a[Bom 22:30]
b[Sai 12:5]
c[Sai 13:7; Bom 16:3]
d[Bom 13:5; 17:7]

1 Corinthians 5

Te Godigo po wali pabo bagego te augwali tomode pedalubo dwai kolesaga dodolao po wali

(Dąį 5-6)

Te dwai penani sę te Korin bage tomode pedelali

Te we sabo kolesaga togolama dolobo sę te dage tomode mu tama elalubao, te po wabo eno me odali. Tama te we sabo togolama dolobo gasagi yai kolesaga me, te tobage kolesaga te Godigo po odisawani we bidigo me isąbo dwai kolesaga dao. Te e tama tiwai: te dage tomode bidi me deligo aga ayago we sai. a  Tama dage, dage me tama duga nogi ugwaba siyu hagoma idubawe? Te dagego tede hagoma ebo kolesaga tagalama, te dage homu dene eyu gela wagi sogo da, teda te usu igi mu da. Tama tiyu, te dagego te dwai penani kolesaga ebo bidi sela sąnama, tama dage dali me bidimainu me elamu dao! Te enade, mu tama, te eno tigi te dagede digibulu elalubo, tiali goli te eno homude ena te dage dali bidibao. Tama ena da te ena dage dali mu bidibo tiwai ąǫ ebo, tama eno te kolesaga ebo bidigo sę te eno me dagala suai dao. Eno te tiwai po wai dao: te Genuai Bidi Jisasgo nogide te dage deliba sisinama po miao. Tama eno homu me, te dago Genuai Bidi Jisasgo bomo me te dage dali bidaibao. Tama tiyu te bidi dagego te Satango nogoba munama, te agai te dwai sę yali bidigo tigi dolomainao. Dago te tiwai elama, tama aga tigi dolai goli Godigo te bidigo mobo noma bidi te Genuai Bidi ma asobo side ma dobola somainogo tama tiao.

Te Korin bidi dabe augwaligo te dwai sę ebo bidi sela sąmainu wai

Te dage tomode te bidi me deligo te dwai penani sę idubao, tama dagego tede hagoma ebo kolesaga ebao, te dwali. Te aga dage dali me bididubadi, te aga te tubo nai bret bo dabo nai yis tiwai dao. Te dwasianu yisgo te tigidali bret bo domainu ilibo dao. Te dagego konesiąyu ebawe? Dage da te yis meni yai bret tiwai dao. Awe, te eno koneani. Tiali goli te dwai penani sę ebo bidi dage tomode bididubadi aga te yis tiwai eyu, tama agai dwai sę ebo kolesagago dage me dolaibao. Te Juda dabego Pasova nai tubo olo bidibo side, tede augwaligo te sipsip wai ela tuyu, tama te sogo me te bo disąwai bret me tuai dao. Te tiwai me megi te dago Pasova sipsip Krais aga isąma te ofa mayu yai dao. Tama tibaso, dagego te bidi buluba sąyao, te dage te gesi bret, te yis meni yai bret tiwai ma pedalomainogo yao. b  Tama tilama, da dwagi yai homu eyu deliba sisinama tama dago Pasova nai tuinao. Tede eno po digi po begelama tama po page obao, dago tama tuyu dago te poloba yis dali tulamuo, te yis meni yai bret naga tuao. Te po page e dao: dago te dwai sę yabo homu dali te dwai dwai sę ebo kolesaga dali te si ilamuo. Meni. Dago homu mu naga eyu, tama mu po naga weyu yao. c 

Te eno gasa me dagebolo asęna tolali pasde eno e tama po wai: “Dagego te dwai penani sę eyu we sabo kolesaga dolobo bidi dabe dali kisasa biligimio,” te po asęna tolali. 10 Eno te we sabo kolesaga doloyu ebo te Godigo po odisąwani tigidali bidi dabe augwali te mu tagalao po weyu eno te po wabe. Te tǫde bidi dabe augwaligo Godigo po wali pisąyu tama te mena nai pesa ebo bidi dabe me te gasa bidigo nai anoma elama sainu ebo bidi me, te tibo godiba lotu po wabo bidi dabe, te augwali mu tagalao olama eno te po me wabeo. Te dagego te dabe mu tagalabo homu egi sogo da, teda dagego te tigidali tǫ mu taga pelama, tama gasaba bidigi pigi da. 11 Tiali goli eno asęani po page te e tiwai dao: te bidi me deligo aga dage dali ama da wabo bidigo te we sabo kolesaga dolobo me, agai te gasa bidigo naide pesa eyu, me agai tibo godibolo lotu po weyu, me agai posobo po obaso me, ma agai bomai wę tubaso, ma agai te gasa bidigo nai anoma elama te tigidali kolesaga ebaso da, teda dagego aga dali kisasa biligio, aga dali abagi me wagio. Menio. Dagego te tiwai sę ebo bidi dali te nai me munu me tulamo dao. 12 Te Godigo po odisąma dago hani bulu badu bidibo we bidi dabe dagalobo sę, te eno sę dawe? Menio. Te God aga digi augwaligo kolesaga dagalaibao. Tiali goli te dage dali bidiyu Godigo po wali pabo we bidi hani tomode elalubo bage, te augwali dagalobo sę, te dagego yabo sę dao. Tede te Godigo po bukude po me deli elalubao, te po dago wali pinao, te po e dao: “Dagego te dage tomode bidibo te dwai bidi buluba mu sela sąyao.” d 

Copyright information for `MPS