1 Kings 3

Solomongo te Godiba gedu haluasa po weyu, te agaba wiegi yai homu kolesaga momainu yai

(2 Sto 1:3-12)

Solomongo te Isip king bidigo wegi sai, tama te kolesaga yaligo agai te Isip king bidi dali te bomai po dąų walali, tama te bulu tǫ pedai kantri si te bugagia bidiyu, tama te hwįyu me ebeo. Solomongo aga we te Jerusalem te Devitgo Hanuba odasa asali. Tama te Solomongo te aga be me, te Genuai Bidigo tempel be me, te Jerusalem obo bagulu, tama te sę dabe ebadi yali sogo, te we aga dali te sogo tede bidali. Polobadu te Israel dabego te Genuai Bidigo be me deli te dolo me sesiąwai, te augwa Genuai Bidiba lotu wabo digi tama, tama tiyu, te we bidi dabego te Genuai Bidiba ofa ebo sę te lotu wabo pesagede te bulu du bage dabede ofa eyu yai dao. Solomongo te Genuai Bidi godolo mu elama, tama agai te wiegi yai kolesaga dabe wali pali, te aga aya Devitgo kolesaga tiwai yali, te agabolo te tiwai tama yao po wali. Tiali goli, agai me te kibu dabe elama, tama te lotu wabo pesagede te Genuai Bidiba ofa eyu yai, te bulu du bage dabede tama iduai. Gibeon te lotu wabo polalubo pesage tama, tama tibaso me sogo deli Solomon te Gibeonba pelama, ofa igi pai. Solomongo te bidi sese hauwa umabo, te 1,000 omai kau kibu dabe odasa pelama, tama te siago tigidali domainu ulubo ofa te Gibeon altade te ofa yai. Tama te hulide Solomon te Gibeonde godege piai madi, tama te nade te Genuai Bidi agaba pedelali. Tama Godigo te tiwai po wali, “Te nago mena nai godolo eyu, te enaba hanalu obaso da, tama teda eno nageba mawaibao,” po wali.

Solomongo po wei ponoyu, te tama po wai, “Eno aya Devitgo te nage wali mu peyu, tama te wiegi yai doloba pai kolesaga yali, tama tiyu, sesemane sogo nago aga godolo mu elama, tama agaba wiegi yai sę bugagia mu yai. Tama megi me, nago te tiwai sę me idu, tama nago ena, te aga ogwago, te aga hasegelama, tama te king bidimainu ilama bidibo dao. O God, eno Genuai Bidi, nago te eno te ena ayago sę yali pesage hasegelama somainogo ilali, tiali goli, ena te olo ogomani tiwai elalu, tama eno te mena tama te we bidi tonalubo kolesaga ebo te eno konebeo. Megi da, ena te nago da olama, te sa muani te we bidi hani dabe tomode bidibao,” wali. “Augwali te hauwa umabo mu ebaso, tama te bidi dabego nedebaso, te usu me egobeo. Tama tibaso, eno homugo nago enabolo te konebo wiegi yai homu kolesaga mao, te tama eno nago te we bidi bugagia tonalumainogo tiao, tama te mena kolesaga te wiegi yai ebo, ma te mena dwai kolesaga ebo me, te eno bugagia dagalamainu te tama tiao. Te meni ebaso da, teda te mena bidi me deligo nago te genuai we bidi hani dabe tonalubaso, te usu egobeo. Ena digi eno te usu mu me egobeo,” wali.

10 Genuai Bidigo Solomongo te hanalu wali po odama, tama agai bugai homu mu te Solomonba yalio. 11 Tama tibaso, Godigo Solomonba te tiwai po wali, “Te nago enaba hanaluyu, te nageba eno te wiegi yai konebo homu kolesaga nageba menama, te nago te Israel dabe bugagia tonaluaibao po hanalu wali, te wiegi yai dao. Tama nago enaba te nage te tǫde sesabi sogo elama bidabo po me hanalubeo, tama nago enaba hanalu, te eno nageba te mone hauwa mao po wabe, tama me nago enabolo te nago boi bidi dabe dolabo po me hanalubeo. 12 Tama tiyu, te mu tama, nago enaba te hanalu wali nai te eno nage mawaibao,” wali. “Megi da, te eno nagebolo te konebo wiegi yai homu kolesaga hauwa mawaibao,” po wai. “Polobadu te bidi me deligo te tobage kolesaga koneai me elalubeo, tama te nosali me te bidi me deligo nago te koneani kolesaga tobage tiwai te bidi mego sogobeo. 13 Mu tama, nago enaba te genuai nogi me te mone hauwa saio wabo po me hanalubeo. Tiali goli, eno nagebolo te tigidali nai doado bage mawaibao, tama nage te king bidibo sogo te nago genuai nogi elalubo tiwai te gasa kingo te tiwai genuai nogi me elalugobeo. 14 Tama te nage eno te sa muani te wiegi yai sunumidu peyu, tama nago te bomai po me eno po me wali peyu, te naga aya Devitgo te yali kolesaga tiwai ebaso da, teda eno nage te sesabi elama, te bobage sogo te tǫde bidimainu yaibao,” po wali.

15 Genuai Bidigo po ola silibo si da, teda Solomon hodaluali, tama te tiwai te na yali da homu eyu, te tama koneani. Tialima, nosali te aga Jerusalemba ma pelama, tama te Genuai Bidigo Dąų Walali Bomai Po Munalubo Halobage elalubo madi pąba dologi pali. Tama agai te tigidali siago domainu ulubo ofa me, tama te God dali deli homu pedalumainu ebo ofa dabe dali yalio. Tama te tudi badu nosali, agai te ofisa dabego me, te aga sę bidi dabego dali, te genuai daa tubo nai ulama, tuai dao.

Te wiegi yai homu kolesagago te Solomongo doloba pai po tų emainu tau sali

16 Me sogo deli te penani we si te kingba asali, te agai augwali si po dodolumainogo asalio. 17 Tama we me deligo te tiwai po wai, “Eno king, te odao. Te we da si te be delide bidali. Tama eno te wai ogwa me deli ame nani. Tama eno te wai ame nani sogo, te we te bede ena dali bidai. 18 Te si sogo nosali, agai me te wai ogwa ame nani. Tama da si naga te bede bidai. Te sogo te gasa bidi ma we te da si dali me bidibeo. 19 Tama te hulide, te agai wai te isali, magi baso meni, aga bomonama pigilu, tama begeligi soyu, tama aga wai dai badu pigulali. Tama tialigo te wai isali. 20 Ena pilamubadi, tama te huli tomode te aga hodaluama, tama eno wai sagaselama, tama aga pibo betba selasa pai yalio. Tama agai te isali wai sela aselama, tama ena pąba pilagasai yalio. 21 Te kigamu ena hodalu, tama eno te ena wai ame mawainu yali, tiali goli eno suali, te aga isai yalio. Tama eno aga te wai bugagia tonalu osola sulama, tama eno koneani, te aga eno ame nani wai tiwai tonobo ąǫ me ebeo,” wali.

22 Te wego po ola silibo si da, tama gasa wego te po wai, “Menio. Te isali wai, te naga wai dao. Tama te bidibo wai da, te eno wai dao,” wali.

Tiali goli, te polasa po wali wego po wei ponoyu, te po wai, “Mu menio. Te isali wai, te naga wai dao,” wai. “Tama te bidibo wai da, te eno wai dao.” Tama augwa si te konila po wabo sę te king gedude yalio.

23 Tialima, kingo te tama po wai, “Dage si te deli tobage pode te konila po wabo sę idubao. Me deligo te po wali, ‘Te bidibo wai da, te eno dao, tama te isali wai te naga wai dao,’ tama gasa wego me te po wai, ‘Mu menio, te isali wai, te naga dao, tama te bidibo wai da te eno da,’ po wali.”

24 Tama kingo te tiwai po aga sę bidi dabeba wai, “Te bainat hwą me deli sela asao,” wai. Tialima, augwaligo sigi pelama, tama te kingba selasa asai. 25 Tama agai augwaliba te po wali, “Te bidibo wai selama, tama te tomode dolo asegelama, tama me badu pedai te we meba mayu, tama te gasa pedai me badu te gasa weba mayu yao,” te tama po wali.

26 Tiali goli, te wai aga ida mugo te waide homu dene mu eyu, tama kingo te ela mumainu homu me ebeo. Tama agai kingba te tiwai po wali, “King, te tagalao. Te wego te wai somainu emainao. Nago aga me ela mugio.” Tiali goli, te gasa wego te po wai, “Woo, menio, nago te agaba ma te enaba me menamuo,” wai. “Te si badu asegao,” po wai.

27 Tialima, kingo te po wali, “Enabolo te wai elamuo po wabo webolo te wai mao,” wali. “Te aga da te waigo ida mu tama dao. Dagego te wai munu me elamuo,” wali.

28 Nosali te king Solomongo te we sigo po dodolali kolesagade po te tigidali Israel we bidigo te po odolama, tama agai te koneani wiegi yai kolesagade te augwali dwai noma mu sai. Tama augwaligo agaba te genuai nogi mawai, magi baso meni, augwa koneani, te Godigo digi te wiegi yai koneani homu kolesaga te kingba menama, tama te kingo te we bidi dabego po tų bugagia dodolumainogo te homu kolesaga mani da, te homu yai.

Copyright information for `MPS