a[Jo 21:15-17]
b[Bid 3:34]
c[Mt 23:12; Lu 14:11; 18:14]

1 Peter 5

Tama tibaso, megi eno te dage Godigo hani we bidi tonalubo bidi dabe dali e homu kęna sabo po obao. Ena digi me ena da te Godigo hani we bidi tonalubo bidi dao, te dage tiwai. Tama eno gedugo Krais aga dene sabo suai bidi dao. Tama aga ma asiyu, tama aga bomo yai ula pedalobo si, te sogo ena te bomo yai ula meba sabo bidi me bidaibao. Tama te homu kęna sabo po e dao: te kibu sipsip tonalubo bidi agai te kibu sipsip bugagia tonalubogia tama dagego te Godigo dagego nogoba muani we bidi bugagia tonaluao. Tama te sęde augwali tonalubo hagela homu eyu tama tonalugio. Woo, te menio. Dwagi yai homu naga eyu, dagego augwali bugagia tonaluao. Tama dagego te masigi naga somainogo te sę egimio. Te menio. Dagego homu mu bomo eyu, te augwali tau somainogo te sę yao. a  Tama kolesaga hagoma elama, tama dwai homu eyu te Godigo dagego nogoba muani we bidi tama tonalugio. Woo, te dage te dwagi yai sę ebo tųdu polasa pao, te augwali dage wali asomainu, te kibu sipsip augwali te augwali tonalubo bidi wali pomainogo aga polasa pabo tiwai gilama yao. Tama dage te kibu sipsip tonalubo bidi dabe tiwai bidiyu, tama Krais aga te sipsip tonalubo bidi dabego tuni bidi mu tiwai dao. Tama aga ma asiyu hanilibo si, te sogo dagego te bomo yai ula saibao, te bomonama udayu nai sabo bidi agai te wiegi yai tobolu au yabo nai sabo tiwai. Tama agai au yabo nai osogo elaluyu dolai goli, te dagego sabo bomo yai ula te dolisiąbo nai mu dao.

Te dage gesi bidi dabe, dage me te dolo kolesaga eyu, te tonalubo bidi dabe dologode bidiyu, augwaligo wabo po bugagia odiąo. Tama dage we bidi me, dage tigidali te nagamea pai homu eyu, tama te olo sę ebo we bidi tiwai bidiyu, dage tomode duga hasi te tau sabo sę yao. Magi baso meni, te Godigo po bukude te nagamea pai homu ebo kolesagade e po elalubao,

“God agai te kolesaga hagoma ebo we bidi dali boi
bidi homu eyu, bomo elama dolalubo dao. Tialima
te nagamea pai homu ebo we bidi dali agai te olo
tau sabo kolesaga ebo dao.” b 
Tama tibaso, te nagamea pai homu eyu, God agai genuai bomo elalubo nogo dologode bidiąo, te agai bodolu mani sogo asobo si agai dage ugwaba somainogo tama bidiąo. c  Tama bidiyu, tama God agai dagede homu eyu, tama agai dage bugagia tonalubaso te dagego moni homu ebo sę tigidali aga nogoba muiąo.

Te dagego duga homu bugagia dodolao, tama bugagia tonaluao. Te dagego boi bidi Satan aga susa bilibo dao. Te moni hasa nogi laion, te aga nasi baso bomo elama, tama moni hwa olama gaa weyu aga tuabo nai gegeyu bilibo dao. Tama te boi bidi Satan aga te tiwai eyu susa bilibo dao, te dage dolainogo ebo dao. Tama dagego duga Godide konealubo homu bugagia dąų olama, tama dolaluyu te boi bidi sela sąyao. Dagego koneani, te augwaligo dage dene mabo tiwai gilama eyu, te gasa bidi dabego te Godigo hani we bidi tigidalibolo te tobage dene mabo dao, te tigidali tǫde. 10 Tama dagego te sęgę osogo tolama, tama God aga digi agai dage sese bugagia ma ilama, tama dage bomo menama, bugagia mu dąų waibao. Te God aga da te tigidali wiegi yai olo tau sabo kolesaga page bidi dao, tama agai dage i wali, te dage Krais wali peyu, te Godigo bomo yai gamonabo ula meba dagego somainogo yali. 11 Eno homugo te God aga te tigidali nai tonaluabo bomo sesemane sogo elalua peyu, elalua paibao. Te tiwai emainao. Mu dao.

Po silagasu wabo po

12 Te bidi nogi Sailas agai ena tau siyu, tama eno e pęwadage po dagebolo asęna tolobao. Tama eno homu te bidi Sailas da te aga nogoba muani sę bugagia tonaluyu sę ebo bidi dao. Tama eno e po dagebolo asęyu, tama bomo elama eno dage homu kęna sabo po weyu, tama te eno asęani po te God agai aga we bidi olo tau sabo kolesaga mu dao. Tama tibaso, te kolesaga bugagia dąų olama, tama dolaluyu bidiąo.

13 Te Godigo hani we bidi meba augwali te bulu nogi Babilon tede augwali bidibao. Tama Godigo augwali te dage dali te hagea sai dao. Tama te we bidi dabe dali, te eno ogwa tiwai bidibo bidi nogi Mak dali, augwaligo dagebolo te dage bugagia bidao po obao. 14 Tama dage me duga hasi pagea siyu, tama gasa we bidi bugagia bidao po wao. Tama eno homugo te dage Kraisde wadolai we bidi dage tigidali te homu kęnasa bugagia bidiąo.

Copyright information for `MPS