1 Samuel 18

Sol de Devit dali si po mia silibo si, tialima nosali Jonatan, te Solgo ogwa, te aga homu Devitba mu kęą pelama, tama agai te Devit godolo mu eyu, te aga digi aga godolo ebo tiwai mu yalio. Tama te sogode Solgo Devit selama, aga dali bidali, tama aga page buluba ma pomainu me ebeo. Tama Jonatango Devit godolo homu mu ebaso, tama tiyu, agai bomai po me deli Devitba dąų walali, te agai Devit godolo ebo homu te sesemane elalubao. Tama Devitgo me Jonatanba te tiwai po naga wai, tama augwali si te age name si tama bidai. Tama Jonatan aga bobage holobo ugwa te pedelama, tama aga hwįbo doado bage me te sali. Tama agai te doado bage dali, te bainat me, sesemone me, kukulu me selama, te Devitba mawai.

Tama Devit te Sol dali bidali, tama Solgo te Devitbolo olama, te ami bidi dabe selama, te boi bidi dabe dali hwįgi pao wali, tama augwali hwįbo sogo da, teda Devitgo hanigo te boi bidi dabe aiyaba elaluali. Tama tibaso, Solgo aga te ami dabego polalubo ofisa bidi nigilali. Te tigidali we bidigo me, te Solgo ofisa bidi dabego me, augwaligo suali, Devit te genuai bidi pedalubaso, tama augwali bugai haliga mu yai.

Solgo homu dwai Devitba yai

Te Devitgo Goliat elibode nosali tama te ami dabego hwįani silibo si, teda augwa pesageba ma begasa asali. Tialima, te tigidali hanude te Israel we dabe te taundu buluba soyu, te king Sol sunumide tiąba pali. Augwaligo te wiegi yai pemene ebo tęąbi weyu, tama augwaligo te balia dali wai. Tama augwaligo te wiegi yai musik weyu, te dudu du musik te belo elalubo te eliyu, tama te tobage gita me deli dali te tęąbi wali. Tama augwaligo tęąbi te tiwai wai, “Solgo te hauwa umabo tausen bidi elali. Tama Devitgo te umabo umabo hauwa tausen bidi mu elalio,” augwaligo te tiwai wai.

Solgo te tęąbi odama, tama agai homugo godolo mu meni yai. Tama aga haliga sębę elama, te po wai, “Augwaligo homugo te Devitgo te umabo tausen hauwa bidi elali homu yali, tama eno umabo tausen naga elali homu ebao. Te nosali augwaligo homugo te agai eno bidibo sę ebo pesage me saibao homu ebao,” wali. Tama tiyu, te sogode gagalasa, Solgo homu tede kone palama, tama tiyu Devitba haliga dwai yalio.

10 Te nosali side Genuai Bidigo te dwai mobo haubo me deli te Sol aga bede bidibadi te agaba tagala palali. Tama deli sogo polo tama, te dwai mobo haubogo te Solgo homu kolesaga tonaluagaselama, tama Solgo te i ola biliyu, te esela pabo bidi mu tiwai ilali. Te sogo Devitgo te agai gita elibo sę iduali, te aga tigidali sogo ebo tiwai gilama yali. Tama Solgo aga sesemone ene tolalu, 11 tama te tiwai homu yali, ‘Megi da, te eno Devit te sesemone enego enama, tama aga ela muaibao,’ homu yai. Tialima, agai te sesemone ene te Devitba sąnama enani, tiali goli Devitgo te sesemone ene geda munama, ela soali. Tama Solgo te tiwai si sogo yali.

12 Genuai Bidi te Devit dali bidibo te Solgo koneani, tama Sol tudiba muduali. Tama tiyu, Sol te Devitde wi elama, 13 tama agai te Devit aga dali te kingo bede bidimainu me ilibeo. Menio, agai aga te 1,000 ami bidi dabego ofisa bidimainu muani. Tama tiyu, Devitgo te ami dabe selama, te boi bidi dabe dali hwįgi peyu yalio. 14 Tiali goli, Genuai Bidi aga dali bidiyu, tama aga tau siyu, tama tigidali sę agai ebo te wiegi yai naga pedelali. 15 Tama Solgo suali, Devitgo te wiegi yai sę mu ebaso, tama aga te Devitde wi mu umabo yalio. 16 Tiali goli, te tigidali Israel me Juda bagego te Devit godolo homu mu yali, magi baso meni, aga te ami dabego wiegi yai ofisa bidi dao.

Devitgo te Solgo wegi sali

17 Nosali Solgo te tama homu yai, ‘Eno homugo te Devit isimaina homu yali. Tiali goli, tiyu eno digi aga ela muidalio. Te aga te Filistia dabeba hwįgi pelama, tama te Filistia dabego aga ela mumainao,’ homu yai. Tama teyu, Solgo Devitba te po wali, “Odao. Eno nage te Merap maiabo homu ebao, te eno gomunai wegi, tama nago selama, duga si bidagameo. Eno homugo nago aga te tobage mone tiwaigo abelimainu homu yai. Nago eno ami bidi sęde bomo elama sę eyu, tama nage wi munu me elamuo. Tama te Genuai Bidigo homugo dago te boi bidi dali hwįgi pomainu ebo sogo da, teda nago te augwali dali hwįgi peyu yagameo,” wali.

18 Tialima, Devitgo Solgo te tama po wabo odama, tama po wei ponoyu, te tiwai po wai, “Tagalao, eno aga me sogobeo. Ena te olo bidi naga dao. Tama ena hani sibi dabe te nogi me elalubeo. Tama tiyu, eno nago wegi me sogobeo,” wali.

19 Tiali goli, Solgo bomo elama, Devitgo te Merap somainu eyu, tama agai te wegi somainogo ebo bodolu muani. Tiali goli, te we sabo bodolu muani sogo, Solgo aga te Devitba magasobeo. Menio. Agai te Merap gasa bidiba mani, te bidi aga nogi Adriel, te Mehola taun bidi dao.

20 Tama nosali, Mikal, te Solgo gasa wegi, te Devitde mu tulaluama, wei mu eyu, tama aga godolo mu yali. Tama Solgo te tebo po odama, tama aga wiegi yai homu pemene mu yalio. 21 Tama agai homu te tiwai yali, ‘Wiegi yai mu da. Te Mikal eno te Devitba mawaibao. Tama eno te Devit te Filistia dabe dali hwįmainu tagala palaibao, te wegi abelibo mone mabo tiwai elama, tama te Filistia dabego aga ela mumainu yaibao.’ Tama Solgo Devitbolo ma po wali, “Eno homugo nago te eno wegi somainu homu ebao,” wali.

22 Tama Solgo aga ofisa dabebolo weyu, te Devit sugi pao wali, te Devit agaduba deli naga bidibo sogo, tama aga homu bega sabo po te tiwai wai, “King Solgo nageba wiegi yai homu pemene eyu, te aga ofisa dabe dago me nage godolo ebao. Tama odao, megi e wiegi yai sogo nago te agai wegi siyu da, te usu dao,” wali. 23 Tialima, augwali pelama, te po te Devitba wagi pali. Tiali goli, agai po wei ponoyu, te tiwai po wali, “Dagego homugo ena te mone bidi da homu elama, tama ena nogi elalu, te eno kingo wegi somai da homu eyu, oba agawe? Mu menio. Ena magi nai meni yai bidi, tama ena te olo bidi tama dao. Tama tiyu, aga eno me sogobeo,” wali.

24 Tialima, te ofisa dabego te Devitgo wali po tigidali te Solba wagi palio. 25 Tama Solgo homugo te Devit te Filistia dabeba hwįgi pomainu tagala palama, tama te Filistia dabego aga ela mumainu homu yai. Tama tiyu, agai te ofisa dabebolo olama, te po Devitba ma wagi soali. Agai te tiwai po wali, “Eno homugo Devitgo enabolo te wegi abelabo nai deli te tiwai momainu homu yai. Eno homugo Devitgo te Filistia ami dabe te bidi sese a naga te 100 elimainu elama, te enade boi bidi yali wei ponomainu homu ebao. Tama agai te 100 bidi augwa gasa tigi wali togolama, tama te tigiwali enabolo sela asomainu yaibao,” wali. 26 Tialima, te Solgo po te aga ofisa dabe pelama, te Devitba wagi pali. Tama Devitgo te homu yali, te Solgo wegi abelimainu ebo te wiegi yai kolesaga da homu eyu, tama aga te kingo wąį pedelabo homu eyu, aga homu wiegi yai mu yai. Tama Solgo te tigi wali sesabo bodolu muani. Tiali goli, te bodolu muani sogoba pedalisiąbadi, 27 tama Devit aga ami bidi dabe dali pelama, tama te Filistia bidi 200 bidi elama, tama augwa gasa tigi wali togolama, tama te kingba selasa aselama, tama nedalio. Agai te sę dabe yali te Solgo wegi sainu tama tiali. Tama tialima, Solgo aga wegi Mikal te Devitbolo menama, tama augwa si selama bidalio.

28 Megi da, Solgo te tiwai bugagia koneani, Genuai Bidi te Devit dali bidibaso, tama te Mikalgo me Devit godolo homu mu yai dao. 29 Tama teyu, Sol te Devitde wi umabo mu ebaso, tama aga godolo meni yani. Tama Solgo sesemane sogo aga dali boi bidi homu elaluali.

30 Te hauwa sogo te ami dabe augwa polalubo bidi kepten tego te Filistia ami bidi dabe odasa asu, te Israel dabeba hwįagasali, tiali goli Devitgo aga ami bidi dabe daligo te hwįbo bomo mu eyu, tama augwali aiyaba elalu iduali. Te Solgo gasa ofisa dabe te augwa hani ami dabe dali te augwaligo hwįbo bomo te Devitgo hwįbo bomo tiwai gilama me ebeo. Tama tibaso, te we bidi dabego te genuai nogi Devitba mayu yai dao.

Copyright information for `MPS