a[Gag 32:28; 35:10]
b[Je 5:18]

1 Kings 18

Elaijago te tibo god Balgo profet dabe dali usu si yali po

Te sogo te genuai poi pibo giliga nanobo sesabi elama bidali sogo, te sela wabo kibu bede Genuai Bidigo Elaijabolo te tiwai po wai dao, “Nage pelama, te king Ahap sugi pao, te eno tulubage ma tagala palaibao,” wali. Tialima, Elaija hogodama, palio.

Te tiali sogo, te Samaria dabe te nai mu meniama sǫą pai, tama king Ahapgo po ola toloyu, te Obadia aselama, aga suagasao po wai. Obadia aga te kingo bede tigidali doado bage tonalubo sę idualio. Obadiago te Genuai Bidi deliba naga lotu weyu, aga dologode bidai dao. Tama te sogo te we kwin Jesebelgo te Genuai Bidigo po pusumainu tagala palali profet dabe ela mubo sę ebaso, Obadiago te profet dabe bidi sese a naga, 100 profet bidi dabe selama, augwali te genuai masigi ola be dedage tomoba geme dualali. Agai te bidi sese si olama, nogo si, 50 te gasa ola be dedageba dualiyu, te gasa bidi sese si olama, nogo si, 50 te gasa masigi ola beba geme dualiyu yai. Te agai augwali tonalu, te nai me wę mayu, iduai dao. Obadia te Ahap pageba asobaso, te Ahapgo agabolo te tama po wali, “Da si te tigidali tǫ kantri dabeba pelama, te ulu ąį, me dwasianu ąį dabe polobadu elaluali madi susa bilaibao. Te pedai badu te nosai dabe elalubo suina homu ebao, te hos dabe me, donki dabego me tumainu homu ebao. Te nosai elalubaso da, teda dago te hos dabe me donki dabe eligobeo,” te po wali. Tialima, augwali sigo te tǫ kantri pedai me badu pabo badu dąį ilali, te Ahap aga pelama, te nosai gegegi pabo madi, te me badu pedai badu te Obadia pabo madi tama tialio. Tialima, augwali si pai dao.

Te augwali sigo dąį ilali madi Obadia pali, tama Elaija aselama, aga dali te sunumide gesabidi si deliba ununani. Tama Obadiago aga sulama, konebaso, te aga gesabidi tǫba pǫgulama, te Elaijabolo genuai nogi mawai. Tama agabolo e tiwai hanalu walio, “Elaija, eno genuai bidi, te nage tama da, agawe?” Tama Elaijago te tiwai po wei ponani, “Awe, ena Elaija dao. Nage ma peyu, te king Ahapbolo te tiwai po wao, Elaija asai dao,” wali.

Tama Obadiago agabolo te tiwai po wali, “Genuai bidi, eno mena dwai sę ebaso, te nago homugo te king Ahapgo ena ela mumainogo ebawe? 10 Te Sesemane Sogo Bidibo Godigo nogide, eno mu po tama obao, kingo nage ma suabo homu godolo ebao. Tama agai nage te tigidali tǫ kantride gegebo sę idubao. Te tǫ kantri pedai me deli tonalubo tuni bidi me deligo te po weyu, nage te agai tǫ kantride bidisiąbaso da, teda Ahapgo te tǫ kantri pedai tonalubo bidibolo po bomonama weyu, mu po ugwaba obao po weyu, te nage ede bidibeo po weyu, te po wabo dao. 11 Tialima, nago homugo ena pelama, te kingba nage ma asai da po wagi pomainu homu ebao. Eno te tiwai ebo hagela homu ebao. 12 Te eno nage taga pabo sogo, teyu te Genuai Bidigo Mobo Bidigo nage selasa, te eno konesiąwai bulu me deliba sela pidalio. Te king Ahapgo nage gegagasali nage susąbaso, te agai wado homu elama, te ena ela mueibao. Nago ena me tagala palogobeo. Menio. Nago ena homu dene yao, magi baso meni, sesemane sogo ena Genuai Bidi dologode bidiyu, te agaba lotu udali, te ena ogomanide gagalali, te megi e sogoba usu nagasalio. 13 Te kwin we Jesebelgo te Genuai Bidigo profet dabe ela muani sogo, eno te bidi sese a naga, 100 profet dabe te genuai masigi ola beba geme dualali. Eno te bidi sese si olama, nogogo si, 50 bidi te gasa ola beba geme dualali, te gasa bidi sese si me nogo si, 50 bidi dabe te gasa ola beba geme dualali. Te eno augwali tonalu, te nai mayu, wę mayu, yali. Eno te wiegi yai sę yali nago koneao,” te po wai. 14 “Tiali goli, nago homugo eno te kingba wagi pelama, te nage asai da po waibao. Te eno nago po wabo tiwai elama, te nosali kingo nage susąbaso da, teda agai ena ela mueibao,” Obadiago te po wali.

15 Tialima, Elaijago agabolo te tiwai po wai, “Nage wi elamuo. Ena te Tigidali Bomo Elalubo Genuai Bidigo sę bidi dao, te Sesemane Sogo Bidibo God dao. Te eno agai nogide po weyu, mu po tama obao, Ahapgo ena megi e side tama sueibao,” wali.

16 Tialima, Obadia pelama, te king Ahap gege pelama subaso, agai Ahapbolo te tiwai po weyu, te Elaija ma asalio po wai dao. Tama Ahap hogodasa pelama, te Elaija sugi pai dao. 17 Ahapgo aga sulama, te po wai, “Te megi da, eno nage sualio. Te sę yali page te nagede naga elalubaso, tama te tulubage tulisiąbaso, genuai sęgę Israelde elalubo dao,” wali. 18 Tama Elaijago Ahapgo poba wei ponoyu, te tiwai po wai, “Nago tibo po obao. Te sę yabo page eno menio. Te sę yabo page nago dali, te nago ayago hanide dali elalubao, magi baso meni, dagego te Genuai Bidigo po sela sąnama, te dagego tibo god Bal dabeba lotu oduai dao. 19 Tialima, megi da, nago te Israel we bidi tigidaliba po ola tolama, te augwaligo ena te Karmel bulu duba tede da gesabidi sisinaibao. Tama nago te tibo god Balgo profet dabe 450 me, te tibo god we Aserago profet dabe 400 me sesao,” wali, “te tigidali te kwin we Jesebelgo augwali tonalu nai ula maduai dao,” Elaijago te po wai.

20 Tialima, Ahapgo Israel we bidi tigidali i obadi, te profet tigidali me i walio, tama augwali pelama, te bulu du Karmelba sisinigi pai dao. 21 Tama Elaija te we bidi dabe augwali pąba doligi pelama, te tama tiwai po walio, “Dage homu si elalubo we bidi dabe da, mena sogo dagego homu deli naga elalueibawe? Genuai Bidi aga te God mu yaibaso da, teda dagego aga deliba naga lotu waiyąo. Bal te God mu yaibaso da, teda dagego aga deliba naga lotu wabo usu dao,” wali. Tialima, te we bidi augwaligo po me deli wei me ponobeo. Mu menio. 22 Tialima, Elaijago augwaliba te tiwai po wai, “Te Genuai Bidigo profet me deli me bidibeo. Ena deli naga bidibao. Tialima, te Balgo profet dabe 450 elalubao. 23 Tialima, eno homugo dagego te omai bulmakau si sesao. Tama eno homugo te Balgo profet dabego me deli somainao. Te augwaligo me ela munama, te peselama, te ofa yao. Tama augwaligo te god Balgo altaba te isi munama, tama te kibu mi dabe te isiba ugwadu muao. Tiali goli, te sia me nogonama, domainu me igio. Tama eno te gasa bulmakau me selama, te tiwai ofa yabo deli kolesaga tiwai yaibao. Te eno me isi me nogogobeo. 24 Tialima, dagego te duga godiba gedu haluasa po obadi, te eno ena Genuai Bidiba gedu haluasa po obadi yaibao. Tama mena godigo te gedu haluasa po odama, te isi tagala palama, te ofa nai ulubaso da, teda te naga te God mu da wabo dao,” Elaijago te po wai. Tigidali we bidigo te po odama, te augwaligo i te tiwai wali, “Te wiegi yai dao. Dago tama tiaibao,” wali.

25 Tialima, Elaijago Balgo profet dabeba te tiwai po wai, “Dage hauwa dao, tama dage polasa pao. Dagego te bulmakau me deli selama, te ofa yabo sisi ilao. Tiali goli, dagego isi me nogolamuo. Te dagego duga godiba gedu haluasa po weyu, te agai isi tagala palama, te ofa ulagasomainao,” wali. 26 Tialima, te profet bidi dabego te bulmakau sali, te we bidi dabego augwaliba sesai. Te augwaligo ofa yabo sisi ilalio. Tama augwaligo te god Balba gedu haluasa po wali, te kigamude gagalasa, te sia ge tomoba yagasobo te belo wabo siba usu nagasalio. Augwaligo gedu haluasa po weyu, i e tiwai wali, “Bal, dago homugo nago dago gedu haluasa po wabo odomainu obao,” wali. Tialima augwaligo te gedu haluasa po wali wei me ponobeo. Mu menio. Augwaligo tęąbi weyu, te bidi dabego nigali alta bobegelabo siyu, sasa mano bilali.

27 Tama te giliga tomo yagasobode, te belo wabo side, Elaijago augwaliba te tiwai posobo po wali, “Dage bomo kimi me igimio. Aga te god dao. Tama te bomo elama, gedu haluasa po wabo sę mu yao. Te agai gasa naiba me homu kone palidu, te agai dageba olo musąyu, ma aga toma nigi pali homu ebao. Ma, te meni baso da, te aga digibulu buluba pali homu yaibao. Ma, te aga godege pila mubowe homu me ebao, tama tibaso dagego aga hodoliąo,” wali. 28 Tialima, te profet dabego i hai bomonama mu weyu, te augwaligo hwą ge dabe me, pęwądage bainat me sobadi elama, te augwaligo augwa lotu wabo kolesaga wali peyu, augwa digi augwa tigi dabe tologwalio. Te kaneme augwa tigide dulai dao. 29 Te be pio mu yai madi tagalao, augwaligo te esela pai bidi dabego i wabo tiwai udubadi, te be pio te ofa yabo sogoba usu nigi palio. Tialima, te augwaligo gedu haluasa po wabode wei munu me ponosiąma, te magi nai me deli pedalubeo. Mu menio.

30 Tialima, Elaijago te we bidi augwaliba te tama po wali, “Dage ena pąba asiąo.” Tama tigidali sisinagaselama, aga bagua sagasali. Tialima, Elaijago te Genuai Bidigo alta ma dodolali, te bidi dabego polobadu aluali. 31 Agai te nogo si olama, sągągo si alta nigabo masigi sali. Te masigi dabego te dąį tiwai te Jekopgo ogwa dabe nogo si olama, sągągo me si hani dąį ilali tiwai yali, te Israel dabego wąį nǫų dabe dao. Polobadu Genuai Bidigo Jekopbolo te tiwai po wali, “Te we bidi augwaligo nago nogi Israel nogi yaibao.” Te po wai dao. a  32 Tialima, Elaijago te masigi dabe selama, te Genuai Bidiba ofa yabo alta nigali. Agai te alta nigila silibo si da, teda agai te alta bagulubo ąį gamia nigali. Te ąį gamiade ąį pągąwani usu te nogo si olama, sągągo me si me si, te 14 lita usu nama dao. 33 Nosali Elaijago te alta daiba isi manama, te kibu bulmakau mi tologolama, te sia daiba ugwadu mananio. 34 Tama agai te we bidi augwaliba te tiwai po wali, “Te genuai sospen sene me si me si selama, te augwalide wę tulama, te ofa yabo kibu miba ugwadu me, te isiba me, gelao,” wali. Tialima, augwaligo te tama tialio. Tama agai augwalibolo te tama ma tiao wali. Augwaligo te tiwai ela silibo si da, te agai augwalibolo te po ma wali, “Deli sogo ma yao.” Tama augwaligo te tiwai yai dao. 35 Tama wę te alta sese badu dulama, te alta bagulama nigali ąį gamia pągąwai dao.

36 Tama te pio mu ebode te ofa ebo sogo, te Godigo po pusali bidi profet Elaija te alta pąba pelama, te gedu haluasa po te tama wali, “God, te Abraham, me Aisak, me Israel, te augwaligo Genuai Bidi, eno homugo nago te tiwai nago te we bidi dabeba megi ola momainu homu ebao, nage naga te Israelgo God dao. Tama me nago augwaliba te tiwai ola momainu ebao, ena nago sę bidi eno nago po naga wali pelama, eno te tigidali sę yai dao. 37 Genuai Bidi, eno buba hwi wabo po odama, te eno nagebolo hanalubo tiwai gilama yao, tama te we bidi dabe augwaligo konemainao, nage naga, naga te God mu, tama te nago augwali homu begelama, te nageba ma asomainu ebo dao,” tama wali.

38 Tialima, Genuai Bidigo isi aiyaba tagala palai. Tama isigo te ofa me, te isi me, te alta nigali masigi dabe me, te alta sesede elaluali tǫ me isigo dela silali. Tama te ąį gamiade elaluali ąį me tigidali sula selama, wa pai dao. 39 Te we bidi augwaligo te sulama da, teda augwa digi te tǫba pinilaluama, tama augwaligo te tiwai i hai wali, “Genuai Bidi naga aga God mu dao. Genuai Bidi naga aga God mu dao,” te po wai dao. 40 Tama Elaijago augwaliba te tama po wali, “Te god Balgo profet bidi dabe tigidali pageabi yao. Te me deli wi pomainu me sula tagaligio,” wali. Tama tialima, augwaligo te profet dabe pageabi elala pelama, tama Elaijago te profet dabe selama, te ąį Kison sesegeba dulama, te augwali ela muai dao.

Tulubage te Israel tǫ kantri pedaiba ma tulalio

41 Augwali te badu bidibadi, te Elaijago Ahapbolo te tama po wali, “Nage polo asesa pelama, nai tugi pao. Eno odali, te genuai tulubage u ola asida obao po walio,” wali. 42 Tialima, Ahap pelama, nai tugi pali. Te Elaija aga sę bidi dali te bulu du Karmelba ugwaba holali. Tama Elaija basi gulama, te aga tobolu te sągą kidu si tomoba pǫgulali. 43 Tama agai aga sę bidibolo te tiwai po wai, “Nage u badu pelama, te tamu ąįba tonaludugi pao,” wali. Tialima, te sę bidi pelama, tonaludugi pelama, ma asu, te tama po wali, “Eno magi nai deli me subeo.” Tama Elaijago te sę bidibolo te tama po wai, “Nage ma pelama, tonaludugi pao.” Te sę bidigo tama tiwai yalio. Elaijago te deli po naga udubadi, te a naga olama, me si sogo usu nani. 44 Te a naga olama, si wabo side, te sę bidi ma begasa asu, te tiwai po wali, “Eno suali, te dagalu pǫ me deli tamu ąįde pedelali. Te dwasianu naga, te bidigo nogo tiwai usu.” Tialima, Elaijago aga sę bidibolo te tiwai po wali, “Nage polo pelama, te king Ahapbolo walama, te aga karis sisi elama, te asesa polo aiyaba dulao. Tiyu, tulubagego aga pabo sina sabuo,” te po wai dao.

45 Te polo tama te haowa pedelama, te dagalu polo sesela sai. Te wali po tiwai pedelama, te genuai tulubage tulubo gagalali. Te Ahap aga karisba duagulama, te hanu Jesril sunumidu wali palio. b  46 Tama Genuai Bidigo bomo Elaijaba pedelai. Te Elaija aga name ugwa bugagia dąų olama, te Ahapgo karis pabodu aga polasa uda yali. Aga te tiwai udada pidubadi, augwali si te Jesrilba sabolali.

Copyright information for `MPS