te Livai dabe dąį ilama, te Dąų Wali Bomai Po Muani Halobage tolabo bage dąį ilama, te agai sę sesemane sogo emainogo yali. Tama tibaso, te Livai dabego augwaligo naga te tedali halobage tolobo sę emainu dąį ilai dao,” wali. Tama Devitgo te Israel dabe tigidali te Jerusalemba sisinagasomainu i wali, te augwali pelama, te Dąų Wali Bomai Po Munolubo Halobage te agai sisi ilali pesageba sela asomainu yalio. Tama agai te pris dabe sisinani, te Arongo hani dabe, tama agai te gasa Livai dabe sisinani. Te Livai dabe nogi te tama da, Uriel, te Kohat hanigo tobolu bidi, te gasa 120 aga hani bidi dali, tama Asaia, te Merari hani tobolu bidi, te aga hani bidi 220 bidi dali, tama Joel, te Gerson hani tobolu bidi me, te aga hani bidi 130 bidi dali me, tama Semaia, te Elisafan hani tobolu bidi me, te aga hani bidi 200 bidi dali sisinani, tama Eliel, te Hebron hanide tobolu bidi, te aga hani bidi 80 bidi dali sisinani, 10 te Abinadap, te Usiel hanide tobolu bidi bidali, te aga hani bidi 112 bidi dali sisinagasalio.

11 Tialima Devitgo te pris Sadok me pris Abiatar i obadi, te Livai hani dabego tobolu bidi me i walio, te bidi Uriel, me Asaia, me Joel, me Semaia, me Eliel, me Aminadap, te tama tobolu bidi dabe i wai dao. 12 Tama agai te tiwai po augwaliba wali, “Dage te Livai deli hani dabede tobolu bidi dabe, dage dali, te duga hani dali, te Genuai Bidi gedude duga digi wiegi yai pedalubo kolesaga wali pao. Tama dagego te God, te da Israelgo Genuai Bidigo, Dąų Wali Bomai Po Muani Halobage sela asobaso usu yaibao, eno te sisi ilali pesage te buluba sesao,” walio. 13 “Te hasia dago sigi pali sogo te dage da dali me pisąwai. Te God, Genuai Bidigo, te dabolo dene mabo sę yali, magi baso meni, dago te dolo yai kolesaga wali pelama te Godiba bolo te dago mena kolesaga yabo te hanalubeo,” wali 14 Tialima te pris dabe me Livai dabe te augwa digi God gedude wiegi yai pedalubo kolesaga yalio, te augwa te Israelgo Genuai Bidi Godigo te Dąų Wali Bomai Po Muani Halobage sigi painu tama tilama, te sesai dao. 15 Te Livai hani dabego te halobage tolainu yali sogo, augwaligo te halobage tolobo kolesaga wali pali, te polobadu Genuai Bidigo Mosesbolo wali po tiwai gilama yali. Augwaligo te halobage ni palali ni te augwa nagede manama, te halobage tolasa pai dao.

16 Tama Devitgo te Livai hani tobolu bidi dabeba walama, te tęąbi weyu musik te halobage sela asobo sogo wabo Livai hani bidi meba dąį ilao po wali. Augwaligo te gita dabe me te brasgo nigai plet pou dabe me te elibo sę eyu, te musik hwą genuai u omainu ilama, te augwaligo wiegi yai homu pemene ebo sę hania ola mao wai. 17 Tialima te tobolu bidi dabego te bidi Heman dąį ilali, te Joelgo ogwa, me aga hani bidi te Asap, te Berekiago ogwa. Tama me augwaligo te Etan dąį ilali, te Kusaiago ogwa te Merari hani bidi. Te bidi dabego te tęąbi eyu te brasgo nigai plet pou elibo sę eyu yalio. Te tobolu bidi dabego te bidi sela tau sabo gasa bidi dabe me dąį ilali. Te Livai dabego te gita elebo sę elaluai. Te augwali mebago te gasa tobage gita me elali, te aga dogoni ugwaba ebo da. Te bidi dabe nogi da e tama, Sekaraia, me Jasiel, me Semiramot, me Jehiel, me Uni, me Eliap, me Masea, me Benaia da. Te mebago te gasa tobage gita me elali, te dogoni aiyaba dulalio. Te bidi dabe nogi e tiwai da, Matitia, me Elifelehu, me Miknea, me Obetidom, me Jeiel, me Asaia. Obetidom me Jeiel te bidi si te Godigo be sunumi tonalubo bidi hani dabede te sę ebo bidi me si dao. 22 Augwaligo te bidi Kenaia dąį ilama te halobage sela asobo sę tigidali tonaluali, magi baso meni, agai te tobage sę ebo mu koneai bidi. Kenaiago te tobage sę sesemane sogo tonalubo sę ebo bidi bidai. 23 Tama augwaligo te Berekia, me Elkana, me Obetidom, me Jehia, te me si me si bidigo te Dąų Wali Bomai Po Muani Halobage tonaluabo bidi dąį ilali. Tama augwaligo te halobage tolasa asobodu polasa pabo pris meba dąį ilama, te bu wabo nai biugel bu ola pomainu yali. Te pris dabe nogi e dao, Sebania, me Josafat, me Netanel, me Amasai, me Sekaraia, me Benaia, me Elieser dao.

Augwaligo te Dąų Wali Bomai Po Muani Halobage te Jerusalemba sesalio

(2 Sml 6:12-22)

25 Augwali sisi ela silibo si da, teda Devit dali, te Israel tobolu bidi dabe me te bidi sese umabo 1,000 ami tonalubo ofisa bidi dabe dali, augwali te Obetidomgo beba pelama, te Genuai Bidigo Dąų Wali Bomai Po Munalubo Halobage selama, te Jerusalemba sela palio. Tama te we bidi dabe augwali wiegi yai homu pemene mu yai dao. 26 Tama te Livai dabego te Godigo Dąų Wali Bomai Po Munalubo Halobage tolasa pabo sogo, te Godigo augwali tau salio. Tibaso, augwaligo te kibu bulmakau omai a naga olama si badi, te sipsip kibu omai me a naga olama si te Godiba ofa yai dao. 27 Devitgo te bobobage aiyaba tagalalubo ugwa augwaligo te gasa sawi yai nami ugwago nigai ugwa au yalio. Te Dąų Wali Bomai Po Munalubo Halobage tolobo pris dabe me te musik wabo prisgo me, te Kenaia, te sę tonalubo bidi, tigidaligo te Devitgo gudali ugwa au yali tiwai tobage au naga yalio. Te bobage ugwa daide ugwadu, Devitgo te prisgo gudubo nami ugwa me deli te muani, te augwa gasa sawi yai nami ugwago nigai dao. 28 Tama tiali kolesagade te Genuai Bidigo Dąų Wali Bomai Po Muani Halobage te tigidali Israelgo te Jerusalemba selasa pai. Augwa wiegi yai homu pemene elama i bomonama weyu, tama augwa te tobage biugel bu weyu, te brasgo nigali pletba elu, te tobage gita dabe me elali, tama te musik eliyu kulukulu genuai mu pedelalio.

29 Tama augwaligo te halobage te Devitgo Taun tomoba sesali sogo, Mikal, te Solgo wegi, te be habu dogwa sali windodu dolalu te augwali suali. Tama agai te aga bidi king Devit suali, te aga wiegi yai pemene dali te tęąbi eyu sasamano bilali, tama Mikalgo Devitgo te tama tebo kolesaga aga hagela eyu, tama aga dali dwai haliga sębę yai dao.

Copyright information for `MPS