a[2 Sml 7:1-16; 1 Sto 17:1-14]

1 Chronicles 28

Devitgo te genuai bidi dabe augwaliba te Genuai Bidigo tempel be sę ebo kolesaga po walalio

Devitgo te Israel tigidali genuai bidiba po ola tolu, te Jerusalemba sisinagasao po walio. Tibaso te Israel hani dabe augwa kiap polalubo bidi me, te kingo sę ebo genuai hani bidi tonalubo tobolu bidi dabe me, te deli deli hani sibi dabe tonalubo tobolu bidi dabe me, tama te kingo nai doado bage tonalubo bidi me te augwa ogwa dabe dali, te kingo bede sę ebo tonalubo bidi dabe dali me, te bomai ami bidi dabe me, tama te tigidali gegunai bidi dabe te Jerusalemba sisinagasao po wai dao.

Tialima king Devit dolugulama augwaliba te tiwai po walali, “Dage eno hani ama dabe, me te eno we bidi dabe, te eno dageba wabo po odiąo. Eno bomai homu elama te Genuai Bidigo Dąų Wali Bomai Po Muani Halobage muabo wiegi yai be sę yaibao homu yali, tama te be da te dena Godigo dugabo nai sia sai tiwai elalueibao. Tama eno te be sę yabo doado bage sisinani. Tiali goli Godigo enabolo e tiwai po walio, ‘Devit, nage te ena pageba asabo we bidi augwaligo lotu wabo be sę yabo dąį ilali bidi nage menio. Magi baso meni, nage te ami bidi bidali sogo nago te bidi hauwa ela muai dao,’ Godigo enabolo te po wali.”

“Tialima God, da Israelgo Genuai Bidigo, ena dąį te eno ogwa dabe dali dąį ilama, te Israel sesemane bidabo sogo te Israel tonalumainu yalio. Hasia bolo agai te Judago hani dąį ilama, te Israel hanigo polalubo bidi hani bidimainu nigilali. Tama te Juda hanide agai eno ayago hani sibide dąį ilali. Tama nosali, Genuai Bidigo aga homu wali digi pelama, tama eno ama dede dabe tomode ena dąį ilali, tama agai ena te tigidali Israel hanigo king bidimainogo ilai dao. Tama agai enabolo ogwa hauwa mani, tama te ogwa dabe augwali tomode agai te Solomon dąį ilama, te Israel we bidi tonalumainu yali, te Genuai Bidigo tǫ kantri dao. Tama Genuai Bidigo enabolo te tiwai po wali, ‘Nago te ogwa Solomongo tama eno be sę badi, te be sesegede elalubo we bidi bilabo pesage dali nigibo sę me yaibao, magi baso meni, eno aga dąį ilama aga eno wai bidimainu yali, te ena agai aya bidaibao. Tama agai eno bomai po me eno po dali wali pabo sę bomo eyu, te agai megi ebo sę tiwai ebaso da, teda te eno agai hani bidi dabede te sesemane bidada pabo sogo te king pedaludaibao,’ Genuai Bidigo enabolo tama po wali,” Devitgo te po walio. a 

Tama Devitgo te we bidi augwaliba te tiwai po ma walio, “Tialima te dena Godigo gedude me, te dage tigidali Israelgo gedude, dage te Genuai Bidigo we bidi dabe, eno te tiwai po dolo mu dagebolo obao. Dagego te bomai po tigidali bugagia wali pao, aga te God, dago Genuai Bidigo dabolo manio. Dagego te tiwai ebaso da, teda dage te wiegi yai tǫde bidaibao, tama te tǫ te dagego tǫ mu elalueibao. Te nosali dagego hanigo wai dabego me te tǫde sesemane bidada pidu, bidada paibao,” te po wai dao.

“Tialima nage Solomon, eno ogwa da, eno te tiwai bomai po nageba obao. Nago homu kolesaga deli naga elaluao, te naga ayago God dologode bidao. Te nago agai homu wali pabo sę bomo mu yao. Nago te tiwai yao, magi baso meni, Genuai Bidigo dago homude magi homu te tigidali agai koneaibao. Te nago agai godolo yabo kolesaga wali pabo sę bomo ebo kolesaga sobaso da, teda te nago aga bugagia konemainu yaibao. Tiali goli nago aga tudiba mubaso da, teda agai nage sela sąnama, te sesemane sogo agai nage tudiba mueibao. 10 Tialima megi da, bugagia odao. Genuai Bidigo nage dąį elama, nago te agaba te we bidi dabego lotu wabo tempel be sę emainu yai. Tama tialima nago bomo elama te sę yao,” Devitgo te po aga ogwa Solomonbolo wai dao.

11 Devitgo te po ola silama da, tialima agai te Solomongo te Genuai Bidigo tempel bede yabo po asęani nai salio, te sę yabo nai piksa dabe wali pelama, te sę emainu yai. Tama agai te asęani nai elalubo pepa te Solomonba mawai. Te asęani elalubo piksa dabede te Genuai Bidigo be habu tigidali piksa elaluai, te gesabidi badu elaluali be habu dabe da, te nai doado bage muabo be habu dabe me da, te ugwadu daide elalubo dwasianu be habu dabe me, te tomode elaluabo genuai be habu dabe me, te Tedali Gasagi Yai Mu Be Habu me, te Dąų Wali Bomai Po Muani Halobage muabo pesage me nigilali. Te Dąų Wali Bomai Po Munalubo Halobage muabo pesage da, te we bidi augwaligo dwai sę yali sęgę sela sąbo madi elaluai dao. 12 Tama me te nogi asęanide te tigidali nai te Godigo Mobo Noma Bidigo Devitba ola mani, te sisinabo pesage te Genuai Bidigo tempel be sę yabo pesage nigabo, me te piksa noma dabe elalubo ola mani te sisinibo pesage bagulali habu dabe, me te Godigo bede mone mubo be, me te Genuai Bidiba dąį ilama te bidi dabego mabo wiegi yai nai dabe ola mawai dao.

13 Tama me te asęani pode te pris dabeba me Livai dabeba te augwali hani deli deliba te sę yabo kolesaga po dąį eyu, te Genuai Bidigo bede sę yabo kolesaga po obadi yali. Tama te asęani pogo te po weyu, te Genuai Bidigo bede sę yabo plet dabe nigibo kolesaga yabo po walio. 14 Te asęai elalubo pode te nisu naga gol me silva selama, augwaligo te tobage kap me plet dabe nigimainu yali, 15 tama te sole lam dabe me, te lam ni dili muabo nai dabe me, 16 te tebol sai dabe nigabo ola mabo po asęai elaluai. Te tebol sai augwaligo te golgo nigali, te augwaligo Godiba mabo bret muabo tebol sai dao. 17 Tama te asęani po me te tiwai elaluali, te nisu naga wiegi yai gol augwaligo selama, te gąų yai na pok dabe te dis dabe me kap dabe nigabo po asęani elaluai, te nisu naga silva me gol dabego augwaligo te gasa dis dabe nigao po asęnama elaluai dao. 18 Te asęani pode te nisu naga wiegi yai gol augwaligo te selama, te wiegi yai denami ebo hano ebo ofa yabo pauda ulubo alta nigibadi, tama nisu naga golgo te ensel noma si nigibadi yaibao, te augwa si bogo dinigąlu te Genuai Bidigo Dąų Wali Bomai Po Munalubo Halobage daide elalueibao. Te ensel dabe te Genuai Bidigo gasaba pabo karis tiwai dao.

19 Tialima king Devitgo te po wai, “Te asęani elalubo piksa tigidali, te Genuai Bidi aga digi enabolo bugagia ola mobaso, eno te asęanio,” wali. 20 Megi da, king Devitgo Solomomba te tiwai po wali, “Nage bomo elama mu dolalu, te sę yao, te haniani sęgęgo nage aiyaba elalumainu ebaso te tagalao, magi baso meni, God, eno Genuai Bidi, te nage dali bidiyu, te nage tau saibao. Agai nage me tagalogobeo. Menio. Te aga nage dali bididubadi nago te be sę tigidali silibo siba usu naibao. 21 Dago te pris hani dabe me te Livai dabe te Godigo bede te tobage tigidali sę yabo bage dąį ilalio. Te haniani sę ebo page koneai bidi dabe augwaligo nage tau sainu tonalubao. Tama me te polalubo bidi dabe, me te tigidali we bidi dabego dali, augwaligo te nago po tigidali wali pabo dola sai naga elalubao,” Devitgo te po aga ogwa Solomon dali wai dao.

Copyright information for `MPS