2 Chronicles 27

King Jotamgo po dabe

(Dąį 27)

Jotam aga Juda dabego king bidali

(2 Kin 15:32-38)

Te Jotam aga king pedelali sogo agai kibu be 25 elaluali, tama aga Jerusalemde king bidibadi kibu be 16 tama yali. Aga ida te Jerusa da, te Sadokgo wegi. Jotamgo Genuai Bidigo gedude wiegi yai kolesaga yali, te aga aya Usiago hasia bolo yali gilama tama yali. Tama Jotam agai wiegi yai kolesaga me deli yali da, te aga aya Usiago te denami ebo pauda ofa ulainogo te Genuai Bidigo tempel be tomoba pali, te sę tiwai agai ebeo. Tiali goli te Juda we bidi augwaligo wiegi yai kolesaga me ebeo. Augwaligo te haniani dwai kolesaga dabe yali.

Te Jotamgo te sę bidi dabebolo walama, augwaligo te Genuai Bidigo tempel be sunumi, augwaligo Ugwadu Sunumi wabo, te sunumi ma geselali. Tama augwaligo te Ofel dwasianu bulu du, te Jerusalem tomode, tede elalubo obo dodolobo sę hauwa mu yali. Tama me agai sę bidi dabego Juda bulude bulu du dabede taun nigiyu ela pali, me te ni dabe hauwa elalubo bulu dude me nigali. Augwaligo te ami bid dabe duala selama hwįabo bomo yai pesage nigali, me augwaligo te ami bidi dabe bidiyu te boi bidi dabe no muabo bobobage taua sigi be dabe geselali. Tama nosali, Jotamgo aga ami bidi dabe dali augwali te Amon dabe king dali aga ami bidi dabe dali boi hwįgi pali. Tama Jotamgo ami bidi dabego Amon dabego ami bidi dabe aiyaba mu elaluali. Tialima Jotamgo Amon dabebolo agabolo takis mao po wali. Tama te kibu bede augwaligo agabolo te 3,400 kilogram silva mani, me 1,000 ton sęgę wit, me 1,000 ton sęgę rais bali agabolo mani. Tama te deli tiwai takis te namba 2 kibu bede me namba 3 kibu bede me mani. Jotamgo Genuai Bidi aga Godigo godolo ebo kolesaga wali pali. Tama tiyu, aga bomai king mu pedelali. Te king Jotamgo meba sę yali po dabe te buku nogi augwaligo te Juda Hani me Israel Hani Sigo King Dabego Po Buku wabo, te bukude meba po dabe tede te elalubao. Te bukugo agai hwįani me sę yali dabe po me pusai te elalubao. Jotam aga king pedelali sogo aga 25 kibu be elaluali, tama aga Jerusalemde king bidibadi 16 kibu be yali. Te Jotam isali sogo augwaligo aga te Devitgo Taunde pubulali, tama aga ogwa Ahasgo agai pesage selama, tama king pedelali.

Copyright information for `MPS