1 Samuel 5

Te halobage te Filistia hanu tǫde munaluai

Te Filistia dabego te Godigo Dąų Wali Bomai Po Muani Halobage selama, tama augwa te bulu Ebeneser tagalama, tama te halobage tolasa peyu, te augwa taun hanu me deli, te Asdotba pali. Augwali teba sabolama, tama augwa te halobage tolasa peyu, te augwa tibo god Dagon lotu be tomoba pelama, tama augwali te masigigo nigali Dagon piksa noma pąde muani. Tialima, kigamu mu te nosali side, te Asdot bulu bidi dabe hogodama, tama Dagon piksa noma suali, te tulaluama, gesabidi te tǫba te Godigo Dąų Wali Bomai Po Muani Halobage pąba pogulai elaluali. Tama augwa te Dagon selama, tama aga te muani pesageba ma muai. Tiali goli, hulide augwali pilama, tama kigamu mu hodaluama, augwali te lotu beba pelama, tama augwaligo suai, te Dagon piksa noma te Genuai Bidigo halobage munalubo pąba ma tulaluai elalubo suali. Tama te Dagongo tobolu me nogo dali si alua pelama, tama te be degedu te sunumi pąde munaluali. Tiali goli, te Dagongo tigi me badu te alua pisąma, bugagia munalubo suali. Te pagede naga tama, tama megi da te Filistia pris dabe me, te bidi dabe dali, augwaligo lotu po te Dagonba wali, augwali te Dagongo lotu be te munalubo madi pesage te degedude te Dagon tobolude nogo dali si te tulaluama, munalubo pesagede te augwali me bilisiąwai. Augwaligo te bogo badu naga bilibo dao.

Te halobage te Asdotde munaluali sogo, Genuai Bidigo te haniani sę mu te Asdot we bidi dabede eyu ebaso, tama te Asdot pąde bidali we bidi, te agai augwali wi dwai mu ilali. Tama agai augwali tigide te dwai dili keni pedalumainu ilali. Te Asdot bulu bidi dabego te sęgę pedalubo sulama, tama augwa te po wai, “Te Israel dabego Godigo te dabolo, me te dago god Dagonbolo te dwai dene mawai. Tama teyu, dago te Dąų Wali Bomai Po Muani Halobage, te dago bulude munalumainu me elamu dao,” wali. Tama tibaso, augwaligo te Filistia king bidi a nagabolo te po ola toloyu, te hanaluyu, augwali sisinagasao wali. Augwali sisina silibo si, tama te Asdot bulu bidi dabego augwalibolo te po wai, “Dago te Israel dabego halobage magi yaibawe?” Tama te polalubo tobolu bidi dabego te tiwai po wei ponani, “Te Gat taun hanuba sela pao,” wali. Tialima, augwaligo te Gat hanuba tolasa pali, te Filistia dabego gasa hanu dao.

Tiali goli, augwaligo te halobage te Gat hanuba sela pali goli, Genuai Bidigo te hanude bidali we bidi dabeba me te dwai dene mobaso, te augwali wi mu ilalio. Tama agai tigidali we bidi augwaliba te dili keni dwai mu pedalumainu elama, tama augwali mu dolalio. 10 Tama tibaso, te Gat hanu bidi dabego te halobage te Filistia dabego gasa hanu me nogi Ekron, teba tolali. Te halobage sabalubo side, te Ekron bulu bidi dabego i weyu, po dagą bomo elama weyu, te tiwai po wai, “Ae, tegobao! Augwaligo da tigidali ela mumainu, tama augwaligo te Israel dabego Godigo te Dąų Wali Bomai Po Munalubo Halobage te sela asalio,” wali. 11 Tama tibaso, augwaligo te Filistia king dabe i olama, asobo side, tama augwaligo te tiwai po te king dabebolo wali, “Dagego te Israel dabego Godigo e Dąų Wali Bomai Po Munalubo Halobage te augwa buluba ma tolao. Tama tibaso da, te agai da me, dago we wai dabe dali, me eligobeo.” Augwaligo te tiwai po wali, magi baso meni, Godigo augwaliba te dene mabo sę umabo eyu, tama hauwa we bidi isai. Tama teyu, augwali tigidali wi dwai mu yai. 12 Tama te bulu we bidi augwali meba isibeo, tiali goli, te dwai dili keni augwali tigiba pedelama elaluali. Tama augwa te Godigo tau somainu i weyu yalio.

Copyright information for `MPS