a[Gag 1:26-27]
b[Gag 2:18-23]
c[Sai 24:6-8; Jer 31:31-34]

1 Corinthians 11

Polgo po weyu te Tedali Mobo Bidigo mabo wiegi yai sę ebo me te lotu wabo wiegi yai kolesaga yabo po wali

(Dąį 11-14)

Te we bidi tigidali agai augwali tau somainogo eyu Krais agai aga digi aiyaba muyu bidali. Tama ena me eno agai te yali kolesaga wali pabo dao. Tama dage me dagego ena wali asiyu, tama te tiwai kolesaga naga yao.

Polgo te lotu wabode tobolu halubo kolesagade ebo po

Dagego sesemane sogo ena homugo koneama tama eno te selama dagebolo mani po tigidali dąų eyu wali pabo dao. Tama tibaso, eno te po obao, dagego wiegi yai kolesaga mu ebo dao. Me ma, te dagego ena te po hanalu wali, “Te da deliba sisinama tama Godibolo po weyu, tama Godigo po odoyu tebo sogo, te dago we dabe sibi augwaligo augwa tobolu te nami ugwago haluaibawe ma meniwe?” te po dagego ena hanalu wai dao. Tiali goli eno homugo hasia dagego te po konemainogo obao: te bidi Kraisgo tobolu bidi te God dao, tama tigidali bidigo tobolu bidi te Krais dao, tama wego tobolu te aga bidi dao. Te dage deliba sisinama tama bidi mego tobolu haluama tama Godibolo po weyu, ma te Godigo po pusuyu da, te bidigo aga tobolu bidi Kraisba hale mabo dao. Te dwali. Tama we me deligo te aga tobolu halusiąma tama Godibolo po obaso, ma Godigo po pusubaso da, te agai aga bidigo tobolu bidi tama tiwai bidiyu, aga aiyaba elalubo dao. Te dwali. Tama tiyu da, te aga te hale isąbo moni tųdu bilibo we tiwai dao. Te tobage dwai penani kolesaga ebo we hale ilimainogo augwaligo aga tobolu nisi tigidali mu poabo dao. Tama te dage tomode te we me deligo aga tobolu halusiąma tama Godibolo po obaso, te wego te sę ebogo aga bidi tama aiyaba elalubaso, aga tobolu nisi mu poa yao. Tiali goli we aga tobolu nisi mu poabo te moni hale iliyu da, teda te we te lotu obadi aga tobolu te nami ugwago halumainao. Bidigo te aga tobolu me haluamuo. Magi baso meni, te Godigo bidi nigali sogo agai aga digi tiwai nigalio, tama te bidibolo Godigo aga digi wiegi yai homu kolesaga tiwai mani. Tiali goli te we aga te aga bidigo kolesaga naga elalubo dao. a  Magi baso meni. Godigo bidi nigali te wego tigigo me nigibeo. Menio. Agai we nigali te bidigo tigigo nigai dao. Tama Godigo te we homu koneama tama bidi nigilama aga tau somainogo me ebeo. Menio. Agai bidi homugo koneama tama wego aga bidi tau somainogo nigalio. b  10 Tama tibaso, te Godigo sę ebo ensel mobo bidi augwaligo te we aga bidi dologode bidibo sumainogo eyu, te wego aga tobolu te nami ugwago halumainao. 11 Tialima da we bidi te dena Genuai Bidi dali wadoloyu bilibode, tede te we naga tedali bidiyu tama bidi meniama, tama bidi naga tedali bidiyu, tama we meni eyu me ebeo. 12 Menio. Godigo hasia sogo te we bidigo tigigo nigali, tama tialima megi te tiwai te agai bidi wego tigide nigilama pedalobo dao. Tiali goli God da te tigidali nai nigali bidi mu dao.

13 Duga digi te eno megi wali po dagaliąo. Te wego tobolu halusiąma tama Godibolo po wabo, te kolesaga usu egowe? 14 Te we bidi dena kolesaga digi te tiwai dagebolo ola mabo dao: te bidigo bobage tobolu nisi elalubaso da, te dolo meni. 15 Tiali goli te wego bobage tobolu nisi elalubaso da, te aga wiegi yai au yabo nai elalubao. Magi baso meni, Godigo bobage tobolu nisi agabolo mani te aga tobolu halualumainogo yali. 16 Tialima, bidi me deligo te wego Godibolo po obadi aga tobolu haluabo sęde konila po wabo homu eyu da, te agai koneao, dago gasagi yai kolesaga me elalubo meni, tama gasa bulude bidibo Godigo po odobo we bidi hani dabego me te gasagi yai kolesaga me elalubo menio. Da tigidaligo te we aga tobolu haluabo kolesaga wali pabo dao.

Te komunion nai tubo po

17 Tialima megi eno te bomai po meba dagebolo mawainogo ebao, tiali goli dagego te ebo sęde te eno dage nogi ugwaba siyu dagego wiegi yai kolesaga mu ebo dao te eno wagobeo. Magi baso meni. Te dage sisinibo si, te wiegi yai kolesaga me pedalobeo. Menio. Te dwai kolesaga pedalobo dao. 18 Tede hasia bolo eno te po obao: te dage lotu wainogo sisinibo sogo, dage tedali tedela pabo dao. Eno te tiwai po dagede odobao. Tama eno homu te po meba te mu po dao, dagego te tiwai ebo dao. 19 Awe, eno koneani, te dage tomode te Godigo pode homu mu kęą pai we bidi augwali hania hanilama pedalomainogo eyu, te dage bidi mebago pode dwasianu tedela pabo kolesaga te me sogo pedalaibao. Te eno koneani. 20 Tialima dage tigidali sisinibo sogo dagego te dago Genuai Bidigo komunion nai tubo kolesaga ebo dao. Tiali goli te mu meni. 21 Menio. Te dage tedelama, tama dage tigidali deli deligo te duga digi duga nai naga polo selama tama tubo dao. Tama me deligo nai tubo silisąbadi, tama mego gasa bage dali aga nai dobasiąma te aga nai tubo polo silama, tama te wain bomai ąį hauwa tulama wabo pabo bidi tiwai eyu ebo dao. 22 Magi basowe? Te dagego nai tuyu wę tuyu yabo be elalubao. Te duga bede duga nai hasia tuao, tama nosali deliba sisinama te komunion nai tuao. Ma, dagego homugo te Godigo po odobo we bidi te olo nai tiwai da homu elama, tama dagego te meba nai meni yani ama dedebolo hale mabo homu eba, agawe? Tede eno mena po dagebolo wagawe? Ma, eno dage nogi ugwaba somainogowe? Menio. Te sęde te eno dage nogi ugwaba munu me sogobeo.

23 Magi baso meni. Te eno dagebolo mani po te eno dago Genuai Bidide naga te ola mani po sali. Te e tiwai dao: te pio hulide Judasgo Jisas te Juda dabe boi bidigo nogoba musiąbadi, te sogo pio hulide te Genuai Bidi Jisasgo 24 te bret selama, tama te naide Godibolo puba hwi po olama, tama te bret pebedama, tama aga dali bidali bidi dabebolo mayu, te po wali, “Te eno tigi dao, te eno dage tobade mobao. Dagego tigidali sogo tama tidu gebo si ena homugo koneao,” agai te po wai. 25 Augwaligo augwa hulide tuabo nai tula silibo si, tama agai te kap me selama, tama tiwai naga Godibolo puba hwi po olama, tama augwalibolo mayu te po wali, “Te kapde elalubo wain ąį te eno kaneme dao. Tama te kanemego eno te gesi dąų wali po dąų obao. Tigidali sogo dagego e ąį tubaso da, teda dagego tama tiyu ena homugo konealuao,” te bidi Jisasgo te po wai. c  26 Tama tibaso, dago Genuai Bidi aga ma asisąbadi te tigidali sogo dagego te bret dali te kapde dali wę tubo si, dagego te aga isali po pusubo dao.

27 Tama tibaso, bidi me deligo hasia bugagia homu kone palisiąma tama Genuai Bidigo te bret dali te kapde ąį dali olo subigila tuali da, tebogo agai te Genuai Bidigo tigi me kaneme te dolobo tiwai ilali, tama aga tede sęgę elalubao. 28 Te komunion tubo sogo te bidigo aga digi homu bugagia osalama tama usu yali homu eyu da, teda aga te bret me te kapde te ąį tuao. 29 Magi baso meni, bidigo te dago Genuai Bidigo tigide homu kone bugagia palisiąma, tama agai te bret me te wę me olo subigila tuyu da, teda agai bret me wę me tuali tede Godigo agabolo te sęgę menama tama dwai sę agaba pedalaibao. 30 Te page delide naga te dage tomode we bidi hauwa augwali tigi bomo meniama, tama augwali gasi elama, tama augwali meba me isalio. 31 Te dago dena homu hasia bugagia osola suyu da, teda te Godigo dabolo te sęgę magobeo. 32 Tiali goli, Genuai Bidigo dago ebo kolesaga osola sulama, tama dabolo dene osogo mobaso da, tede te da aga wai bǫų tiwai dodolobao. Agai tama tebo te da tǫde bidi dabe augwali dali nosali mu hagaidali weyu tebo dao.

33 Tama tibaso, eno ama dedeo, dage te nai tuboba sisinainogo da, dagego te gasa bage augwali asobo hasia tonaluao. 34 Te me deli moni nasi ebaso da, te agai bede nai tuao. Tiyu dage deliba sisinibo kolesagade Godigo dagebolo sęgę magobeo. Te gasa kolesagade elalubo po, te nosali ena dageba asobo sogo te eno dodolaibao.

Copyright information for `MPS