a[2 Sml 7:12-13; 1 Sto 17:11-12]

1 Kings 5

Solomongo te Genuai Bidigo be sę yabo doado bage sisinani

(2 Sto 2:1-18)

Polobadu Hiram te Tair hanu king bidigo te Devit dali wiegi yai abagi olama bidai. Tama Hiramgo odali, te Solomongo te Devit hasegelama, tama te king pedelali po odobaso, agai te tobolu bidi mebago te Solomon sugi pomainogo tagala palai dao. Tama Solomongo te Hiramba te tiwai po ola tolai, “Nago koneani, te eno aya Devit te king bidali sogo, agai te aga Genuai Bidi Godigo be te sę yabo sogo te meni yani, magi baso meni, te tigidali sogo te boi bidi dabego agaba hwįagasu iduali. Agai homugo te Genuai Bidigo te boi bidi dabe bolo elalumainu homu elama, tama nosali agai te Genuai Bidigo be sęwaiba homu yali. Tiali goli, te megi da, te God, eno Genuai Bidigo, te gasa bulu tǫ pedai bage te augwali ena dali bugagia bidimainu ilali. Te hani dabe augwaligo te da dali boi bidi munu ma isiąyu, tama te dwai sę ebo nai dabe daba me pedalubeo. Tama tibaso, megi da, te eno Genuai Bidi Godigo be sę yabo homu ebao. Polobadu Genuai Bidigo te bomai po dąų waliyu, eno ayabolo te tiwai po wai, ‘Eno te nage te naga ogwa me deligo hasegelama, te king pedalumainu yaibao,’ po wai. ‘Tama agai te eno be sę emainogo elama, te we bidi augwali tede ena pąba asomainu yaibao,’ wali. Genuai Bidigo te tiwai bomai po dąų walaligo tama megi da, eno agai te dąų walali bomai poba usu nagasobao,” wali. a 

“Tama tialima, eno homugo te nago sę bidi dabe tagala palumainu yai, te augwali Saidon dabe, te Lebanon bulu duba pelama, tama eno te be sę emainu yabo ni bǫ dabe togogi pomainu yao,” wai. “Te Saidon dabego te ni togobo te mu koneai, tama eno sę bidi dabego te me konebeo,” wali. “Tiali goli, te eno sę bidi dabego te tau sagasomainu naga te augwali tagala palaibao. Tama nago te naga sę bidi dabe te nisu naga monego abelimainu homu ebaso da, teda eno mayu naga yaibao,” po wai.

Hiramgo Solomongo te po odolama, tama aga haliga te wiegi yai mu yai. Tama agai te tiwai po wai, “Megi dago te Genuai Bidigo nogi ugwaba sinao. Magi baso meni, agai te wiegi yai ogwa te Devitba manigo te aga hasegelimainu elama, tama te bomai bulu tǫ pedai tonalumainu yai. Devitgo te ogwago te kolesaga koneani wiegi yai homu kolesaga elaluai dao,” wali. Tialima Hiramgo Solomonba te tiwai po ola tolai, “Eno nago po odama, tama eno tede usu da wai. Tama eno te ni bǫ dabe me te ni wuli dabe te nageba tolaibao,” wai. “Te eno sę bidi dabego te Lebanonde te ni dabe togolama, tama te nabis wę saneba sela dulaibao,” wali. “Tama augwa te ni dabe te tamu ąįba sisinigi pelama, tama bonogo bomonama kęnama, seseba dabe nigilama, tama te augwaligo nageba sesaiba,” wai. “Te augwaligo sela asiyu, te nago mena badu tuagasabo te dąį ilali pesage nabis badu tuagasomainu yaibao. Tama tede, te eno sę bidi dabego te bono dabe pisiginama, tama naga sę bidi dabego te ni dabe somainu yaibao. Te nai me delide eno homugo nago te sę emainu homu ebao. Eno homugo nago te nai dabe tolomainu homu ebao, te ena dali te eno bede bidibo hani dabe dago tuabo nai dao,” Hiramgo te po ola tolali.

10 Tama tialima, Hiramgo te ni bǫ me wuli te hauwa mu te Solomonba tolali, te Solomongo dąį ilali namba usu nama tama tolai dao. 11 Tama te tigidali kibu bede Solomongo Hiramba te 2,000 ton wit me 4,000 lita te wiegi yai oliv wel madu geani, te Hiram dali te aga hani daligo tuabo nai te tiwai toloyu yai dao.
5:11Te polobadu digi bidi mebago te po begelali, tama augwa homugo te 400,000 lita po olama, te tama po wali homu yali. Tama te po te 2 Sto 2:10 tede me te po elalubo suao.
12 Genuai Bidigo te aga bomai po dąų walali gilama te koneani wiegi yai homu kolesaga te Solomonba mawai. Tama Hiram dali Solomon si te wiegi yai abagi mu pedelali. Tama augwa si tomode te bugagia bidabo bomai po dąų walali.

13 King Solomongo te Israel bulu tǫ tigidali pedai badu te 30,000 bidi selama, tama augwaliba weyu, agai te sę yao po wai dao. 14 Agai augwali te hani sela dobayu elama, tama augwali deli deli hanide te 10,000 bidi elaluali. Tama te tigidali poluade te hani me deli te Lebanonba sę igi peyu, te polua deli bidama, tama augwa ma asiyu yai. Tama gasa hanigo augwali bidali pesageba hasegelama, peyu yai. Te hani sela te hasegeliyu, hasegeliyu, te tiwai yali, tama te kolesagade te deli deli hani te polua deli sę igi pelama, tama ma aselama, te augwa pesagede polua si bidiyu yali. Adoniramgo te sę ebo bidi hani dabe tonalu bidai dao. 15 Tama Solomongo te masigi togwabo te 80,000 bidi me selama, tama augwali te bulu du pesagede te masigi togobo sę yali. Tama agai te masigi dabe tolabo bidi te 70,000 bidi salio. 16 Tama agai te sę tonaluabo bidi dabe te 3,300 bidi nigilali. 17 Te sę bidi dabego te Solomongo po wali pelama, tama augwali te gasa sawi sawi yai masigi elalubo pesageba pelama, tama te masigi moni moni bage togwali, te wasilama, te daide ugwadu te Genuai Bidigo be sę yainu tama tiali. 18 Tama te be sę ebo koneani bidi dabe te Solomongo me Hiramgo sę ebo bidi dabe tomode bidali, tama augwa te Biblos hanu bidi dabe dali te Genuai Bidigo be sę yabo nai te masigi me ni name dabe dulama, tama dodolobo sę yai dao.

Copyright information for `MPS