a[1 Kin 1:1-40]
c[Sai 28:1]
d[Bom 10:8]
f[Nam 3:5-9]

1 Chronicles 23

Te Devit te monu dabe mu ebaso, agai aga ogwa Solomon sa munama tama Solomon te Israel dabego king pedelai dao. a 

Devitgo te Livai dabego yabo sę dąį ilali

King Devitgo te Israel augwa polalubo bidi dabe sisinama, te pris dabe me Livai dabe dali sisinanio. Agai te po obaso, te bidi dabe augwaligo te Livai hani bidi dabe nedada palio. Augwaligo te Livai dabe te kibu be 30 yia edelali bidide gagalama nedalio, tama te Livai dabe nedada pali te bidi sese umabo mu te 38,000 bidi bidai dao. Tialima Devitgo te tama po wali, “Te bidi dabe augwalide te 24,000 bidigo te Genuai Bidigo tempel bede sę ebo tonalumainao, me te gasa 6,000 bidigo te ofisade pepa asębo kuskus bidi sę eyu, te po tų odobo sę ebo bidi bidimainao. Tama te me 4,000 bidigo te Genuai Bidigo be tonalubo bidi bidao, te gasa 4,000 bidigo te Genuai Bidigo nogi ugwaba sabo tęąbi wabo wiegi yai musik omainao. Eno te musik wabo haniani nai dabe nigali, tama augwaligo te nai dabe selama te musik elebo sę emainao,” Devitgo te po wali.

Te Livai dabede te augwali hani sela elaluali. Augwali te Livaigo ogwa selade te hani pedelali, te ogwa dabe nogi e dao, Gerson, me Kohat, me Merari. Tama Devitgo te Livai dabe te hani selade dobayali, te augwaligo augwa te sę dabe emainu yalio.

Te Gersongo ogwa dabe nogi e tama tiwai da, Ladan me Simei dao. Tama Ladango ogwa sela ame nani ogwa bidalio. Te gomunai ogwa te Jehiel. Te meba ogwa dabe nogi e tiwai da, Setam me Joel. Te sela bage augwali te Ladango hani dabede tobolu bidi bidali. Simeigo
23:9Te Simeigo ogwa dabe namba te ves 9 tede elalubo tiwai si te agai ogwa dabe te elaluali te ves 10-11 tede elalubo namba tiwai si elalubeo. Te mena namba dolo mu elalubowe, te dago konebe dao.
ogwa sela bidali. Augwali nogi e tiwai da, Selomot, me Hasiel, me Haran dao.
10 Te bidi Simeigo ogwa me si me si nama ogwa bidali. Gomunai ogwa te Jahat, tomo ogwa Sina, aga nogi me te Sisa. Te mebago nogi e tiwai, Jeus me Beria. Jeus de Beria sigo te ogwa hauwa me elalubeo, tama tiyu te augwali sigo waigo ame nani wai dabe te deliba sisą palama te deli hani dabe naga tama pedelai dao.

12 Kohatgo ogwa me si me si bidali. Augwali nogi e tama da, Amram, me Ishar, me Hebron, me Usiel dao. 13 Te Amramgo ogwa dabe nogi e tiwai da, Aron me Moses da. Genuai Bidigo Aron te aga ogwa dabe dali dąį ilama, te we bidi augwaligo te Genuai Bidiba dąį ilama hasia podolali nai dabe te Aron aga ogwa dabe dali augwaligo tonalualio, tama augwaligo te sę dabe sesemane sogo idualio. Tama te Genuai Bidiba lotu wabo sogo tigidali augwaligo te wiegi yai denami ebo hano ilibo nai pauda ulubo sę yai dao. Tama me augwaligo Genuai Bidigo sę eyu, te we bidi augwaliba wiegi yai sę bugagia ilimainu te Genuai Bidiba hanalubo sę yai dao. c  14 Tialima te Mosesgo ogwa dabe, te Godigo bidigo ogwa dabe, augwali te gasa olo Livai hani dabe tiwai pedelai dao. 15 Mosesgo ogwa dabe nogi e tama da, Gerson me Elieser dao. 16 Gersongo gomunai ogwa te Sebuel dao. 17 Te Eliesergo ogwa deli digi mu bidali, agai nogi da Rehabia da. Tialima Rehabiago ogwa hani hauwa elalualio.

18 Ishar te Kohatgo ogwa, tama Ishargo gomunai ogwa te Selomit bidali. 19 Te Hebron, te Kohatgo me ogwago te ogwa me si me si nama bidali. Gomunai ogwa te Jeria, tomo ogwa te Amaria, te sela ogwa Jahasiel, te ene nanobo ogwa wali te Jekameam dao. 20 Tama Usiel, te Kohatgo me ogwa mego te ogwa si bidali. Gomunai ogwa te Maika, te tomo ogwa Isia dao.

21 Merari te Livaigo ogwa da, tama te Merarigo ogwa dabe nogi e tiwai elalubao, Mali me Musi. Te Maligo ogwa nogi e tiwai elalubao, Eleasar me Kis da. 22 Eleasargo te wegi dabe naga ame nai bidali, tama agai te wegi dabe te augwa deli hani bidi dabego sali, te Kisgo ogwa dabego sai dao. 23 Musigo ogwa sela bidali. Augwali nogi e tama da, Mali, me Eder, me Jeremot dao.

24 Te tigidali bidi augwali te Livaigo hani wai dabe da, tama augwali te Livai augwa hanide tobolu bidi hani bidali. Te bidi dabe augwaligo te Livai hani augwaligo nogi dodolama asęsędulali sogo, tama deli deli bidi nogi te augwa bulali wąį hani me deli bidigo ame nani wai dabe te nogi muanio. Tama te Livai dabego kibu be bidi sese deli edelali da, augwa te Genuai Bidigo tempel bede sę eyu yai dao.

25 Devitgo te tama po wali, “God, Israelgo Genuai Bidigo, te agai we bidi augwaliba bugagia bidabo bodolu mawai, tama aga da te Jerusalemde sesemane sogo bidaibao. 26 Tama tialima te Livai dabe augwaligo te Genuai Bidigo sel ugwa be tolasa bilali sę me te lotu wabo nai dabe tolali sę me munu ma egobeo, te tobage sę ebo sogo te silali dao,” wali. d  27 Tama nosali, te bidi dabe augwaligo te Devitgo simanobo po wali pelama, tama augwaligo te Livai hani dabe nogi asębo sę yali. Te Livai bidi dabego kibu be bidi sese deli edelebaso da, teda te bidi dabego augwaligo nogi mubo pesageba muani, augwa te Genuai Bidigo bede sę emainu yai dao. 28 Te Livai dabego sę e tiwai elalubao.
23:28Te Devitgo wali po te ves 26 tede silali subo tiwai yali. Tialima bidi mebago homugo te ves 28du 32ba elalubo te po dabe, te me Devitgo po elaluba homu yalio.
Augwaligo te Genuai Bidigo bede te Arongo hani tau sabo sę elaluaibao. Tama augwaligo sę te bidi sisinibo pesage dabe me te Genuai Bidigo obo habu tomode tonalubo sę elaluali. Tama te dis me plet dabe te Genuai Bidigo nai da olama sa muani nai, te Genuai Bidigo gedude meda pedelai baso da, teda te Livai dabe augwaligo te nai dabe wiegi yai ma pedalumainu ebo sę elaluai dao.

Tama me te Livai dabe augwaligo te tobage gasa sę te Genuai Bidigo be tomode ebo sę elaluai dao.
29 Augwaligo te Godiba mabo bret tonalubo sę yali, tama te wit ulubo ofa ebo plaua me tonalubo sę eyu, tama te bisket dabe tonalu te avende ulubo ofa dabe tonalu yali, tama augwa te wel dali taluama ulubo plaua me tonalubo sę yai. Tama me augwaligo te ofa yabo nai dabe dagala mubo sę elaluai dao. 30 Tama te tigidali sogo kigamu me pio augwa te Genuai Bidi gesabidi pąba asobo sę elalu, te wiegi yai pemene eyu agai nogi ugwaba sabo sę yalio. 31 Tama augwaligo te tobage deli kolesaga te tigidali Sabatde te ofa ulubo sogo eyu, te gesi polua genuai bodolu side me, te gasa lotu wabo genuai side te sę yalio. Te bomai pode te po wai te Livai dabe nisu naga bidigo te sę dabe te deli deli sogo yabo bomai po elaluai. Sesemane sogo te Livai dabego te Genuai Bidiba lotu wabo sę elaluai dao. 32 Te Livai dabe augwaligo hasia bolo te Genuai Bidigo sel ugwa be tonalubo sę eyu, tama nosali te Genuai Bidigo tempel be dali tonalubo sę yali. Te augwa deli hani dabe tau sabo sę me elaluai, te Arongo pris hani dabe, te augwaligo sę te Genuai Bidigo tempel bede yai dao. f 

Copyright information for `MPS