a[2 Sml 11:1]
b[1 Sml 17:4-7]

1 Chronicles 20

Devitgo boi hwįnama, te Raba taun salio

(2 Sml 11:1, me 12:26-31)

Tigidali kibu be deli delide, te kedau ebo silainu ebo sogo, te kingo augwa ami bidi dabe odasa pelama, te boi bidi dabe dali hwįgi pomainu yalio. Tialima te nosali kibu bede Devitgo te Siria dabe aiyaba elaluali, tama te kedau silainu ebo sogo, Joapgo te aga ami bidi dabe selama, te Amon dabeba boi hwįgi palio. Augwaligo hwįnama, te Amon dabe aiyaba elaluama, te taun Raba bagulali, te augwa genuai taun da. Tiali goli Devit te hwįbo madi pabeo. Aga te Jerusalemde bidali.

Joap dali te Israel ami bidi dabe daligo te Amon dabe dali hwįbo bomo elama, te taun Raba selama tama mu dolai dao. a 
Tama Devit te taun Raba teba aselama, te kingo madi te Amon kingo tobolude sagasali. Te madi augwaligo te golgo nigali, te aga sęgę te 35 kilogram elaluai. Tama augwa te madi te gasa sawi yai wiegi yai masigi dabego au ilali. Tialima te Israel dabego te madi selama, te Devitgo toboluba muani. Tama me Devitgo te taunde mone hauwa sai dao. Tama agai te taun Raba we bidi tigidali selama, tama augwali te so me baria me sigi hwą mayu, augwaligo sę emainu yalio. Agai te tobage deli tigi poai kolesaga te tǫ Amon taun we bidi dabebolo te gasa we bidi augwaliba tama sę yalio. Tama nosali, Devit dali te aga ami bidi hani dabe dali augwali te Jerusalemba ma pai dao.

Te Israel dabe augwaligo te Filistia moni dobo dwai bidi dabe dali boi hwįani

(2 Sml 21:18-22)

Tialima te Filistia dabe dali Israel dabe dali si tomode te boi dala sai, te Geser taun pąde da. Te Israel me deli, te aga nogi Sibekai te Husa bulu bidigo, agai te moni dobo dwai bidi dabede te bidi me deli ela muani, aga nogi Sipai. Tama te Israel dabe augwaligo te Filistia dabe aiyaba elaluai dao.

Tama me sogo ma te Israel dabe augwaligo te Filistia dabe dali ma hwįani. Tama Elhanan, te Jairgo ogwago, te Lami ela muani, te Goliatgo ama te Get taun bidi da. Te Lamigo sesemone ene te genuai mu te ugwa hobolobo masin lum ain dili tiwai dao. b 

Tama nosali te Get taunde boi me ma dala selama hwįani. Te moni dobo dwai bidi dabede te dobo dwai bidi me deli bidali, te agai dili bobage ugwanu mu holai bidi. Aga nogo deli delide te nogo a naga me deli tama elaluai, te agai sągą me te tiwai elaluali. Agai dani dabe te 24 dao. Te bidigo te Israel dabe augwaliba posobo po wali, tama te Jonatan, te Samago ogwa, te Devitgo amago ogwago, aga ela muanio.

Te Filistia moni dobo dwai bidi nani dabedu te Get taun badu asalio. Tiali goli, Devitgo te aga ami bidi dabe daligo augwali ela muai dao.

Copyright information for `MPS