a[2 Sml 20:1]
c[Sai 32:4]
d[Prs 23:33-34]

1 Kings 12

Israel hani dali, Juda hani dali si bugulama, tǫ pedai kantri si nigilama bidali

(Dąį 12-16)

Te Israel hani te pedai not badu bidali bidi hani dabe augwaligo pedama, te Juda hani augwali tagalali

(2 Sto 10:1-19)

Te bidi Rehoboam aga te Sekem hanuba pali, magi baso meni, te tigidali Israel hani we bidi dabe, te not badu bidali hani we bidi dabe, augwali te taun Sekemba sisinama bidibaso, te bidi Rehoboam aga augwa king bidi nigilaiongo yali. Polobadu te bidi Jeroboam, te bidi aga aya Nebatgo ogwa da, tama aga te king Solomon sulama, te aga wi pelama, te Isip buluba bidigi pali. Tama tialima, te sogo te Israel hanigo te bidi Rehoboam king bidi nigilabo homu yali, tama tibo po te bidi Jeroboamgo te po agai odali, tama te aga te Isip bulu tagalama, tama aga asobe. Tama te Israel hani dabego te me badu bidi dabe augwali tagala palama, te bidi Jeroboambolo te po waligi pali, aga asao po wagi pali. Tama aga asali, tama aga dali, te tigidali Israel hani dabe dali, augwali pelama, te bidi Rehoboam sugi pelama, tama augwaligo e tama po agabolo wali, “Nago aya Solomon agai dabolo moni sęgę menama, tama dago sę dene dwai mu eyu bidibao,” wali. “Tama teyu, megi dago homugo nago da dua tonaluao, tama dago tigide me badu sęgę elalubo sęgę silama, bidaio. Tialima, nage tama teyu da, teda da nage dologode bugagia bidaibao,” tama po wali.

Tama te king Rehoboamgo agai te po odama, tama agai augwalibolo e tama po wali, “Dage pelama, te sela sogo bidigi pelama, tama dage ma asiąo,” wali, “tama eno homude elalubo po dagebolo ola mawaibao,” wali. Tama augwaligo aga tagalama, tama augwali pali.

Tama te king Rehoboam pelama, te monu dabe ofisa bidi dabe dali po miani. Polobadu te gavman ofisa bidi dabego aga aya Solomon te dwagi yai kolesaga yabo po ola mawai bidi dabe da. Te king Rehoboamgo augwalibolo e tama po hanalu wali, “Dagego homugo eno mena tama tiwai po te we bidi dabe augwalibolo wei ponomainuwe?”

Tialima, augwaligo te bidi agabolo e tama po ola mani, “Tialima, nage dwagi yai sę bidi bidainu homu eyu da, teda teya, te hani we bidi dabe augwali nago tau sao, awe, megi nago dwagi yai po me augwalibolo ola mao. Tialima, nago tama teyu da, teda te augwali nage dologode bidaibao,” te po wai.

Tiali goli, te king Rehoboamgo te monu dabe gavman ofisa bidi dabego ola mani po sela sąnama, tama aga te gesi ogwa bidi gavman ofisa bidibolo ma hanalugi pali, aga ma dwagi yai kolesaga ola momainu. Te gesi ogwa bidi gavman ofisa bidi dabe te aga dali dilai bidi dabe da, te aga age tiwai hani bidi dabe da. Tama agai augwalibolo e tama po wali, “Te we bidi dabe augwaligo homugo te me badu sęgę yai sę te eno ayago te augwaliba muani sęgę sę te eno sela sąyu yao po wabo. Tialima, dagego homugo te dago mena po te augwaliba wei ponaibawe?”

10 Tama te gesi ogwa bidi gavman ofisa bidi dabego e tama po wali, “Tialima, nago homugo te we bidi dabe augwaligo te nago ayago mani sęgę me badu silimainu hanalu wali po, nago homugo augwaligo te hanalu wali po e tama po begelama, augwalibolo wei ponao, nago e tama po augwalibolo ola mao, ‘Dagego homugo eno ayago dage dolo bomai po olama, pobegai dawe, a? Menio. Teda te ayago te yali sę te olo bage mu dao,’ wao. ‘Eno dwasianu kibisa nogo danigo te eno ayago bomo aiyaba elaluaibao,’ tama wao. 11 ‘Te mu tama dao, eno ayago dagebolo sęgę mani, tiali goli eno da, dagebolo moni genuai sęgę mu ma mawaibao,’ wao. ‘Eno ayago dage te wipgo elai dao, tiali goli eno da, dage te bomai wip selama, bomonama me eluduaibao,’ tama po wao,” te gesi ogwa bidi gavman ofisa bidi dabe augwaligo te po wai.

12 Sela sogo wali bodolu polo sia sigi pali, tibaso te bidi Jeroboam dali, te tigidali Israel hani we bidi dabe tigidali asama, te king Rehoboam augwaligo sugi pali, aga te wali po tiwai. 13 Tama te kingo te monu dabe gavman ofisa bidigo ola mani kolesaga tų wali pabe. Mu meni. Tama agai te gesi ogwa bidi gavman ofisa bidi dabego ola mani kolesaga tų wali peyu, tama agai te tigidali we bidi agai te augwalibolo po bomai mu wali. Agai augwalibolo e tama po ola mani, “Te mu tama, ayago dagebolo sęgę mawai dao, tiali goli eno dagebolo genuai sęgę ma mawaibao. Eno ayago dage te wip bįgo elai dao, tiali goli eno da, te dage bomai wip bį selama, tama dage me eluduaibao,” wali. 15 Genuai Bidi God aga digi te king bidi Rehoboam homu kolesaga begelama, te tigidali we bidigo kolesaga tų wali pabe. Magi baso meni, Genuai Bidi aga te polobadu te Jeroboam dali po bodolu muani poba usu nigi painu tama kolesaga yali, Jeroboam te Nebatgo ogwa. Polobadu te profet bidi Ahiya, te Silo bulu bidi, agai te Genuai Bidigo te po te Jeroboambolo te po wali.

16 Tialima, megi da, te we bidi dabego koneani, te kingo te augwali dali po wabo odobo usu meni, tama augwaligo moni dagą weyu, e tama i wali, “Da te Devitgo hani king bidi dologode da bidibo hagela palio,” wali. “Da te Devitgo hani menio, tama da te Jesigo ogwago agai hani da menio. Da tigidali te Israel hani dabe naga dao, dena buluba ma begasa pinao. Tama dage te Devitgo hani dabe, duga digi duga hani tonaluao.” Augwaligo te po tama olama, tama augwa buluba tedela pali. a  17 Tiali goli, me badu Israel hani bidi dabe te Juda dabego te moni hanude te Juda dabe dali bidali. Te bidali bidi dabe digi te king bidi Rehoboam dologode bidali.

18 Nosali te king Rehoboamgo te bidi Adoniram aga te Israel hani bidi dabe bidibo madigi tagala palali. Adoniramgo agai sę te king bidigo sę ebo bidi dabe tonalubo sę ebo bidi da. Agai gasa nogi me e tama, Adoram. Tialima, te bidi Adoniram augwali pageba sabalobo sogo, tama te tigidali Israel bidi dabego te bidi tigiba masigi sąnama, tama aga elama, isilali. Tama te tiali po te king Rehoboamgo augwaligo te bidi tama elali po odobo si, tama aga te aga karisba polo holama, dugula siyu, te Jerusalem taun buluba aga wi samana pali. 19 Te sogo tama gagalama, tama asu, megi tama e bidibo bodoluba usu nagasali,
12:19Te po, “te megi tama e bidibo bodoluba usu nagasali,” te po te da megi e tama bidibo bodolude yai po menio. Te po te polobadu te e buku asęani bidi bidibo sogo yai po dao.
te Israel hani bidi dabe, te not badu bidibo bidi dabe, augwaligo homugo te Devitgo hanigo te king nigilama, augwali tonalubo augwali hagela ebo olama, tama augwaligo hagoma genuai mu yali.

20 Te Israel hani we bidi dabe tigidaligo te bidi Jeroboam te Isip bulu tagalama, tama ma asali po odobaso, tama augwaligo agabolo hanalubo po me deli ola tolali, “Nage dago po mitin eboba asao,” wali. Tama aga aselama, sabolali, tama augwaligo aga te augwaligo king bidi nigilali. Tialima, te Juda hani deli naga te Devitgo hanigo king bidi nigibo dologode naga bidali.

Te profet bidi Semaiago te Godigo po pusali

(2 Sto 11:1-4)

21 Te king Rehoboam te Jerusalem taunba sabaluyu, tama agai te Juda hani bidi dabe, me te Benjamingo hani bidi dabe te bomai ami soldia bidi dabe naga i olama, tama augwali asama, sisinagasali. Te soldia ami bidi dabe augwaligo namba e tama namba usu nama, ami bidi dabe sali namba 180,000. Rehoboam agai homugo te not badu bidibo Israel hani bidi dabe dali boi hwįgi painogo homu yali, tama tilama, te augwali aga dologode ma bidimainogo yali.

22 Tiali goli, te profet Semaiabolo te Godigo e tama po ola mani, 23 “Nage te Juda hanigo king bidi Rehoboam pageba pao, tama me te Benjamingo hani we bidibolo me, me te Juda hani we bidibolo me, me te gasa hani we bidi dabebolo me, tama nago augwalibolo e tama po ola mao, 24 ‘Ena Genuai Bidi, eno obao, dage pelama, te Israel hani dali boi hwįgi pigio, te augwali te dagego abagi solo. Meni. Dage tigidali duga buluba pela silao, magi baso meni, ena digi ena tilama, te Israel togolama, tama dage tagalalio,’ te po wao,” Godigo te po wai. Tama tialima, te profet bidi Semaia pelama, augwalibolo te Genuai Bidigo po pusa magi pali, tama augwali augwa buluba begasa pepelawali.

Te king Jeroboamgo te Genuai Bidi tudiba ilali

25 Te king Jeroboamgo te taun Sekem masigigo nigai obo ma geselama, dąų walama, te Efraim bulu dudu gagalama, tama te taun Sekem bagulama dąų wali. Tama tilama, me badu sogo aga te taunde bidali. Tama nosali te hanu tagalama, tama aga te Penuel hanuba pelama, tama te hanu te Gileat bulu pedaide elalubo hanu da, tama agai te hanu me obo masigi bagulama, te hanu bugagia dąų walali, magi baso meni, te boi bidi dabego te hanu sidali weyu yali.

26 Te king Jeroboamgo e tama homu yali, ‘Eno hani we bidigo ena tagalama, tama augwaligo te Devitgo hani king bidi dologoba ma bidigi paibao. 27 Megi tama augwali te Jerusalemde te Genuai Bidigo beba pelama, te Genuai Bidi dolo denami yai ofa nai ula magi pabo dao. Tiali goli, tigidali sogo tama tiyu da, teda augwaligo kolesaga hasegelama, tama augwali augwa tobolu bidi dologode ma bidigi paibao. Aga da, te Juda hanigo king bidi Rehoboam. Tama tiyu, augwaligo ena ela munama, tama augwali te king Rehoboam pageba ma geasa paibao,’ agai te homu yali.

28 Te king bidi Jeroboamgo te tama tibo homu kolesaga dagalobo sogo, tialima agai te kibu bulmakau omai noma si te gol selama, nigali. Tama agai te we bidi dabebolo e tama po ola mani, “Dage umabo sogo te Jerusalemba pelama, te lotu po wagi pai dao. Tiali goli, megi da, dage munu ma pelamuo. Suao. E elalubo da, Israel hani duga god dao. Te godigo da, dage te Isip buludu selasa asai dao. Dagego te e godiba lotu po waiąo,” agai te po wai. c  29 Tama tialima, agai te tibo god noma dabe nigali te me deli te taun Betel buluba mugi pali, tama me te taun Dan buluba mugi pali. 30 Tialima, te we bidi dabe augwaligo te tibo god te bulmakau noma siba lotu po wali. Tama te tibo kolesagago te augwaligo sęgę sali. Tiali goli, hanu Dan te digibulu elalubo bulu goli, te tigidali we bidi dabe augwali te Dan taunde elalubo tibo god bulmakau nomaba augwaligo lotu po wagi pabo kolesaga iduai dao. 31 Tama te king Jeroboam agai te kolesaga me yali, te bulu du dabede te lotu po wabo pesage nidigi bilibo sę yali. Tama agai te me badu bidi dabe te pris bidi dabe dąį ilali. Tiali goli, te agai dąį ilali bidi dabe augwali te Livai bidi hani dabe menio, te olo bage tama dao.

Genuai Bidigo te Betel hanude lotu po wabo pesage dolaibao po wali

32 Tama te king Jeroboamgo agai te namba 8 polua wabode, te 15 dei, te sogo te Israel dabego moni lotu po wabo bodolu deli dao olama, dąį ilali. Te genuai lotu po wabo sogo, te Juda hanigo lotu po wabo bodolu sogo deli gagawai tiwai tama da. Tama agai te hasa dabe elama, tama te denami yai ofa nai ulubo alta saide ulali, tama aga te golgo nigali kibu bulmakau noma siba te ofa eyu, tama tiwai. Tama agai te ofa nai ulali te Betel hanude tama tiwai. Tama agai te aga te sę tama tonalumainu, me te lotu po wabo pesage tonalumainu, tama agai te dąį ilali pris bidi dabebolo te e Betel bulu hanuba te dage eba sę yagasiąo olama, agai augwali asao olama, po ola tolali. 33 Tialima, te namba 8 polua, te 15 dei, te dei da wabode te aga digi dąį iliyu, te po wali, te Israel hani we bidi dabego moni lotu po wabo bodolu sogo dao wali, tama te king bidi Jeroboam aga te Betel bulude nigali ofa nai ulubo alta saiba pelama, te agai ofa nai ulugi pali. d 

Copyright information for `MPS