1 Samuel 27

Devit te Filistia dabe dali bidali

Nosali Devitgo te tama homu yali, ‘Te pąde sogo tama te Solgo ena ela muaibao,’ homu yali. ‘Tama te wiegi yai mu da ena te Filistia tǫ pedaiba wi pelama, bidigi pobaso da, teda Solgo ena me sogobe da,’ homu yali. ‘Tama Sol te hagela ebaso, tama ena gegebo sę munu ma egobeo,’ te homu yali. Tama tialima, Devit dali, te aga hani bage te 600 bidi me, te Get taun king bidi pageba pali, te Akis, te Maokgo ogwa dao. Tama Devit aga me, aga bidi hani dabe dali, te aga we wai dabe dali, augwali te Getde bidaluali. Tama Devitgo we si te aga dali bidai. Te we me deligo nogi te Jesril bulu we Ahinoam, tama gasa we nogi Abigel te Karmel bulu we, aga te we da, te aga hasia isali bidi Nabalgo we dao. Solgo te tiwai po sabilibo odali, Devit wi pelama, te taun Getde bidibo po odobo sogo, agai te aga munu ma pobeasa me bilibeo.

Nosali Devitgo te king Akisbolo te tama po wai, “Te nago ena wei ebaso da, teda nago ena te nago dwasianu buside elalubo taun me deliba ena bidigi pomainu yao. Tiyu, da nage dali te genuai taunde bidiyu, tama nago da tonalubo sę dene yabuo,” wali. Tialima, Akisgo te Devitgo po odama, tama agabolo te dwasianu taun me deli mani, augwa te nogi Siklak nogi yali. Tama tialima, te Siklak taun te Juda dabe kingo taun me pedelama, tama augwa taun elaluali te e buku asęani bidi dabe bidibo sogo usu nama elaluai dao. Devit te Filistia bulu tǫ pedaide bidali, te kibu be deli olama, polua me si me si bidai dao.

Te sogo Devitgo aga hani bidi dabe dali te pelama, te Gesurba, me Girsi, me Amalek, te tama bageba hwįgi pali. Te hani bage te Israel dabego boi bidi dabe elaluai, tama augwali te Isip pąde, te tǫ wa pai bulu te saut pedai badu bidali. Tama augwali tede te kibu be bidi sese umabo mu bidai dao. Tama Devitgo aga hani bage dali augwaligo te augwali dali hwįani sogo, augwaligo te tigidali we bidi elama, tama tigidali sipsip, me bulmakau, me donki, me kamel te augwaligo ugwa dabe me, te tigidali nai sali. Augwaligo te tiwai ela silama da, teda augwali te Akis bidibo madi ma asiyu yai. 10 Tama Akisgo Devitba hanalu wali, “Megi da, nago mena badu hwįgi paliwe?” Tama Devitgo te Akisba tibo po ola mayu, agabolo te tiwai po weyu yali, “Eno te Juda dabeba hwįgi pai da,” weyu yali, ma “Eno te Kin dabeba hwįgi pali,” te po weyu yali. Te bidi dabe te Juda tǫ pedai te saut badu bidiba po wali. 11 Te Devit pelama hwįgi pabo sogo, agai te tigidali we bidi ela muyu yali. Agai te tama homu yali, ‘Tiyu me deli te Get taunba pelama, tama augwaliba te eno me, ena hani bage dali, dago ebo sę po wagi pidali,’ homu yai. Tigidali sogo Devit te Filistiade bidu, te tama kolesaga naga yalio. 12 Tialima, Akisgo te Devitba homu kęą peyu, tama tiwai homu yali, ‘Agai te Israel dabeba hwįgi peyu, te aga abagi dabeba digi hwįgi poba,’ homu elama, ‘tama tibaso, augwaligo aga wei ebo homu meni yani. Megi da, te agai ena tau siyu, tama eno sę sesemane sogo yaibao,’ te po wai dao.

Copyright information for `MPS