1 Samuel 11

Solgo te Amon dabe dali hwįnama, tama augwali aiyaba elaluai

Nosali Nahas, te Amon dabego king bidi, te aga ami bidi dabe selama, tama te Israel dabe augwa te nogi ebo bulu Gileat tǫ pedai tomoba asai. Tama Nahasgo ami bidi dabego te Jabes taun hanu bagulali, tama te Jabes taun bidi dabego te king agabolo te po wai, “Nago bomai po da dali dąų walama, te da bidimainu sula tagalu, tama te da nage dologode bidaibao,” wali.

Tiali goli, Nahasgo te po wali, “Te eno dage dali bomai po dąų wabo sunumi deli naga elalubao. Eno te dage tigidali Jabes dabego dolo badu gedu widilaibao, te dageba tama tilama, tama te tigidali gasa Israel dabe hale dwai ilaibao,” te po wai.

Tama te Jabes dabe augwa polalubo tobolu bidigo te tama po odobaso, tama augwaligo te Nahasbolo te po wai, “Te dagego da te 7 sogo bolo tonaluiąo, te dago te tigidali Israel tǫ pedaiba te bidi tagala palama, tama augwaliba hanalu, te da tau sagasao waibao. Tama da tau sabo bidi meni ebaso da, teda te da dagego tonalumainu ilaibao,” wali.

Nahasgo te Jabes dabego pode usu da po obaso, tama augwaligo te bidi meba te gasa Israel hani dabeba tagala palai. Te bidi dabe te Sol bidibo madi te Gibeaba sabolama, tama augwaligo te we bidibolo te po pusai. Te Gibea dabego odama, tialima, te augwali gela dwagila mu wai. Te sogo Sol te gide sę iduai. Tama aga te gi taga soabo sogo, tama te sę ebo bulmakau odasa asobadi, agai te we bidi dabego gela wabo odali. Aga te bidibo pesageba sabolama, tiali te agai augwaliba hanalu wali, “Magi baso dage tigidali gela waliwe?” Tialima, augwaligo te Jabes dabego augwaliba ola tolali po wai.

Te Solgo te po odali sogo, te Godigo Mobo te bomo elama, agaba pedalubaso, te aga haliga sębę mu geninanio. Tama tibaso, agai te bulmakau si selama, tama elama, tama te kibu sigo mi te todogo pai. Tama agai te kibu mi te bidi mebabolo menama, tama augwaliba weyu, te mi te Israel tǫ pedai tigidaliba sela pelama, tama te we bidiba ola mao wali. Tama Solgo augwaliba weyu, te po pusao, wai, “Niwai bidigo te Sol de Samuel sigo te Amon dabe dali hwįbo tau sisąbo bidi da, teda Solgo te bidigo bulmakau dabe ela munama, tama te kibu mi tologali tiwai gilama yaibao,” te po wali.

Te we bidi dabego te po odama, tialima, te Genuai Bidigo augwali wi ilama, tama tigidali hogodama asali. Tama bidi me deli te bulude me bidibeo.
Tama Solgo te tigidali bidi te Besek buluba sisinagasao olama, tama agai suali, te Juda dabe umabo bidi te 30,000 bidi, te gasa Israel dabe te 300,000 te buluba sisinai. Tama te ami bidi dabego te Jabes dabebolo weyu, te po wai, “Duga bage bidi dabebolo te tama po wagi pao, te do giliga te pedelai digi, te dago dage tau sagasu aselama, tama te boi bidi dabe ela gudulama, sela sąwaibao,” wali. Tialima, te Jabes dabe pelama, te augwa bage bidi dabebolo te po magi pali. Tama augwaligo te po odama, tama augwa wiegi yai homu pemene mu yai. 10 Tama te Jabes dabego augwa te po te boi bidi tobolu bidi Nahasbolo wali, “Do te da Jabes bage nageba asaibao, te nage dologode bidimainu, tama nago mena sę dabolo yainu da, teda nago te sę yagameo,” wali.

11 Te kigamu digi mu, te be posisąbadi, teda Solgo te aga ami bidi dabe dagalama, hani sela wasilali, tama be posa pabode augwali te udada pelama, te Amon dabe dali hwįgi pali. Tama augwaligo te augwali elala pidubadi, tama te belo nai tuboba usu nigi pai. Tama te Amon dabe deli deli te tigi dolisiąwani bage, augwali te wi tedela pai.

12 Nosali te Israel dabego Samuelbolo te tiwai po wai, “Te mena abagi dabego te po weyu, te Sol dago king bidi bidigio waliwe? Nago dabolo olama, tama dago te augwali ela muaibao,” wai. 13 Tiali goli, Solgo augwaligo po wabo odama, tama agai te po wali, “Menio. Dago abagi deli me ela mugobeo, te sogode naga Genuai Bidigo da Israel dabe te boi bidi dabego nogode ma dobola sai dao,” wali.

14 Solgo po ola silibo si, tialima Samuelgo te we bidi dabebolo te po wai, “Da te taun Gilgalba pelama, tama po hanilama weyu, te Sol dena king bidi bidibao po waibao,” wali. 15 Tama teyu, tigidali te Gilgal hanu taunba pelama, tama te Genuai Bidigo gedude augwaligo te tiwai po wai, “Sol aga te dago king dao.” Tama augwa te God dali deli haliga yabo ofa yali. Tama Sol dali, te tigidali Israel dabe daligo te yali sęde wiegi yai homu pemene mu yai dao.

Copyright information for `MPS